UKPEPN̄KPỌ 24
Mme Angel Ẹdi Mmanie, Ndien Nso ke Mmọ Ẹsinam?
Jehovah oyom nnyịn idiọn̄ọ n̄kpọ iban̄a mbon emi ẹdude ke heaven. Mme angel, emi Bible okotde “nditọ Abasi,” ẹdụn̄ ke heaven. (Job 38:7) Nso ke Bible etịn̄ aban̄a mme angel? Ndi mmọ ẹkeme ndin̄wam nnyịn m̀mê ndinam nnyịn n̄kpọ? Ndi kpukpru mme angel ẹdi nditọ Abasi?
1. Mme angel ẹdi mmanie?
Jehovah ama obot mme angel mbemiso obotde isọn̄. Owo isikwe mme angel sia mmọ ẹdi spirit ẹnyụn̄ ẹdu ke heaven. (Mme Hebrew 1:14) Mme angel ẹwak etieti, mmọ ẹnyụn̄ ẹnyene nsio nsio ẹdu. (Ediyarade 5:11) Mmọ ẹsinam se Jehovah ọdọhọde, ẹsikop uyo esie. (Psalm 103:20) Enye ama esidọn̄ mmọ utom ọnọ ikọt esie, onyụn̄ esidọn̄ mmọ ẹken̄wam ikọt esie ẹnyụn̄ ẹnyan̄a mmọ. Mme angel ke ẹsinam ata ikọt Abasi mfịn ẹka ẹbịne mbon emi ẹyomde ndidiọn̄ọ ata Abasi.
2. Satan ye mme demon esie ẹdi mmanie?
Ndusụk mme angel ẹma ẹtọn̄ọ ndisọn̄ ibuot ye Jehovah Abasi. Ẹkot angel emi ọkọtọn̄ọde nsọn̄ibuot oro “Satan, emi adade kpukpru mme andidụn̄ isọn̄ otụn usụn̄.” (Ediyarade 12:9) Satan okoyom ndikara mbon en̄wen. Se ikanamde enye anam Adam ye Eve ye ndusụk mme angel ẹtiene enye ẹsọn̄ ibuot edi oro. Mme angel oro ẹketienede enye ẹsọn̄ ibuot do ke ẹsikot mme demon. Jehovah ama ọdọhọ ẹsion̄o kpukpru mmọ ke heaven ẹduọn̄ọ ke isọn̄, ndien ibịghike enye oyosobo mmọ ẹfep.—Kot Ediyarade 12:9, 12.
3. Nso ke Satan ye mme demon ẹsiyom ndida mbian̄a nnyịn?
Satan ye mme demon ẹsida nsio nsio n̄kpọ emi asan̄ade n̄kpọ ye odudu mme demon ẹbian̄a ediwak owo. Ndusụk owo ẹsika ẹbịne mbon emi ẹsisede ntantaọfiọn̄ ẹtịn̄ se iditịbede, ẹka ẹbịne mbiaibọk, mme etịn̄ ini iso, ye mme owo ntre. Ndusụk owo ẹsikam ẹka itie usọbọ emi owo mîdaha n̄kan̄a enyịn inọ usọbọ. Satan ye mme demon ẹbian̄a mme owo tutu mmọ ẹnịm ke imekeme ndineme nneme ye mme akpan̄kpa. Edi Jehovah ama odụri nnyịn utọn̄ ete: “Ẹkûkabade ẹtiene mme obụp ekpo, ẹkûnyụn̄ ẹka ẹtiene mme etịn̄ ini iso.” (Leviticus 19:31) Enye iyomke nnyịn idia ikodụk ubọk Satan ye mme demon esie. Mmọ ẹdi mme asua Abasi, ẹnyụn̄ ẹyom ndinam nnyịn ibak.
SỊN IDEM KPEP
Se nti n̄kpọ emi mme angel ẹsinamde. Se n̄ko afanikọn̄ emi ikemede ndidụk ikpesịn ubọk ke n̄kpọ mme demon, ye nte ikpekpemede idem man ididia idụk ubọk Satan ye mme demon.
4. Mme angel ẹsin̄wam mme owo ẹdidiọn̄ọ Jehovah
Mme angel Abasi isikaha ke idemmọ ikọkwọrọ ikọ inọ mme owo. Edi ndusụk ini mmọ ẹsinam ata ikọt Abasi ẹka ẹbịne mbon emi ẹyomde ndidiọn̄ọ ata Abasi. Kot Ediyarade 14:6, 7, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ntak emi iyomde mme angel ẹsin̄wam nnyịn ke ukwọrọikọ?
-
Ndi enem fi ndidiọn̄ọ ke mme angel ẹkeme ndin̄wam fi aka ebịne owo emi oyomde ndidiọn̄ọ akpanikọ emi Bible ekpepde? Nso inam ọdọhọ ntre?
5. Kpeme idem ye n̄kpọ mme demon
Satan ye mme demon ẹdi mme asua Abasi. Mmọ ẹsasua nnyịn n̄ko. Kot Luke 9:38-42, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke mme demon ẹsinam mme owo?
Nnyịn iyomke ndikot mme demon ndian idem. Kot Deuteronomy 18:10-12, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ke mme demon ẹsiyom ndida mbian̄a nnyịn nnyụn̄ nneme nneme ye nnyịn? Ewe n̄kpọ emi asan̄ade n̄kpọ ye odudu mme demon ke mme owo ẹsima ndinam ke obio afo odude?
-
Ndi emekere ke ọfọn nte Jehovah akpande nnyịn ndisịn ubọk ke n̄kpọ emi asan̄ade n̄kpọ ye mme demon? Nso inam ọdọhọ ntre?
Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ndi emekere ke utọ n̄kpọubọk Palesa ekesịnede eyen esie do ama ọdiọk? Nso inam ọdọhọ ntre?
-
Nso ke akana Palesa anam man mme demon idifịna enye?
Toto ke eset, ata mme Christian isiyomke ndisasan̄a n̄kpọ ndomokiet ye mme demon. Kot Utom 19:19 ye 1 Corinth 10:21, ekem ẹbọrọ mbụme emi ẹnyụn̄ ẹneme ẹban̄a enye:
-
Ntak emi ọfọnde ifọp m̀mê iduọk n̄kpọ ekededi oro inyenede, emi asan̄ade n̄kpọ ye odudu mme demon?
6. Emekeme ndikan Satan ye mme demon esie
Satan edi ọbọn̄ mme demon. Edi Jesus emi ẹsinyụn̄ ẹkotde Michael edi etubom nti angel. Enye esida mme angel emi mîkọsọn̄ke ibuot ye Abasi usụn̄. Ndi ọmọdiọn̄ọ utọ odudu emi Michael enyenede? Kot Ediyarade 12:7-9, ekem ẹbọrọ mbụme emi ẹnyụn̄ ẹneme ẹban̄a mmọ:
-
Mmanie inyene odudu ikan? Michael ye mme angel esie m̀mê Satan ye mme demon?
-
Ndi emekere ke ufọn osụk odu do aba mbet Jesus ndifehe Satan ye mme demon esie?
Afo emekeme ndikan Satan ye mme demon esie. Kot James 4:7, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke akpanam man Satan ye mme demon idinam fi n̄kpọ?
NDUSỤK OWO ẸSIDỌHỌ ẸTE: “Idiọkke ndibre game m̀mê ndise fim emi asan̄ade n̄kpọ ye n̄kpọ mme demon. Onyụn̄ edi n̄kpọ game ye fim, isinamke owo n̄kpọ.”
-
Ntak emi utọ ekikere oro mîfọnke?
SE IKPEPDE
Nti angel ẹsin̄wam nnyịn. Satan ye mme demon esie ẹdi mme asua Jehovah. Mmọ ẹsinyụn̄ ẹda ubre-idiọn̄, utịn̄-ini-iso, ye mme n̄kpọ ntre ẹbian̄a mme owo.
Se M̀mê Emeti
-
Nso ke mme angel Abasi ẹsinam man mme owo ẹdidiọn̄ọ ata Abasi?
-
Satan ye mme demon esie ẹdi mmanie?
-
Ntak emi mûyomke ndisịn ubọk ke n̄kpọ ekededi emi asan̄ade n̄kpọ ye mme demon?
KPEP N̄KPỌ EN̄WEN
Se se iwụtde ke Jesus edi etubom mme angel emi ẹsikotde Michael.
“Anie Edi Michael Emi Edide Etubom Mme Angel?” (Odu ke jw.org)
Se se iwụtde ke idịghe owo m̀mê idiọkn̄kpọ emi esịnede owo ke idem edi Devil.
Se nte n̄wan kiet akasan̄ade ọbọhọ mme demon.
Se nte Satan esidade n̄kpọ emi asan̄ade n̄kpọ ye odudu mme demon abian̄a mme owo.
“Akpanikọ Aban̄ade Mfọni, Ubre-Idiọn̄, ye Ifọt” (Usụn̄ Oro Adade Esịm Nsinsi Uwem, ikpehe 5)
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
