Jehovah wɔ ebusua bi wɔ sor, na ɔpɛ dɛ yesua hɔnho adze. Abɔfo ka dɛm ebusua no ho, na Bible no frɛ hɔn ‘Nyankopɔn ne mba.’ (Job 38:7) Ebɛnadze na Bible no ka fa abɔfo ho? Hɔn edwuma nye dɛn? Ana abɔfo nyina ka Nyankopɔn n’ebusua no ho?

1. Woananom nye abɔfo no?

Jehovah bɔɔ abɔfo ansaana ɔrobɔ asaase. Dɛ mbrɛ yenyim no, Jehovah yɛ sunsum, na ɔtse sor, ntsi yerunntum mmfa hɛn enyi nnhu no. Dɛmara na abɔfo no so tse. (Hebrewfo 1:​14) Abɔfo ɔpepem pii na wɔwɔ hɔ, na hɔn mu biara so yɛ soronko. (Nyikyerɛ 5:​11) Abɔfo no ‘dzi Jehovah n’asɛm do, na wotsie n’asɛm ndze.’ (Ndwom 103:​20) Tsetse no, nna ɔyɛ a Jehovah dze nkra ma abɔfo no ma wɔbɛka kyerɛ nyimpa. Afei so, nna Jehovah soma hɔn ma wɔbɔboa n’asomfo na wɔgye hɔn fi ɔhaw mu. Ndɛ, sɛ obi pɛ dɛ osua Nyankopɔn ho adze a, ɔyɛ a abɔfo no kyerɛ Christianfo kwan ma wɔkɔ dɛm nyimpa no hɔ.

2. Woananom nye Satan nye n’esunsum fi no?

Abɔfo no mu bi enndzi Jehovah nokwar. Ɔbɔfo a odzii kan yɛɛ dɛm na odzii enyiammbɔhosɛm kyerɛɛ Jehovah nye nyia “wɔfrɛ no Abɔnsam nye Satan no, wiadze nyina daadaafo no.” (Nyikyerɛ 12:9) Nna Satan pɛ dɛ odzi tum wɔ afofor do, ntsi ɔyɛe ara daadaa Adam na Eve ma wɔyɛɛ bɔn tsiaa Nyankopɔn, na ekyir yi mpo, ɔdaadaa abɔfo binom so ma hɔn so wɔyɛɛ asoɔdzen. Wɔfrɛ dɛm abɔfo a wɔyɛɛ asoɔdzen no esunsum fi anaa mbɔnsam. Jehovah apam hɔn efi sor aba asaase do, na ɔrennkyɛr biara, ɔbɛsɛɛ hɔn.​—Kenkan Nyikyerɛ 12:​9, 12.

3. Ebɛn akwan na Satan nye esunsum fi no fa do daadaa hɛn?

Satan nye esunsum fi no nam esumansɛm do daadaa nyimpa pii. Ebɛnadze nye esumansɛm? Sɛ wɔka esumansɛm a, dza ɔkyerɛ nye dɛ obi nye esunsum bedzi nkitaho. Dɛ nhwɛdo no, binom kɔ hɔn a wɔhwɛ nworaba mu nye adzebisafo nkyɛn dɛ wɔnka dza obesi daakye no nkyerɛ hɔn. Ɔyɛ a binom so kɔ akɔmfo na esumamfo so hɔ dɛ wɔmboa hɔn. Sɛ binom so yar na sɛ wɔrekɛsa hɔnho yarba a, ɔyɛ a wɔdze esumansɛm fora mu. Wɔama nyimpa binom so enya adwen dɛ wobotum nye hɔn a woewuwu no akasa. Naaso, Jehovah abɔ hɛn kɔkɔ dɛ: “Mma hom nndan nnnkɔ hɔn a wɔyɛ adzebisafo, nye esumamfo so hɔ.” (Leviticus 19:​31) Satan nye esunsum fi no yɛ Nyankopɔn n’atamfo, na wɔpɛ dɛ wopira hɛn. Naaso, Nyankopɔn dze, ɔdɔ hɛn na ɔpɛ dɛ ɔbɔ hɛnho ban, ntsi na ɔdze dɛm kɔkɔbɔ yi ama hɛn no.

 PƐNSAPƐNSA MU KƆ EKYIR

6. Ibotum ako etsia Satan nye n’esunsum fi no ma aayɛ yie

Satan na odzi esunsum fi no do tum. Naaso abɔfo anokwafo no dze, ɔbɔfopanyin Michael na ɔkyerɛ hɔn kwan. Michael yɛ dzin fofor a wɔdze frɛ Jesus. Michael wɔ tum paa. Ma yɛnkenkan Nyikyerɛ 12:​7-9, na yebohu siantsir a yɛreka dɛm. Yewie a, yebosusu nsɛmbisa yi ho:

• Sɛ edze Michael nye n’abɔfoe no toto Satan nye n’esunsum fi no ho a, ehwɛ a hɔn mu woana na ɔwɔ tum paa?

• Ehwɛ a ɔwɔ dɛ Jesus n’ekyirdzifo suro Satan nye n’esunsum fi no?

Ibotum edzi Satan nye n’esunsum fi no do konyim. Ma yɛnkenkan James 4:​7, na yensusu asɛmbisa yi ho:

• Ibesi dɛn abɔ woho ban efi Satan nye esunsum fi no ho?

 DZA ESUA

Abɔfo anokwafo no boa hɛn. Satan nye n’esunsum fi no yɛ Jehovah n’atamfo, na wɔnam esumansɛm do daadaa nkorɔfo.

Mbobɔdo

• Ebɛnadze na Jehovah n’abɔfoe no yɛ dze boa nkorɔfo a wɔpɛ dɛ wosua Nyankopɔn ho adze no?

• Woananom nye Satan nye n’esunsum fi no?

• Ebɛnadze ntsi na epɛ dɛ etwe woho fi esumansɛm ho korakora?