NǓKPLƆNKPLƆN 24
Etɛ ka Nyí Nǔgbo ɔ Dó Wɛnsagun lɛ Wu?
Jehovah ba ɖɔ mǐ ni kplɔ́n nǔ dó xwédo tɔn e ɖò jixwé é wu. Wɛnsagun lɛ ɖò xwédo enɛ mɛ bɔ è nɔ ylɔ́ ye ɖɔ “vǐ Mawu tɔn lɛ.” (Jɔbu 38:7, nwt) Etɛ Biblu ka ɖɔ dó wɛnsagun lɛ wu? Etɛ wɛnsagun lɛ ka nɔ wà? Wɛnsagun lɛ bǐ jɛn ka ɖò xwédo Mawu tɔn mɛ à?
1. Mɛ̌ mɛ̌ e ka nyí wɛnsagun lɛ?
Jehovah ko dá wɛnsagun lɛ cobo wá bló ayikúngban ɔ. Nǔɖiɖó gbigbɔ tɔn wɛ nú ye bɔ nukún sixu mɔ ye ǎ Jehovah ɖɔhun, lobɔ ye nɔ nɔ jixwé. (Eblée lɛ 1:14) Wɛnsagun livi mɔ̌kpan wɛ ɖè, bɔ ye mɛ ɖokpo ɖokpo ɖó jijɔ yetɔn yetɔn. (Nǔɖexlɛ́mɛ 5:11) Ye nɔ “bló nǔ e [Jehovah] zɔ́n [ye] lɛ, bo nɔ dó ɖexlɛ́ ɖɔ emi setónú n’i.” (Ðɛhan 103:20) Ðò hwexónu ɔ, Jehovah sɛ́ wɛn dó togun tɔn, d’alɔ ye bo lɛ́ hwlɛn ye gán gbɔn wɛnsagun lɛ jí hweɖelɛnu. Égbé ɔ, wɛnsagun lɛ nɔ xlɛ́ ali Klisanwun lɛ yì mɛ ɖěɖee jló na kplɔ́n nǔ dó Mawu wu lɛ é gɔ́n.
2. Mɛ̌ mɛ̌ e ka nyí Satáan kpo awoví tɔn lɛ kpo?
Wɛnsagun lɛ bǐ nɔ gbeji nú Jehovah ǎ. Wɛnsagun nukɔntɔn e fɔ́n gǔ dó Mawu jí é wɛ “è nɔ ylɔ́ ɖɔ awoví abǐ Satáan . . . é wɛ flú gbɛ̀ ɔ bǐ.” (Nǔɖexlɛ́mɛ 12:9) Satáan jló na kpa acɛ dó mɛ ɖevo lɛ jí, enɛ wu ɔ, é blɛ́ Adamu kpo Ɛvu kpo, bo tlɛ wá blɛ́ wɛnsagun ɖevo lɛ bɔ ye fɔ́n gǔ éɖɔhun. Wɛnsagun gǔfɔntɔ́ enɛ lɛ wɛ è nɔ ylɔ́ ɖɔ awoví lɛ. Jehovah nya ye sín jixwé sɛ́dó ayikúngban jí, bo na wá sú kún dó nú ye.—Xà Nǔɖexlɛ́mɛ 12:9, 12.
3. Nɛ̌ Satáan kpo awoví lɛ kpo ka nɔ tɛ́n kpɔ́n bá flú mǐ gbɔn?
Satáan kpo awoví lɛ kpo nɔ flú mɛ gegě gbɔn awovínúwiwa gblamɛ, é wɛ nyí tintɛnkpɔn bo na wà nǔ ɖó kpɔ́ xá yɛ nyanya lɛ. Ði kpɔ́ndéwú ɔ, mɛɖé lɛ nɔ yì ba nǔ dò ɖò amɔɛkantɔ́ lɛ, bokɔ́nɔ lɛ, mɛ e nɔ ba dò nú sun sín wuntun lɛ é, kpo nǔmɔtɔ́ lɛ kpo gɔ́n. Mɛ ɖevo lɛ nɔ zán awovínúwiwa sín amasin lɛ. Satáan kpo awoví lɛ kpo nɔ lɛ́ blɛ́ gbɛtɔ́ lɛ bɔ ye nɔ ɖi nǔ ɖɔ emi sixu ɖɔ xó nú mɛkúkú lɛ. Amɔ̌, Jehovah gb’akpá nú mǐ ɖɔ: “Mi ma kan bò ó; mi ma kan nǔ ó.” (Levíi ví lɛ 19:31) É gb’akpa enɛ nú mǐ, bo na dó nya xɛ ɖò mǐ jí sín Satáan kpo awoví lɛ kpo sí. Kɛntɔ́ Mawu tɔn lɛ wɛ nú ye, bɔ ye ba na hɛn nǔ gblé dó mǐ wu.
BA DÒ NÚ NǓ D’EJI
Kplɔ́n nǔ dó nǔ ɖagbe ɖěɖee wɛnsagun lɛ sixu wà nú mǐ lɛ é, lee awovínúwiwa nyla sɔ é, kpo lee mǐ sixu nya xɛ ɖò mǐɖée jí sín Satáan kpo awoví lɛ kpo sí gbɔn é kpo wu.
4. Wɛnsagun lɛ nɔ d’alɔ gbɛtɔ́ lɛ bɔ ye nɔ kplɔ́n nǔ dó Jehovah wu
Wɛnsagun Mawu tɔn lɛ nɔ ɖɔ Mawuxó nú gbɛtɔ́ lɛ tlɔlɔ ǎ. É nyɔ́ wà ɔ, ye sixu xlɛ́ ali Mawu sɛntɔ́ lɛ yì mɛ ɖěɖee jló na kplɔ́n nǔ dó wǔ tɔn lɛ é gɔ́n. Xà Nǔɖexlɛ́mɛ 14:6, 7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Etɛwu mǐ ka ɖó hudo wɛnsagun lɛ sín alɔdó tɔn bo na dó ɖɔ Mawuxó?
-
Tuùn e a tuùn ɖɔ wɛnsagun lɛ sixu xlɛ́ ali we yì mɛ ɖěɖee jló na sè Biblu sín xó lɛ é gɔn é ka dó wusyɛn lanmɛ nú we à? Etɛwu?
5. Nyi alɔ nú awovínúwiwa
Kɛntɔ́ Jehovah tɔn lɛ wɛ nú Satáan kpo awoví lɛ kpo. Kɛntɔ́ mǐ lɔ tɔn wɛ ye nyí. Xà Luki 9:38-42, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ awoví lɛ ka nɔ wà nǔ xá gbɛtɔ́ lɛ gbɔn?
Mǐ jló na na tɛn awoví lɛ nú ye na wà nǔ dó mǐ wu ǎ. Xà Sɛ́nflínmɛ 18:10-12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Ali tɛ lɛ nu awoví lɛ ka nɔ tɛ́n kpɔ́n bo na wà nǔ dó mǐ wu, lobo ɖɔ xó xá mǐ ɖè? Nǔwalɔ tɛ lɛ ka gbakpé ɖò fí e a nɔ nɔ é?
-
A ka lin ɖɔ é sɔgbe ɖɔ Jehovah ni dó awovínúwiwa sín sɛ́n à? Etɛwu?
Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
A ka lin ɖɔ tílá e Prisca dó nú vǐ nyɔnu tɔn é nyí awovínú wɛ à? Etɛwu?
-
Etɛ Prisca ka ɖó na wà bonu awoví lɛ ma kpé wǔtu tɔn ó?
Sín dò wɛ Klisanwun nǔgbo lɛ nɔ lodǒ ɖò awoví lɛ nukɔn. Xà Mɛsɛ́dó 19:19 kpo 1 Kɔlɛntinu lɛ 10:21 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Etɛwu é ka ɖò taji ɖɔ a ni sú kún dó nú nǔ ɖebǔ e a ɖó b’ɛ cá kan xá awovínúwiwa é?
6. Ðu ɖò ahwan e fun xá Satáan kpo awoví tɔn lɛ kpo wɛ a ɖè é jí
Satáan wɛ kpa acɛ nú awoví lɛ. Amɔ̌, wɛnsagun lɛ sín gǎn Micɛli wɛ kpa acɛ nú wɛnsagun gbejinɔtɔ́ lɛ, Jezu sín nyikɔ ɖevo wɛ nyí enɛ. Nɛ̌ dò Micɛli ka ɖó hlɔnhlɔn sɔ? Xà Nǔɖexlɛ́mɛ 12:7-9, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Mɛ̌ ka ɖó hlɔnhlɔn hú mɛɖé? Micɛli kpo wɛnsagun tɔn lɛ kpo wɛ à alǒ Satáan kpo awoví tɔn lɛ kpo?
-
A ka lin ɖɔ ahwanvu Jezu tɔn lɛ ɖó na ɖi xɛsi nú Satáan kpo awoví tɔn lɛ kpo wɛ à?
A sixu ɖu ɖò ahwan e fun xá Satáan kpo awoví tɔn lɛ kpo wɛ a ɖè é jí. Xà Jaki 4:7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ a ka sixu nya xɛ ɖò hwiɖée jí sín Satáan kpo awoví lɛ kpo sí gbɔn?
MƐÐÉ LƐ ÐƆ: “Ayihun ɖěɖee mɛ awovínúwiwa ɖè lɛ é dida alǒ awovínúwiwa sín fímu lɛ kpinkpɔn nyla ǎ. Ye nɔ dó nǔkiko nú mɛ kpowun wɛ.”
-
Etɛwu linlin mɔ̌hun ka nyla?
ETƐ LƐ A KA KPLƆ́N?
Wɛnsagun gbejinɔtɔ́ lɛ nɔ d’alɔ mǐ. Satáan kpo awoví tɔn lɛ kpo nyí kɛntɔ́ Jehovah tɔn lɛ, bɔ ye nɔ zán awovínúwiwa dó flú gbɛtɔ́ lɛ.
Vɔ̌gbɔnji
-
Nɛ̌ wɛnsagun Jehovah tɔn lɛ ka ɖò alɔ dó gbɛtɔ́ lɛ wɛ bonu ye na kplɔ́n nǔ dó wǔ tɔn gbɔn?
-
Mɛ̌ mɛ̌ e ka nyí Satáan kpo awoví tɔn lɛ kpo?
-
Etɛwu a ma ka jló na kpé nǔ ɖebǔ xá awovínúwiwa ǎ?
KÍJÉ
Kpɔ́n kúnnuɖenú ɖěɖee xlɛ́ ɖɔ Jezu wɛ nyí wɛnsagun ɖaxó Micɛli é.
Kpɔ́n kúnnuɖenú ɖěɖee xlɛ́ ɖɔ Awoví tíìn nǔgbo nǔgbo lɛ é.
Kpɔ́n lee nawe ɖé gosin awoví lɛ sín acɛ glɔ́ gbɔn é.
“É Wá Mɔ Nu nú Gbɛ̀ Tɔn” (Atɔxwɛ [Gungbe] 1er mars 1994)
Kpɔ́n lee Satáan nɔ zán awovínúwiwa dó flú gbɛtɔ́ lɛ gbɔn é.
“Nǔgbo ɔ Dó Majiki kpo Azě kpo Wu” (Ali E Nɔ Yì Gbɛ̀ Mavɔmavɔ Mɛ É, akpáxwé 5)
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
