E iai le fāmili o Seova i selo, ko le kau āselo. Ti e lotou fakaʼigoaʼi i le Tosi-Tapu ko ‘vosa o le Atua.’ (Sopo 38:7) Koleā e tou ako i le Tosi-Tapu o uiga mo le kau āselo? Koleā e lotou fai ki le kakai? E kau fuli ko ia le kau āselo ki le fāmili o le Atua?

1. Ko ai le kau āselo?

Na fakatupu e Seova le kau āselo i muʼa o le fakatupu o le kele. Ti ko lātou ko ni laumālie e maʼuli i le lagi. (Epeleo 1:14) Ko ni lauʼi miliona āselo e tasi mo ia lātou lona agaaga. (Apokalipisi 5:11) E lotou ‘fakalogo ki le leʼo o lana folafola.’ (Pesalemo 103:20) I le temi muʼa, na kakau e Seova lana kau āselo ke ano o fakasā ni logo ki ana kaunaga, pe ke lotou tokoi kia lātou. I le temi nei, e takitaki e le kau āselo le kau tisipulo a Sesu ki kakai alā e lotou fia iloaʼia le Atua.

2. Ko ai Satana ti mo le kau temonio?

Ko ʼiki āselo na se lotou nofo agatonu kia Seova. Ko le ʼuluaki āselo leia na fakafesagai ki le Atua “leia na igoa ko Tiapolo mo Satana, leia na kakaai ia le malama nei katoa.” (Apokalipisi 12:9) O tupu ko lona fia pule, na kākāʼi e ia le ʼuluaki taumātuʼa, ti ki muli mai mo ni kau āselo ke fakafesagai ki le Atua. Na fakaʼigoa a āselo agatuʼu anā ko le kau temonio. Na kapu e Seova lātou mei le lagi, ti e lotou nofo nei i le kele o talitali ki lolātou puliʼi ʼoki.—Lau Apokalipisi 12:9, 12.

3. E kākāʼi fefeʼaki e Satana mo le kau temonio a le kakai?

E fakaʼaogaʼi e Satana mo le kau temonio le fai fakalaulaʼakau ke kākāʼi ai le kakai tokaʼapi. Ko le puleʼaki lenā e fakaʼaogaʼi e lātou ke felogoi ai mo laumālie veli. Tokaʼapi e lotou tioʼi a neʼa e sā ai ni fakakikite (horoscopes) ti fakaʼaogaʼi le faikikite mo faitoʼo fakalaulaʼakau ti mo le felogoi mo le kau mate. Kae na soli mai e Seova le fakatotonu leinei: ‘ʼAua na kotou maliu loa kia lātou alā e māsau ki laumālie o le kau mate, pe ko le kau faikikite.’ (Levitiko 19:31) E soli mai e Seova le fakatokaga leinei ke puipui ai tātou. Ko Satana mo le kau temonio ko fili o le Atua, ti e lotou faiga ke fakasalaʼi tātou.

 MANATU LOLOTO

6. Le mālō ia Satana mo le kau temonio

Ko le pule o le kau temonio ko Satana. Kae ko le pule o le kau āselo ko le alekaselo ko Mikaele leia ko Sesu. E makeke ko ia le alekaselo ko Mikaele? Lau Apokalipisi 12:7-9, ti fai a vesili anei:

• Ko ai e makeke ia Mikaele mo lana kau āselo ti mo Satana mo lana kau temonio?

• Ki lau manatu, e tonu ko ia ki le kau tisipulo a Sesu ke lotou ʼī kia Satana mo le kau temonio?

E mafai ke ke mālō ia Satana mo le kau temonio. Lau Sakopo 4:7, ti fai le vesili leinei:

• E mafai fefeʼaki lau fakafesagai kia Satana mo le kau temonio?

 MANATU TĀFITO

E tokoi le kau āselo kia tātou. Ko Satana mo le kau temonio ko fili o Seova, e lotou fakaʼaogaʼi le fai fakalaulaʼakau ke fakasalaʼi ai le kakai.

Fakamanatu

• E tokoi fefeʼaki le kau āselo ki kakai alā e afaʼia le Atua?

• Koleā e pati i le Tosi-Tapu o uiga mo Satana ti mo le kau temonio?

• Koleā e tonu ai ke ke fakamamaʼo mei le fai fakalaulaʼakau?