Yahuwah Alla no faalaa yo en anndu ɓeynguure makko nden ka kammu. Malaa’ikaaɓe ɓen no tawaa e nden ɓeynguure, noddaaɓe « ɓiɓɓe Alla » (Ayyuuba 38:7). Ko honɗun Deftere Alla nden haali fii malaa’ikaaɓe ɓen ? Ko honno ɓe woni e battinirde yimɓe ? Haray malaa’ikaaɓe ɓen fow no tawaa e ɓeynguure Alla nden ?

1. Ko homɓe woni malaa’ikaaɓe ɓen ?

Yahuwah Alla taguno malaa’ikaaɓe ɓen ado o tagude leydi ndin. Wa makko, ko ɓe ruuhuuji ɓe yi’etaake e ko ka kammu ɓe woni (Yahuudiyankeeɓe 1:14). No woodi miliyonji malaa’ikaaɓe e mo kala no mari sifaaji mun sertuɗi (Feɲɲinannde 5:11). Hiɓe « jent[oo] daalol makko ngol, huutora daaluyee makko on ! » (Zabuura 103:20, VPFJ). Ɓaawo ɗoo, Yahuwah Alla nulayno malaa’ikaaɓe makko ɓen fii yottingol nele, wallitagol e danndugol jamaa makko on. Hannde, malaa’ikaaɓe ɓen no ɗowude almasiiyaaɓe ɓen ka yimɓe faalaaɓe anndude fii Alla.

2. Ko homɓe woni Seytaane e jinnaaji ɗin ?

Woɓɓe e malaa’ikaaɓe ɓen luttaano wonugol sella-finndeeɓe. Malaa’ikaajo adiiɗo murtude on ko « wi’etee[ɗo] Ibuliisa maa Seytaane, faljin[ɗo] yimɓe aduna on fow » (Feɲɲinannde 12:9). Seytaane no faalanoo laamaade, ko ɗun waɗi o battini neene Hawaa e baaba Aadama e ɓawto ɗun hay malaa’ikaaɓe goo tawtuno mo e murtaldu makko ndun. Ɓen malaa’ikaaɓe murtuɓe no noddee jinnaaji. Yahuwah Alla raɗii ɓe ka kammu, ɓe ari ka leydi e ko ɓe muloyteeɓe (janngee Feɲɲinannde 12:9, 12).

3. Ko honno Seytaane e jinnaaji ɗin woni e majjinirde en ?

Seytaane e jinnaaji ɗin no majjinirde yimɓe buy mbileyaagal maa ndureyaagal. No boni yewtidugol e jinnaaji maa mayɓe. E piide misal, woɓɓe yahay ka ndaarirooɓe koode, haalooɓe fii ko aroyta, karamokooɓe e ɲawndirooɓe nasi maa talki. Woɓɓe goo yahay ka mbileeɓe maa ndureeɓe fii ɲawndagol. Woɓɓe goo no hoolii ɓe waaway yewtidude e mayɓe. Kono Yahuwah Alla no haɗi en : « Wota on yahu ka yewtidooɓe e mayɓe e haalooɓe fii ko aroyta » (Sariyaaji lewiyankeeɓe ɓen 19:31). O haɗii en ɗun fii danndugol en e juuɗe Seytaane e jinnaaji ɗin. Ko ayɓe Alla e hiɓe faalaa waɗugol en ko boni.

 LUGGINEE

6. Foolugol Seytaane e jinnaaji ɗin

Ko Seytaane laamii jinnaaji ɗin. Kono malaa’i- kaaɓe sella-finndeeɓe ɓen ko Miikaa’iilu malaa’ikaajo mawɗo on laamii ɓe, ɗun ko innde annabi Iisaa goo. Miikaa’iilu malaa’ikaajo mawɗo on ko dolnuɗo ? Janngee Feɲɲinannde 12:​7-9 e yewton fii ɗee lanndaale :

• Ko homɓe ɓuri dolnude ? Miikaa’iilu e malaa’ikaaɓe makko ɓen kaa ko Seytaane e jinnaaji makko ɗin ?

• Hiɗon miijii taalibaaɓe annabi Iisaa ɓen no haani hulude Seytaane e jinnaaji makko ɗin ?

On waaway foolude Seytaane e jinnaaji makko ɗin. Janngee Yaaquuba 4:7 e yewton fii ngal lanndal :

• Ko honno danndirton hoore mon e juuɗe Seytaane e jinnaaji ɗin ?

 RAWNOODE

Malaa’ikaaɓe sella-finndeeɓe ɓen no wallude en. Seytaane e jinnaaji makko ɗin ko ayɓe Yahuwah Alla e hiɓe rewrude mbileyaagal maa ndureyaagal fii majjingol yimɓe.

Ndartannde

• Ko honno malaa’ikaaɓe Yahuwah Alla ɓen woni e wallirde yimɓe fii no ɓe anndira mo ?

• Ko homɓe woni Seytaane e jinnaaji ɗin ?

• Fii honɗun hiɗon faalaa wikkaade mbileyaagal e ndureyaagal ?