REIREI 24

Tera te Koaua Ibukia Anera?

KAMAIUA

E tangiria Iehova bwa ti na reiakina taekaia ana utu aika i karawa. Kaain naba te utu anne bon anera, aika atongaki bwa “natin te Atua.” (Iobi 38:7) Tera ae e taekinaki n te Baibara ibukia anera? A kona ni buokiia aomata? A kaaina ana utu te Atua anera ni kabane?

1. Antai anera?

E karikiia moa anera Iehova imwaini karikan te aonnaba. Bon taamnei aika aki kona n noraki n aron Iehova, ao a maeka i karawa. (Ebera 1:14) Iai mirion ma mirion anera, ao a bane n okoro n tatabemania nako. (Te Kaotioti 5:11) A “kakororaoa ana taeka [Iehova], ao n ongo ni bwanaana.” (Taian Areru 103:20) N taai ake rimoa, ao e kakanakoia ana anera Iehova n tabetai bwa a na karokoa ana rongorongo irouia ana aomata, a na buokiia, ao ni kamaiuia. A kairiraki Kristian ngkai irouia anera nakoia aomata aika kan reiakina taekan te Atua.

2. Antai Tatan ma ana taimonio?

Iai tabeman anera ake a aki teimatoa ni kakaonimaki nakon Iehova. E aranaki te moan anera are e karitei bwa “te Riaboro ao Tatan, are e burebureiia kaain te aonnaba ni kabutaa.” (Te Kaotioti 12:9) E kan taui aroia aomata Tatan, ngaia are e a kariria Atam ao Ewa ao imwina anera tabemwaang bwa a na raonna ni karitei. A aranaki anera akana karitei akanne bwa taimonio. E karenakoia mai karawa Iehova nakon te aonnaba, ao a na boni kamaunaaki.—Wareka Te Kaotioti 12:9, 12.

3. A kangaa Tatan ao taimonio ni burebureira?

A burebureiia aomata aika bati Tatan ma taimonio rinanon te tabunea, ae te mwakuri ae buakaka ae te kataia n reitaki ma taamneia maate. N te katoto, tabeman a karekei buokaia irouia taani kaiwan itoi, taani kaiwani kanoan taai aika a na roko, ibonga, ao ai taan wauwi. Tabemwaang a ukeri aeka ni bwainnaoraki aika irekereke ma te tabunea. A mwamwanaaki naba aomata bwa a na kakoauaa ae a kona n taetae ma maate. Ma e kauringira ni kangai Iehova: “Kam na tai rairaki nakoia taan rorokoia taimonio, ao tai bubutii buokami irouia taani kaiwani kanoan taai aika a na roko.” (Nakoaia Ibonga 19:31) E anganira te kauring aei bwa ti aonga ni kamanoaki mairoun Tatan ao taimonio. Bon taani kairiribai nakon te Atua, ao a kani kammarakira.

REIAKINA AE BATI RIKI

Nori baika raraoi aika kakaraoi anera, karuanikain te tabunea, ao ai arora ni kona ni kamanoira mairoun Tatan ao taimonio.

4. A buokiia aomata anera n reiakina taekan Iehova

A aki uarongorongo anera n aroia ni karoko irouia aomata. Ma a kairiia taan taromauria te Atua nakoia aomata ake a kan reiakina taekan te Atua. Wareka Te Kaotioti 14:6, 7, ao maroroakin titiraki aikai:

E aera ngkai ti kainnanoa aia ibuobuoki anera n te uarongorongo?
E kaungaaki nanom n ataakin ae a kona anera ni kairiko nakoia aomata ake a kan ongora taekan te Baibara? Bukin tera?

5. Rarawa nakon te tabunea

Tatan ma taimonio bon taani kairiribai nakon Iehova. Bon taani kairiribai naba nakoira. Wareka Ruka 9:38-42, ao maroroakina te titiraki aei:

Tera ae a karaoia taimonio nakoia aomata?

Ti aki tangiria bwa e na rotaki maiura irouia taimonio. Wareka Te Tua-Kaua 18:10-12, ao maroroakin titiraki aikai:

N aanga raa ae a kataia iai taimonio ni karirira ao n reitaki ma ngaira? Baikara waaki n tabunea aika kakaraoaki n am tabo?
N am iango, e raoiroi ngkai e ribaa te mwakuri n tabunea Iehova? Bukin tera?

Kaota te TAAMNEI, ao maroroakin titiraki aikai.

TAAMNEI: “Rarawa Nakon te Riaboro” (5:02)

N am iango e karuanikai te buraeniman are e kanimmwa Palesa ni bain natina? Bukin tera?
Tera ae e riai ni karaoia Palesa bwa e aonga ni kamanoaki mairouia taimonio?

A a kaman rarawa Kristian ni koaua nakoia taimonio. Wareka Mwakuri 19:19 ao 1 I-Korinto 10:21, ao maroroakina te titiraki aei:

E aera ngkai e kakawaki bwa ko na kamaunai am bwai ni kabane aika irekereke ma te tabunea?

6. Tokanikai i aon Tatan ma ana taimonio

A tautaekanaki taimonio iroun Tatan. Ma a kairiraki anera aika kakaonimaki irouni mataniwia anera ae Mikaere ae aran naba Iesu teuana. Korakorara Mikaere? Wareka Te Kaotioti 12:7-9, ao maroroakin titiraki aikai: