Jìhóvà gbĩ́ kọọ̀ é nó nú ea kil ló pá a tọ ea di káála. Gbò nyómá tóm dṹùnà pá tọọ̀ Jìhóvà, vaá bà kọlà “gbò nvín Bàrì.” (Jóòb 38:7) Éé ní e Kpá Káí kọ́ kilma ló gbò nyómá tóm ẽ́? Éé ní e bà ólò naa ló gbò nen ẽ́? É kọọ̀ dénè gbò nyómá tóm dṹùnà pá tọọ̀ Bàrì?

1. Bà mée ní e bà dú gbò nyómá tóm ẽ́?

Jìhóvà beè dèm gbò nyómá tóm besĩ́ à kálá dèm boo kunukẽ̀í. Bà di káála vaá née é láá mònmàva dẽe boo béè kọọ̀ bà di mm̀ nyómá belí Jìhóvà. (Híbrù 1:14) Gã́bug gãà gbò nyómá tóm dì, vaá buù ọ̀và dú kele. (Kùùà Nù 5:11) Bà ‘ólò sí tóm nè Jìhóvà vaá gbanìè tṍ ló.” (Psalm 103:20) Deè kéléá, sìgà tṍó Jìhóvà ólò tú gbò nyómá tóm loomá bel nè gbò nen, ge nvèèmà bá, nè ge aamá pá a gbò. Deè nieí, gbò nyómá tóm ólò tulè gbò níí Kráìst má gbò e bà gbĩ́ gè nó nú ea kil ló Bàrì.

2. Mée ní ea dú Sétàn nè pá a gbò zọ ẹ?

Sìgà gbò nyómá tóm náa beè bọ́ló dẹ̀lẹ̀ nyíé boo nè Jìhóvà. Béè túá kà nyómá tóm ea beè lọ̀l togó kèbá Bàrì kọlà “Pọ́lọ́ Nyómá nè Sétàn, ea kẹlẹ dénè bàlà boo.” (Kùùà Nù 12:9) Sétàn beè gbĩ́ gè bẹl boo gbò nen, vó beè naa kọ á kẹlẹ Ádàm nè Íìv, vaá tṍó e tṍó téní, a beè kẹlẹ nagé dõòna kà gbò nyómá tóm nvea nvée. Gbò nyómá tóm e ba beè zọ̀ẹ lọ̀l togó kèbá Jìhóvàa kọlà gbò zọ. Jìhóvà beè kpó va lọl káála tẹlẹ boo kunukẽ̀í, vaá àé beè kyọ̀ va sĩ́.—Bugi Kùùà Nù 12:9, 12.

3. Mósĩ́ deè ní e Sétàn nè gbò zọ ólò gbĩ́ gè kẹlẹ́i é?

Sétàn nè gbò zọ ólò kẹlẹ gã́bug nen tení dú ló gè naa kọọ̀ bàá fã̀ zọ àbèè ge sí mm̀ bĩ́ìnà nu, naamá gè gbĩ́ gè zọ̀ gbò nyómá loá bel. Dì belí nu dòòmà bá, sìgà gbò ólò sí ló gbò e bà ólò nó nú ea kil ló gyã́à káála, gbò e bà ólò kó nú ea é nááá ló nen, gbò e bà kọ́ọ̀ bà ólò dãè bel lọl gã́ gbò e ba beè ù, nè gbò e bà ólò bó biè. Sìgà gbò ólò gbĩ́ bóa ea bãàa mm̀ gè naa zọ. Bà ólò kẹlẹ nagé gbò nen kọ bàá zìgà kọọ̀ bàé láá ló bel nè gbò e ba beè ù. Sõò Jìhóvà ãanéi kọọ̀: “Ó gá síi mm̀ bĩ́ìnà nu, vaá ó gá síi ló gbò e bà ólò kọ́ nu ea é nááá dì deèsĩ́.” (Lìvítikọ̀s 19:31) À néi gbò ã̀ànei kọbé à kpenài lọl bá Sétàn nè gbò zọ. Bà dú gbò ọ́b Bàrì, vaá bà ólò gbĩ́ gè síi pọ́lọ́.

 KPÁÁ NÓ BỌ̀Ọ̀VẸ̀

6. Bé Sétàn nè pá a gbò zọ èlbá

Sétàn ní ea gé lẹẹlà bel ló gbò zọ ẹ́. Sõò Jíízọ̀s e dõòna kà a bée kọlà Máíkẹ̀l ea dú neǹ togó gbò nyómá tóm ní ea gé túlè gbò nyómá tóm e bà bọ́ló dẹ̀lẹ̀ nyíé boo é. Máíkẹ̀l ié kpóó naa vàẹ? Bugi Kùùà Nù 12:7-9, vaá ò gbóó aalai gbò bíbví:

• Mée ní ea palàge ié kpóó é? É kọọ̀ Máíkẹ̀l nè pá a gbò nyómá tóm sẹ̀ Sétàn nè pá a gbò zọ ẹ́?

• É kọ ò bulà kọọ̀ à dú bií kọ gbò nyòòne nvéè Jíízọ̀s á siiá pọ̀ ló Sétàn nè pá a gbò zọ?

Òó láá bé Sétàn nè pá a gbò zọ èlbá. Bugi Jém̀z 4:7, vaá ò gbóó aalai nakà bíbví:

• Mósĩ́ deè ní eo é láá kpènà o bá lọl bá Sétàn nè pá a gbò zọ ẹ́?

 NÚ E NI NÓ

Gbò nyómá tóm e bà bọ́ló dẹ̀lẹ̀ nyíé boo ólò nvèè bá nèi. Sétàn nè pá a gbò zọ dú gbò ọ́b Jìhóvà, vaá bà ólò kẹlẹ gbò nen tṍó e bà sí mm̀ bĩ́ìnà nu.

Ge Òòa Boo

• Mósĩ́ deè ní e gbò nyómá tóm Jìhóvà gé nvèè bá nè gbò nen kọ bàá nó nú ea kilíé ló é?

• Sétàn nè pá a gbò zọ níà bà mée ẽ́?

• Éé ní ea náa vaá ò gbĩ́ gè kpòòlà lóó lọl ló kọ̀láá kà nú ea kuu gè fã̀ zọ ẹ́?