ƝAAKWƐLI 24
Teɲa kɔlɔn yɛ hwilɛn na malakaɠaa diɛ
Zehova kaa bɔ gu ɲəi bɛlɛn nua maamɛni kɔlɔn diɛi yələkɔlɔn ɉu. Ɲəi bɛlɛn nua tii taɠaa ɓaa malakaɠaa diɛi da kɛ diɛ “ Yálá lonnii ” (Gɔwɔtɔɔi 6:2 ; Ɉɔbə 38:7). Lə ɓə Biblə a mo yɛ hwilɛn na malakaɠaa diɛ ? Lə ɓə malakaɠaa da gɛ nukanŋaa di wɔ yɛnɛɛ hu ? Malakaɠaa kəlee kaa mɔɔn a Yálá yəi bɛlɛn nua ?
1. Gbɛɛ nua ɓaa malakaɠaa ?
Zehova ə gbea malakaɠaa pɛli toloo yɛ teɠa pa lɔi pɛlii. Malakaɠaa kaa lɔ yɛ Zehova, gu hwa pɛli di kaai, di kaa a niiɠaa yələkɔlɔn ɉu (Hebreu 1:14, ɉɛɓɛ yili ninɛ). Malakaɠaa kpulu kaa a miliɔn damaa ə lɛɛ di kəlee tɛi-tɛi di wɔ mɛniɠaa kaa pələ ho tanɔn (Kulɔ ponoŋa hɛɓɛ 5:11). Malakaɠaa da ‘ Zehova woo pɔ mɛni kɛ, da nwoo mɛn nɔ di nɛɛ ma di bɔ mɛni kɛ ’ (Maatɛnɛ 103:20). Zehova ə wɔlɔ kɛi ŋɔ malakaɠaa tɔɔ ŋɔ kólókɛnua pɔ diɛ ŋɔ wɛlɛɛ ɓo, diɛ kpɔnmaa tɛɛ di pɔ ə lɛɛ diɛ di nwunmaaɓo. Háákələi malakaɠaa da kilistalea tənəndɔɔ nua pɔ diɛi di kaa bɔ di Yálá kɔlɔn.
2. Gbɛɛ nua ɓaa Sətana da ɲinɛnŋaa ?
Malaka taɠaa di ho lɛɛ Zehova woo mu. Malaka toloo kulɔ Zehova woo mu ya ɓə da kɛ ma “ Ɓilihi, a wala kɛ tii : Sətana, yii gaa yɛnɛɛ naa kəlee nua ɓowoi ” (Kulɔ ponoŋa hɛɓɛ 12:9, ɉɛɓɛ yili ninɛ). Sətana ə kɛ bɔ ə ŋaawooɓolaa kɛ nu takpɛliɠaa mɛi yili ɓa ə pili Adamə da Ɛve di wəlii, ə lɛɛ pulu ɓa malaka takpɛliɠaa di hwilɛn bulu di kulɔ Yálá woo mu. Malakaɠaa tii kulɔ Yálá woo mu da kɛ di laa ɓaa ɲinɛnŋaa. Zehova ə di kpɛ yələkɔlɔn ɉu ə di pili lɔi mɛi ə lɛɛ gaa pai di nwun na pilii (Kulɔ ponoŋa hɛɓɛ 12:9, 12, ɉɛɓɛ yili ninɛ).
3. Setana da ɲinɛnŋaa da tɛɛ ləi diɛ nukanŋaa ɓowo ?
Sətana da ŋɔ ɲinɛnŋaa da tɛɛ ɲinɛn mɛniɠaa kɔwɔi awala kɛtii hali pulu yii diɛ nukanŋaa ɓowo. Hali pulu yii kaa a kpaaləɠaai nu tamaa da tɛɛ la ə gɛ da ɲinɛnŋaa diɛ hwaa. Gwa gɔɔmaa həɠə nutaɠaa da kɛ lii diɛ tɔlikpɛnua kaa, halikɛnua ə ma kɛ wulukɛnua. Nutaɠaa da kɛ di hali kɛi a nu maatɛɠi hali yii hali pulu yii a kɛ ɉu. A kɛ nutaɠaa di wɔ kili ɓa da haaɓəlaa da pɛli di hwaa. Kəlaa Zehova kaa kɛi guɔ : “ Ka ho ɲamuataa tɔli mɛni kaa a teɲa ” (Ɉáláá hɛɓɛ 19:31). Ə niɛwoo tii kɛ guɔ yii yaan yɛ pɛli gu maakpɛi Sətana da ɲinɛnŋaa di yəi. Di kaa a Yálá ɲowooɠaa ə lɛɛ di kaa bɔ di mɛniɲɔn gɛ a guɔ.
Ə́ WƆ MƐNIKƆLƆNŊAA TA PƐLƐ MA
Mɛni lɛlɛɛɠaa malakaɠaa da kɛ gɛi gaa, mɛniɲɔn yii a kulɔ hali pulu yii hu ə́ gaa, ə lɛɛ pələi gwa pɛli gu kpɔɔ maakpɛi la Sətana da ŋɔ ɲinɛnŋaa yəi gaa.
4. Malakaɠaa da kpɔnmaa tɛɛ nukanŋaa pɔ di Zehova kɔlɔnŋaa maakwɛli
Malakaɠaa diɛ kpinii hwəi da kɛ tɛɛi diɛ Yálá Lawoo laahəli, kəlaa da Yálá ŋɔ kólókɛnua tənəndɔɔ nuai di kaa bɔ di Yálá kɔlɔn di pɔ. Kulɔ ponoŋa hɛɓɛ 14:6, 7 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Lə mɛni ɓa ku maakpaan gaa malakaɠaa di wɔ kpɔnmaa ɓa yii yaan ku Yálá Lawoo laahəli ?
-
Nuai di kaa bɔ di Yálá Lawoo kɔlɔn malakaɠaa da pɛli di ə́ tənəndɔɔ di pɔɔli. Yili a ə́ hwaŋalɔ ? Lə mɛni ɓa ə́ kaa moi tii ?
5. Ə́ yee kulɔ hali mɛni hu
Sətana da ɲinɛnŋaa di kaa a Zehova ɲowo diɛ ɓo nwɔnɔ a gu yowoɠaa. Lukə 9:38-42 ɓo, ə lɛɛ ka lono kɛ gɛɛmaalən ŋɛi mɛi :
-
Lə ɓə ɲinɛnŋaa da kɛ gɛi nukanŋaa diɛ ?
Gu ho bɔ gu ho gu yee hee ɲinɛnŋaa mu. Dɔ́n ɉɛɓɛ 18:10-12 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Kpaalə ləkɛɛɠaa ɓə ɲinɛnŋaa da tɛɛ la di yee yɛ pɛli nukanŋaa diɛ ə lɛɛ diɛ hwaa di pɔ ? Gbaaləɠaa tii nɛlɛɠaa ɓə da tɛɛ ɓɛi ə́ kaa laa ?
-
Mɛniɠaa kpɔ vilɛnŋaa ɲinɛn mɛni ɓa gɛ mɛni ɓa Zehova aa tɔn dɔɔ gəlee ɓa ə́ wɔ kili ɓa nɛlɛɛi ? Lə mɛni ɓa ə́ kaa moi tii ?
VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Ə́ wɔ kili ɓa ɉalii ŋɛi kɛ Palesa lon ɲee kwana nɛlɛɛ kɛ ma ? Lə mɛni ɓa ə́ kaa moi tii ?
-
Lə ɓə maanɛɛ kɛ Palesa ə gɛ yɛ pɛli gbɔwɔ maakpɛi ɲinɛnŋaa yəi ?
Kilistalea tolooɠaa ə ma kɛ háákələi kilistalea leeleeɠaa da di pulu tɔɔ ɲinɛnŋaa diɛ a lowai kəlee. Gɛlaɠaa 19:19 ; Korɛntə dɔlɔɔ 10:21 ɓo, ə lɛɛ ka lono kɛ gɛɛmaalən ŋɛi mɛi :
-
Hɛnda a kɛ ə́ yəi yii vilɛnŋaa ɲinɛ mɛni ɓa, lə mɛni ɓa mɛni wala-wala ɓaa ə́ maa hɛn dii kələn ?
6. Ə́ yəi a pɛli tɛɛi Sətana da ɲinɛnŋaa diɛ
Ɲinɛnŋaa Kwidiɠi ɓaa Sətana. Kəlaa malaka təlimoɔɠaa di wɛi di Kwidiɠi ɓaa malakaɠaa nwun namu Mikaɛlə yii nwɔnɔ gaa a Zesu laa takpɛli. Mikaɛlə hwaŋa kɛnɛi ? Kulɔ ponoŋa hɛɓɛ 12:7-9 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Gbɛɛ ɓə vaŋa kɛnɛ ? Mikaɛlə da ŋɔ malakaɠaa awala kɛtii Sətana da ŋɔ ɲinɛnŋaa ?
-
Ə́ wɔ kili ɓa maanɛɛ Zesu ŋɔ kalan nea di ɲɔu Sətana da ŋɔ ɲinɛnŋaa diɛ ?
Ə́ yee a pɛli tɛɛi Sətana da ŋɔ ɲinɛnŋaa diɛ. Ɉakə 4:7 ɓo, ə lɛɛ ka lono kɛ gɛɛmaalən ŋɛi mɛi :
-
Ya ə́ kpɔɔ maakpɛ ləi Sətana da ŋɔ ɲinɛnŋaa di yəi ?
NUTAƓAA DA KƐ KƐI MA : “ Nu ya kɛi ɲinɛ vilimə kaa awala kɛtii nu ya kɛi wulu filimə kaa mɛni ɲɔnwɔɔ hwaa a yili maahɔlɔɓo filimə lɔ kaa tii. ”
-
Lə mɛni ɓa giliŋahiɛi tii kaa a kiliŋahiɛ ɲɔnwɔɔ ?
YII GU GALAN
Malakaɠaai di təlimoɔ da gu maakpɔnmaaɓo. Sətana da ŋɔ ɲinɛnŋaa di kaa a Zehova ɲowooɠaa ə lɛɛ da tɛɛ hali mɛni kɔwɔi diɛ nua ɓowo.
Nɛɛ ə́ kili pɔ
-
Zehova ŋɔ malakaɠaa da tɛɛ a kpaalə ləkɛɛ diɛ kpɔnmaa tɛɛ nukanŋaa pɔ yii yaan di gɔlɔnŋaa maakwɛli ?
-
Gbɛɛ ɓə da kɛ ma Sətana ə lɛɛ gbɛɛ nua ɓaa ɲinɛnŋaa ?
-
Lə mɛni ɓa ə́ kaa bɔ ə́i maakwea kpɔ a neelee hali mɛni ɓa ?
MƐNI TAKPƐLIƓAA
Gaa yii nɛi yɛ ma Zesu ɓə ɓaa malakaɠaa nwun namu Mikaɛlə.
“ Gbɛɛ ɓə ɓaa malakaɠaa nwun namu Mikaɛlə ? ” (Hɛɓɛ yii gaa gwɛli yɛli ɓa)
Gaa yii a nɛ yɛ diɛ na Ɓilihi ho lɔ a kiliŋahiɛ ɲɔnwɔɔ yii gu tɛi-tɛi kəlee gu hu, kəlaa gaa a nu leelee.
“ Ɓilihi kaa laa kpɔ a neelee ? ” (Hɛɓɛ yii gaa gwɛli yɛ li ɓa)
Pələi nɛɛnu ta ə kulɔ la ɲinɛnŋaa yee mu, gaa.
“ ə yɛnɛɛ kɛ mɛni nwun gaa ” (La Tour de Garde, 1er juillet 1993)
Gaa pələi Sətana a tɛɛ la hali mɛni kɔwɔi yɛ nukanŋaa ɓowo.
“ Teɲa yii vilɛnŋaa hali mɛni da wulu mɛni diɛ ” (La route qui mène à la vie éternelle, section 5)
