NUPINPLỌN 24
Etẹwẹ Yin Nugbo lọ Gando Angẹli lẹ Go?
Jehovah jlo dọ mí ni plọnnu gando whẹndo etọn he to olọn mẹ go. Whẹndo enẹ bẹ angẹli lẹ hẹn, he nọ yin yiylọdọ “visunnu Jiwheyẹwhe tọn lẹ.” (Jobu 38:7) Etẹwẹ Biblu dọ gando angẹli lẹ go? Nawẹ yé nọ yinuwado gbẹtọvi lẹ ji gbọn? Podọ be angẹli lẹpo wẹ yin apadewhe whẹndo Jiwheyẹwhe tọn ya?
1. Mẹnu wẹ yin angẹli lẹ?
Jehovah ko dá angẹli lẹ whẹpo do dá aigba. Gbigbọ mayinukundomọ lẹ wẹ yé yin to olọn mẹ taidi ewọ. (Heblu lẹ 1:14) Angẹli livi susu lẹ wẹ tin, podọ dopodopo yetọn gbọnvo. (Osọhia 5:11) Yé “nọ hẹn ohó [Jehovah tọn] di bosọ nọ setonuna ogbè etọn.” (Salmu lẹ 103:20) To hohowhenu, Jehovah nọ do angẹli lẹ hlan to whedelẹnu nado dowẹn omẹ etọn lẹ, nọgodona yé bosọ whlẹn yé. To egbehe, angẹli lẹ nọ deanana Klistiani lẹ nado yì mẹhe jlo na plọnnu gando Jiwheyẹwhe go lẹ dè.
2. Mẹnu wẹ Satani po aovi etọn lẹ po yin?
Angẹli delẹ ma yin nugbonọ na Jehovah. Angẹli tintan he ṣiatẹ wẹ wá “yin yiylọdọ Lẹgba podọ Satani, he nọ to aigba fininọ lẹpo klọ.” (Osọhia 12:9) Satani jlo na paṣẹ do mẹdevo lẹ ji, enẹwutu e doyẹklọ gbẹtọvi tintan lẹ, podọ etlẹ yin angẹli devo lẹ to godo mẹ, nado kọnawudopọ hẹ ẹ to atẹṣiṣi etọn mẹ. Angẹli atẹṣitọ enẹlẹ wẹ yin yiylọdọ aovi lẹ. Jehovah ko yàn yé sọn olọn mẹ hlan aigba ji, podọ yé na yin vivasudo.—Hia Osọhia 12:9, 12.
3. Nawẹ Satani po aovi lẹ po nọ tẹnpọn nado hẹn mí buali gbọn?
Satani po aovi lẹ po nọ doyẹklọ mẹsusu gbọn aovinuwiwa kavi afinyọnnuwiwa gblamẹ, yèdọ aṣa ylankan lọ nado nọ wanu dopọ hẹ gbigbọ ylankan lẹ. Di apajlẹ, mẹdelẹ nọ yì dindonanu to sunwhlẹvu-pọntọ lẹ, dọṣẹdọtọ lẹ, numọtọ lẹ po bokọnọ lẹ po dè. Mẹdevo lẹ nọ lẹhlan aliho nukunpedomẹgo tọn he bẹ afinyọnnuwiwa hẹn lẹ nado mọ azọ̀nhẹngbọ. Yè sọ nọ doyẹklọ mẹdelẹ nado yise dọ yé gán dọhona oṣiọ lẹ. Ṣigba, Jehovah na mí avase dọmọ: “Mì ma dona lẹhlan afinyọnnọ lẹ dè, podọ mì ma dona yì mẹhe nọ dọ dọṣẹ lẹ dè.” (Levitiku 19:31) E na mí avase ehe nado basi hihọ́na mí sọn Satani po aovi lẹ po si. Kẹntọ Jiwheyẹwhe tọn lẹ wẹ yé yin, podọ yé nọ jlo na wadanu do mí.
DINDONANU DOGỌ
Plọnnu gando nudagbe he angẹli lẹ nọ wà lẹ, owù he afinyọnnuwiwa bẹhẹn lẹ, gọna lehe mí gán basi hihọ́na míde sọn Satani po aovi lẹ po si do go.
4. Angẹli lẹ nọ gọalọnamẹ nado plọnnu gando Jehovah go
Angẹli Jiwheyẹwhe tọn lẹ ma nọ dọyẹwheho na mẹlẹ tlọlọ. Kakatimọ, yé gán deanana sinsẹ̀n-basitọ Jiwheyẹwhe tọn lẹ yì mẹhe jlo na plọnnu gando ewọ go lẹ dè. Hia Osọhia 14:6, 7, enẹgodo dọhodo kanbiọ ehelẹ ji:
-
Naegbọn mí do hudo alọgọ angẹli lẹ tọn nado dọyẹwheho?
-
Be e ma na tuli we nado mọdọ angẹli lẹ gán gọalọna we nado mọ mẹhe do hudo nado sèhó gando Biblu go lẹ ya? Etẹwutu?
5. Gbẹ́ afinyọnnuwiwa dai
Kẹntọ Jehovah tọn wẹ Satani po aovi lẹ po yin. Yé sọ yin kẹntọ mílọsu tọn ga. Hia Luku 9:38-42, enẹgodo dọhodo kanbiọ ehe ji:
-
Nawẹ aovi lẹ nọ yinuwa hẹ mẹlẹ gbọn?
Mí ma nọ jlo na natẹn aovi lẹ to gbẹzan mítọn mẹ. Hia Deutelonomi 18:10-12, enẹgodo dọhodo kanbiọ ehelẹ ji:
-
Aliho tẹlẹ mẹ wẹ aovi lẹ nọ tẹnpọn nado doyẹklọ mí bo yinuwa dopọ hẹ mí te? Aṣa aovinuwiwa tọn tẹlẹ wẹ gbayipe to fie a nọ nọ̀?
-
Be a lẹndọ e sọgbe dọ Jehovah gbẹ́ dọ mí ni ma doalọ to aṣa afinyọnnuwiwa tọn lẹ mẹ blo ya? Etẹwutu?
Hò VIDEO lọ, enẹgodo dọhodo kanbiọ he bọdego lẹ ji.
-
Be a lẹndọ dèfinfẹ̀n he Pẹdetin sin do alọkọ na viyọnnu etọn ylan ya? Etẹwutu?
-
Etẹwẹ Pẹdetin dona wà nado yin hihọ́- basina sọta aovi lẹ?
Sọn dowhenu gbọ́n wẹ Klistiani nugbo lẹ nọ diọnukunsọ aovi lẹ. Hia Owalọ lẹ 19:19 gọna 1 Kọlintinu lẹ 10:21, bo dọhodo kanbiọ ehe ji:
-
Naegbọn e do yin nujọnu dọ a ni mẹ̀ nutindo towe depope he tindo kanṣiṣa hẹ afinyọnnuwiwa?
6. A gán duto Satani po aovi etọn lẹ po ji
Satani wẹ yin ogán aovi lẹ tọn. Ṣigba, Mikaẹli angẹligán lọ, he sọ nọ yin yiylọdọ Jesu wẹ nọ deanana angẹli nugbonọ lẹ. Obá tẹ mẹ wẹ Mikaẹli dohuhlọn jẹ? Hia Osọhia 12:7-9, enẹgodo dọhodo kanbiọ ehelẹ ji:
-
Mẹnu wẹ dohuhlọn hugan? Mikaẹli po angẹli etọn lẹ po wẹ ya, kavi Satani po aovi etọn lẹ po?
-
Be a lẹndọ hodotọ Jesu tọn lẹ dona dibuna Satani po aovi etọn lẹ po wẹ ya?
A gán duto avùnhiho sọta Satani po aovi etọn lẹ po ji. Hia Jakọbu 4:7, enẹgodo dọhodo kanbiọ ehe ji:
-
Nawẹ a gán basi hihọ́na dewe nado glo Satani po aovi lẹ po gbọn?
MẸDELẸ NỌ DỌ DỌ: “Nude ma ylan to e mẹ nado nọ daihun he bẹ afinyọnnuwiwa hẹn lẹ kavi nado pọ́n video he bẹ onú mọnkọ hẹn lẹ. Ayidedai poun wẹ.”
-
Naegbọn linlẹn mọnkọtọn tintindo do yin owùnu?
BLADOPỌ
Angẹli nugbonọ lẹ nọ gọalọna mí. Kẹntọ Jehovah tọn lẹ wẹ Satani po aovi etọn lẹ po yin, podọ yé nọ yí afinyọnnuwiwa zan nado hẹn gbẹtọ lẹ danbú.
Dogbapọn
-
Nawẹ angẹli Jehovah tọn lẹ to alọgọna mẹlẹ nado plọnnu gando ewọ go gbọn?
-
Mẹnu wẹ Satani po aovi etọn lẹ po yin?
-
Naegbọn a do jlo na nọla petepete na afinyọnnuwiwa?
PỌ́N NUDỌNAMẸ DEVO LẸ
Gbadopọnna kunnudenu delẹ he dohia dọ Jesu wẹ yin Mikaẹli angẹligán lọ.
Pọ́n kunnudenu delẹ he dohia dọ Lẹgba ma yin linlẹn kavi jijọ ylankan de he to ohò mítọn mẹ poun.
Pọ́n lehe nawe de wagbọn do yí ede pete sọn nuyiwadomẹji aovi lẹ tọn si do.
“E Mọ Lẹndai de to Gbẹ̀mẹ” (Atọ̀họ̀-Nuhihọ́ lọ Tọn, 1er mars 1994 tọn)
Pọ́n lehe Satani nọ yí afinyọnnuwiwa do doyẹklọ gbẹtọ lẹ do.
“Nugbo lọ Gando Bojijlẹ, Owọ́n, po Azé po Go” (Aliho He Yì Ogbẹ̀ Madopodo mẹ Lọ, apá 5tọ)
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
