KUKWE JA TÖTIKARA 24
¿Biblia tä dre niere angeletre yebätä?
Jehová mräkätre tä kä kwinbiti rabadre gare mäi yei niara tö. Mräkätre ye ngätäite angeletre tä, Ngöbö monsoi nieta ietre arato (Job 38:7). ¿Biblia tä dre driere angeletre yebätä? ¿Tä dre dre nuainne nitrebätä? ¿Angeletre jökrä ye Ngöbö mräkätre?
1. ¿Nire abokän angeletre?
Jehová jämi kä tibien sribere känenkri angeletre sribebare kwe. Jehová ye üaire aisete angeletre ye niara erere tua ñan raba aune tätre nüne kä kwinbiti (Hebreos 1:14). Angeletre ye kwati krubäte aune jene jene (Apocalipsis 5:11). Jehová tä dre niere ye niaratre tä mike täte aune nuainne (Salmo 103:20). Kirabe, Jehovakwe angeletre juani kukwe mike gare juta kwe ie, dimike aune mike kwäre. Nengwane, angeletre tä ni kristiano jie ngwen ne kwe nire tö Ngöbö mikai gare jai ye kwandre ietre.
2. ¿Nire abokän Satana aune chokalitre?
Angeletre ruäre ñaka ja ngwani metre jankunu Jehovai. Kena nikwitani Ngöbö rüere ye “kädekata Diablu amne Satana tä näin ni ngökö kwati kä jökräbti temen” (Apocalipsis 12:9). Satana tö namani gobrandi, aisete nitre kena ye töi mikani kwe ja mike jakri. Ye bitikäre, angeletre töi mikani kwe ja mike niarakri arato. Angeletre ye kädekata chokalitre. Nämäne kä kwinbiti akwa Jehovakwe kitani kä tibienbätä aune gaite (mäkwe ñäkä Apocalipsis 12:9, 12 yebätä).
3. ¿Satana aune chokalitre ye tä ja di ngwen ni ngökakäre ño?
Satana aune chokalitre tä nitre kwati ngökö kukwe ja mäkä chokabe aune kukwe mada mikata täte yebiti. Ye tare krubäte ñan ñobätä aune tä nitre mike ja mäke üai käme yebe. Ñodre, nitre ruäre tä niken nitre kukwe mikaka gare horóscopo, astrólogo, sukia, vidente, curanderos aune brujos yekänti. Nitre ruäre abokän tä kräkä diamana jakrä sukia ie. Aune ni raba blite ni ngwakare yebe nieta yebiti ni ngökata arato. Akwa Jehová tä niere: mun ñaka ja di kärä nitre medium aune sukia ie (Levítico 19:31). Satana aune chokalitre ye Jehová rüe aune tö ni nuaindi tare aisete Jehová tö ni kriemikai niaratre yebätä.
JA TÖTIKE BÄRI NGUSETA
Angeletre tä kukwe kwin nuainne aune chokalitre tä kukwe tare mike bare nibätä yebätä ani blite. Arato, ni raba ja kriemike ño Satana aune chokalitre yebätä ye ani mike gare jai.
4. Angeletre tä nitre dimike Jehová mike gare jai
Angeletre Ngöbökwe ñaka tä kukwe driere nitre ie. Akwa tä nitre Ngöbö mikaka täte jie ngwen ne kwe nitre tö Ngöbö mikai gare jai ye kwandre ietre. Ñäkädre Apocalipsis 14:6, 7 yebätä aune kukwe ne kädriedre jabe:
-
¿Angeletre ni dimikadre kukwe driekänti ye ñobätä nita ribere?
-
Nitre tö kukwe Bibliabätä mikai gare jai känti angeletre raba mä jie ngwen, ¿ye tä mä dimike? ¿Ñobätä?
5. Ja mäkä chokabe ye ñaka ka ngäbiti jire
Satana aune chokalitre ye Jehová rüe aune ni rüe arato. Ñäkädre Lucas 9:38-42 yebätä aune kukwe ne kädriedre jabe:
-
¿Chokalitre ye tä dre nuainne nitrebätä?
Nikwe ñaka ja mritadre kukwe chokakwe yebe aune ñaka ja töi mika manandre kukwe nuainne ie. Ñäkädre Deuteronomio 18:10-12 yebätä aune kukwe ne kädriedre jabe:
-
¿Drebiti chokalitre tö blitai nibe aune ni gobrandi? ¿Kukwe ja mäkä chokabe ye meden nuainta mä käite?
-
Kukwe kite chokakri ye jökrä Ngöböta ñäkäire, ¿ye kwin ruin mäi? ¿Ñobätä?
VIDEO mikadre ñärärä, biti kukwe ne kädriedre jabe:
-
¿Jondron nämäne mäkäni ngäbäkre Palesakwe kisebätä ye raba kukwe tare mike barebätä? ¿Ñobätä?
-
¿Palesa dre nuainbare ja kriemikakäre chokalitre yebätä?
Ni kristiano metre ye käre tä ja mike chokalitre rüere. Ñäkädre Hechos 19:19 aune 1 Corintios 10:21 yebätä aune kukwe ne kädriedre jabe:
-
Jondron jökrä ja kriemikakäre aune ja mäkäkäre chokabe ye mäkwe juandre ngwarbe, ¿ye ñobätä ütiäte?
6. Satana aune chokalitre ganainne
Satana ye tä chokalitre gobraine. Akwa arcángel Miguel tä angeletre ja ngwanka metre ye jie ngwen, ye abokän Jesús ara. ¿Miguel ye die nuäi? Ñäkädre Apocalipsis 12:7-9 yebätä aune kukwe ne kädriedre jabe:
-
¿Nire bäri dite: Miguel aune angeletre o Satana aune chokalitre?
-
¿Nitre ja tötikaka Jesukwe rabadre Satana aune chokalitre ye jürä ngwen jabätä?
Mä raba Satana aune chokalitre ganainne. Ñäkädre Santiago 4:7 yebätä aune kukwe ne kädriedre jabe:
-
¿Mä raba ja kriemike ño Satana aune chokalitre yebätä?
NITRE RUÄRE TÄ KUKWE NE NIERE: “Jadaka känti kukwe chokakwe nuainta, película, magia ye ñaka käme. Ye jerekäbe jadakata”.
-
¿Töbikadre kore ye ñobätä raba kukwe tare mike bare?
¿DRE NIBI GARE MÄI?
Angeletre ja ngwanka metre ye tä ni dimike. Akwa, Satana aune chokalitre ye Jehová rüe aune ja mäkä chokabe yebiti tä nitre ngökö.
Ngwankäreta törö
-
¿Angeletre ja ngwanka metre tä dre nuainne ne kwe Jehová rabadre gare nitre ie?
-
¿Nire abokän Satana aune chokalitre?
-
¿Kukwe keta kabre nuainta ja mäkäkäre chokabe ye ñobätä mäkwe ñaka nuaindre?
KUKWE MIKE GARE BÄRI JAI
Ñobätä Jesús arcángel Miguel ara ye mike gare jai.
Kukwe ruäre tä mike gare diablu ye ñaka kukwe käme bämikaka jerekäbe ye mike gare jai.
Ño meri iti namani kwäre kukwe chokakwe yebätä ye mike gare jai.
“Ñokäre tita nüne namani gare tie” (Ni Mikaka Mokre, 1 julio 1993)
Kukwe ja mäkäkäre chokabe yebiti Satana tä ni ngökö ño ye mike gare jai.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
