EISOMO LYA 24
Abamalaika Nibahai Kandi Nibakora Milimoki?
Yehova nayenda twege ebikwete eka yawenene ey’omwiguru. Eka egyo netamu abamalaika abaikwetwa “abana . . . ba Katonda.” (Yobu 38:7) Ebibulia negambaki ekikwete aha bamalaika? Isi, nibabasa kujuna anga kushasa abantu? Isi, abamalaika bona kichweka ky’eka ya Katonda?
1. Abamalaika nibahai?
Yehova akatonda abamalaika atakatonzire nsi. Abamalaika nibatura omwiguru titwina kubasa kubabona nk’okwo tutali kubona Yehova. (Abaheburania 1:14) Aliho amamilioni ga abamalaika na buli omoi aina engeshoze ezilikwazo. (Okushurulirwa 5:11) Abamalaika ‘nibagobesheleza ekigambo kya Yehova, n’okuhuliliza eirakalye.’ (Ezaburi 103:20) Eirai, Yehova akatuma abamalaika kutwara amakuru anga kujuna n’okulokora abantube. Kany’aka, abamalaika nibebembera Abakirisito kugya omu bantu abalikwenda kwega ebikwete ahali Katonda.
2. Sitani na amasitanige nibahai?
Abamalaika abandi tibagendeleire kuba besigwa ahali Yehova. Omumalaika ayashengire ali wambere “niwe Ibilisi mara Sitani, ayabeihire ensi akagimaraho.” (Okushurulirwa 12:9) Sitani akegomba kugelera ebitondwa ebindi, kityo akohya abantu ba mbere bashenge Yehova na anzindo yayohya abamalaika abandi beme nawe ombushengi. Abamalaika abo abashengi nibwetwa amasitani. Yehova akaramura babingwe omwiguru baije omu nsi, nabo nibaija kusilikibwa.—Shoma Okushurulirwa 12:9, 12.
3. Ni mihandaki eyo Sitani n’amasitanige balikukozesa kuhabisa abantu?
Sitani n’amasitanige nibahabisa abantu bangi kuraba omu mimanyilire mibi eyokulengesa kufumora n’amasitani. Obulebero nibwobu, abantu abandi nibagya kuraguza babase kumanya amakuru, abandi nibagya abachwezi, abandi nibagya omu bafumu. N’abandi nibahiga emibazi elikugendanwa n’amasitani. Kandi, abantu nibabeihywa besige nk’okwo nibabasa kufumora n’abantu abafire. Kyonkai Yehova natutatira ati: “Mutaligya aha batungamirwe bazimu, anga (aha) barogi.” (Abalevita 19:31) Natutatira atyo abase kutulinda ahali Sitani n’amasitanige. Abo babisha ba Katonda kityo nibenda kutushasa.
MANYURUZA
Yega omanye ebili ebirungi ebili kukorwa abamalaika, orushengo rw’okufumora n’amasitani, n’okwo twakubasa kwelinda Sitani na amasitanige.
4. Abamalaika nibajuna abantu bege ebikwete ahali Yehova
Abamalaika ba Katonda tibali kurangilira bantu limoi limoi. Shana nibabasa kwebembera abantu ba Katonda barangilire abantu abalikwenda kwega ebimukweteho. Shoma Okushurulirwa 14:6, 7, mushube mufumoreho ebibazo ebi:
-
Kubaki nitwetaga obujuni bw’abamalaika orwo tulikurangilira?
-
Isi, watekwamu omwoyo orwo wamanya nk’okwo abamalaika nibabasa kukwebembera orangilire abantu abalikwetaga kumanya amakuru g’Ebibulia? Isi kubaki?
5. Orayelinda otakufumora na masitani
Sitani n’amasitanige babisha ba Yehova. Kandi babisha baitu. Shoma Luka 9:38-42, mushube mufumoreho ekibazo eki:
-
Amasitani nigakolera gatai abantu?
Titulikwenda kwema hamoi n’amasitani omu ngeli yona yona. Shoma Obwijukiro bw’Ebiragiro 18:10-12, mushube mufumoreho ebibazo ebi:
-
Amasitani nigakozesa mihandaki kulengesa kutwohya n’okufumora naichwe? Omu kichweka eky’olikuturamu, abantu nibakoza mihandaki kufumora n’amasitani?
-
Yehova natugambira tutalengesa nakati kufumora n’amasitani. Isi, notekeleza ekintu ekyo nikigasha? Isi kubaki?
Yolekya EVIDEO, mushube mufumoreho ebibazo ebili kuhonderaho.
-
Isi, notekeleza eirizi elyo muhara wa Palesa yajwekirwe omukono linamu akabi? Isi kubaki?
-
Isi, notekeleza Palesa aketaga kukoraki abase kwelinda amasitani?
Ebiro byona Abakirisito b’amazima basimbalire (wamewapinga) amasitani. Shoma Ebikorwa 19:19 na 1 Abakorinto 10:21, mushube mufumoreho ekibazo eki:
-
Kubaki noyetagwa kusilikya buli kintu kyona kyona ekikweteho amasitani?
6. Singa endashana za Sitani n’amasitanige
Sitani niwe alikugelera amasitani. Kyonkai alikwebembera abamalaika abesigwa nayetwa Mikaeli, elyo ibara elindi elya Yesu. Mikaeli aina amani agali kwigana gatai? Shoma Okushurulirwa 12:7-9, mushube mufumoreho ebibazo ebi:
-
Isi, aina amani gangi n’ohai? Ni Mikaeli n’abamalaikabe anga ni Sitani n’amasitanige?
-
Isi, notekeleza abegesibwa ba Yesu nibetaga kutina Sitani n’amasitanige?
Nobasa kusinga endashana za Sitani n’amasitanige. Shoma Yakobo 4:7, mushube mufumoreho ekibazo eki:
-
Wakubasa kwelinda otai Sitani n’amasitanige?
ABANTU ABANDI NIBAGAMBA BATI: “Tikibi kuzana emizano ey’evideo anga kuleba esinema ezikweteho amasitani. Egyo ngeli y’okweshemeleza bushai.”
-
Kubaki ruli rushengo kutekeleza otyo?
OMUBIGUFI
Abamalaika abesigwa nibatujuna. Sitani na amasitanige babisha ba Yehova, kandi nibakozesa emimanyilire ey’okufumora n’amasitani kuhabisa abantu.
Isi ebi wakubihorora otai?
-
Abamalaika ba Yehova nibajuna batai abantu bege ebimukweteho?
-
Sitani n’amasitanige ni bahai?
-
Kubaki nitwetagwa kwelinda emimanyilire y’okufumora n’amasitani?
ENJUZA MUNO
Enjuza omanye ebintu ebili kwolekya nk’okwo Yesu niwe Mikaeli, olinya omumalaika mukuru.
“Olinya Mikaeli Omumalaika Mukuru N’ohai?” (Emakala eli omutandao)
Enjuza omanye ebintu ebili kwolekya nk’okwo Ibilisi tibufu obuli omuli ichwe, shana kitondwa ekili kwo kwo kwo.
“Isi, Ibilisi Kitondwa Ekili Kwo Kwo Kwo?” (Emakala eli omutandao)
Leba omukazi ayabaire naitwakubi amasitani okwo yagechungwireho.
“Emikalireye Ekagira Omugendelero” (Mnara wa Mlinzi, Omwezi gwa Mushanju 1, 1993)
Yega omanye okwo Sitani alikukozesa emimanyilire y’okufumora na amasitani abase kubeiya abantu.
