LESENI 24
Aneru be Daidia Bona Edia Gaukara be Dahaka?
Iehova ia ura ena famili guba dekenai ita dibaia. Unai famili lalonai aneru idia noho danu, idia be “Dirava ena natudia.” (Iobu 38:7, futnout) Baibel ese aneru be edena bamona ia herevalaidia? Aneru be dahaka idia karaia? Bona aneru ibounai be Dirava ena famili, a?
1. Aneru be daidia?
Iehova ese tanobada ia do karaia lasi neganai, aneru ia karadia guna. Dirava hegeregerena, idia danu be guba dekenai idia noho lauma taudia. (Heberu 1:14) Aneru milioni momo idia noho bona idia ta ta edia kara be idauidau. (Apokalupo 5:11) “Idia be [Iehova ena] hereva hegeregerena idia kara bona ena gadona idia kamonai.” (Salamo 103:20) Idaunegai, Iehova ese nega haida aneru ia siaia ena hereva idia halasia bona taunimanima idia durua bona hamauria. Hari, aneru ese Keristani taudia idia hakaua Dirava idia ura dibaia taudia idia durua totona.
2. Satani bona ena demoni be daidia?
Aneru haida be Iehova idia badinaia lasi. Gwau-edeede aneru ginigunana ena ladana be “Diabolo bona Satani, ia be tanobada ibounai ia hakaua kerere noho.” (Apokalupo 12:9) Satani ia ura haida do ia lohiaia, unai dainai taunimanima ginigunadia ia hakaua kerere bona gabeai aneru ma haida danu ese iena gwau-edeede karana idia durua. Unai gwau-edeede aneru be idia gwauraidia demoni. Iehova ese guba amo idia ia negea diho tanobada dekenai bona idia do ia hadikaia ore.—Apokalupo 12:9, 12 duahia.
3. Edena dala ai Satani bona demoni ese ita idia hakaua kerere?
Satani bona demoni ese meamea karadia idia gaukaralaia taunimanima momo idia koia totona, unai kara be dika badina ia be lauma dikadia hereva henia karana. Hegeregere, haida ese hisiu stadilaia taudia, vaira nega gwauraia taudia, bona babalau taudia idia hereva henia. Ma haida be gorere hanamoa totona unai bamona taudia dekenai idia lao. Idia ese taunimanima idia koia idia gwau mase taudia idia hereva henia diba. To Iehova ia gwau: “Namo lasi mase taudia edia lauma idia hereva henia taudia dekenai umui lao, bona namo lasi vaira nega gwauraia taudia edia heduru umui tahua.” (Levitiko 19:31) Unai hereva Ia gwauraia badina ia ura Satani bona ena demoni amo ita ia gimaia. Idia be Dirava ese ia inai henia taudia, bona idia ura ita idia hadikaia.
DIBA MA HAIDA ABIA
Aneru ese idia karaia gau namodia oi dibaia, lauma dikadia ida herevahereva karana ena dika bona Satani bona ena demoni amo sibona do ita gimaia daladia oi dibaia.
4. Aneru ese taunimanima idia durua Iehova idia dibaia totona
Dirava ena aneru ese maoromaoro taunimanima idia haroro henia lasi. To, aneru ese Dirava ena hesiai taudia idia hakaua lao ia idia ura dibaia taudia durua totona. Apokalupo 14:6, 7 duahia, bena inai henanadai herevalaia:
-
Dahaka dainai haroro totona aneru edia heduru ita abia be namo?
-
Aneru ese Baibel ena hereva idia ura kamonai taudia dekenai oi idia hakaua lao karana oi lalopararalaia neganai, unai ese oi ia hagoadaia, a? Dahaka dainai?
5. Lauma dikadia dadaraia
Iehova ese Satani bona ena demoni ia inai henidia. Bona ita ese ita inai henidia danu. Luka 9:38-42 duahia, bena inai henanadai herevalaia:
-
Edena dala ai demoni ese taunimanima idia kara henia?
Ita ura lasi iseda mauri lalonai demoni ita abia dae. Deuteronomi 18:10-12 duahia, bena inai henanadai herevalaia:
-
Edena dala ma haida ai demoni ese ita idia koia toho bona ita ida idia herevahereva? Emu gabu ai edena bamona karadia idia karaia?
-
Oi laloa Iehova ese lauma dikadia ida herevahereva karana ia taravatua be maoro, a? Dahaka dainai?
VIDIO itaia, bona henanadai herevalaia.
-
Oi laloa Palesa ese ena natuna kekeni ena imana ai ia kwatua varona be mai ena dika, a? Dahaka dainai?
-
Palesa be dahaka ia karaia be namo demoni amo sibona ia gimaia totona?
Keristani korikoridia ese nega ibounai demoni idia dadaraia. Kara 19:19 bona 1 Korinto 10:21 duahia, bena inai henanadai herevalaia:
-
Dahaka dainai lauma dikadia idia veria mai gaudia ita hadikaia ore be mai anina bada?
6. Satani bona ena demoni tuari henia karana dekenai oi kwalimu
Satani be demoni edia lohia tauna. To aneru badana Mikaela, Iesu unai, ese kamonai anerudia ia gunalaia noho. Mikaela ena siahu ena bada be edena bamona? Apokalupo 12:7-9 duahia, bena inai henanadai herevalaia:
-
Daika ena siahu be bada? Mikaela bona ena aneru eiava Satani bona ena demoni?
-
Oi laloa Iesu murinai idia raka taudia ese Satani bona ena demoni do idia gari henia, a?
Satani bona ena demoni oi halusia diba. Iamesi 4:7 duahia, bena inai henanadai herevalaia:
-
Edena dala ai Satani bona ena demoni amo sibona oi gimaia diba?
HAIDA IDIA GWAU: “Meamea karadia idia hahedinaraia gadara eiava muvi itaia karana be kerere lasi. Unai be moale karana sibona.”
-
Dahaka dainai unai bamona lalohadai be mai ena dika?
POINT BADANA
Dirava idia badinaia anerudia ese ita idia durua. Iehova ese Satani bona ena demoni ia inai henidia, badina idia ese meamea karadia idia gaukaralaia taunimanima idia koia totona.
Riviu
-
Edena dala ai Iehova ena aneru ese taunimanima idia durua ia idia dibaia totona?
-
Satani bona ena demoni be daidia?
-
Dahaka dainai lauma dikadia ida herevahereva karana oi ura dadaraia vaitani?
REFERENS ITAIA
Hamomokania gaudia amo do oi diba Iesu be aneru badana Mikaela.
Hamomokania gaudia amo do oi diba Diabolo be lauma tauna korikorina ta.
Hahine ta ese demoni edia kara idauidau ia dadaraia dalana itaia.
“Mauri Ena Anina Namona Ia Davaria” (Gima Kohorona, July 1, 1993)
Satani ese taunimanima ia koia daladia dibaia.
“Meamea Bona Vada Karana be Dahaka?” (Mauri Hanaihanai Ia Lao Henia Dalana, kahana 5)
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
