AJUMTALÁB 24
¿Jantʼoj tu ólchal an Biblia tin kwéntaj an ángeles?
A Jehová in léʼ ki éxlanchij in yanél axi kʼwajat ti éb. Ti éb waʼats i ángeles axi an Biblia in ulal abal pel «in tsakámil a Dios» (Job 38:7). ¿Jantʼoj tu exóbchal an Biblia tin kwéntaj an ángeles? ¿Jantʼoj in tʼajál an ángeles abal kʼal wawáʼ? ¿Walám patal an ángeles in tʼójonchal a Dios?
1. ¿Jitaʼchik játs an ángeles?
A Jehová in tsʼejkaʼ an ángeles okʼxidh kin tsʼejkaʼ an Tsabál. Jajáʼchik yab tejwaʼ, pel i espíritus ejtíl a Jehová, ani u kʼwajílchik ti éb (Hebreos 1:14). Ti éb waʼats millones i ángeles ani patal lej junits in ey (Apocalipsis 5:11). Jajáʼchik «in belkál a Jehová ani in tʼajálchik jawaʼ u uchnal» (Salmo 103:20). Ti biyál, a Jehová in eyendhaʼ i ángeles abal kin ólnaʼ i kaw abal kin tólmiy in bichówil ani kin kʼaniy. Xowéʼ ta kʼicháj, in aykolil a Jesús u tolmiyáb kʼal an ángeles abal kin elaʼ an atiklábchik axi in léʼ ka utey kʼal a Dios.
2. ¿Jitaʼ játs a Satanás ani an demonios?
Talchik i ángeles in jekʼomnaʼ a Jehová. Axi kʼaʼál in jekʼomnaʼ a Jehová pel axi «[u exláb ti Tenekláb ani Satanás, jajáʼ] xeʼets in léʼ kin kʼambiy tin patál an inikchik» (Apocalipsis 12:9). A Satanás in léʼak ti ábatnom, jaxtám in tʼajaʼ abal a Adán ani a Eva kin jekʼomnaʼ a Dios. Ani talbél in tʼajaʼ abal kʼeʼat i ángeles jayej kin jekʼomnaʼ a Dios. Axéʼ xi ángeles axi jekʼombéj u bijiyáb ti demonios. A Jehová yabáts in jilaʼ abal ka kʼwajiychik ti éb, jaxtám in petʼnaʼ ti Tsabál ani lej weʼits neʼets kin talabédhaʼchik (ka ajiy Apocalipsis 12:9, 12).
3. ¿Jantʼoj in tʼajál a Satanás ani an demonios abal tu ku kʼambiy?
A Satanás ani an demonios in kʼambiyal an atiklábchik, in tʼajálchik abal kʼal an atikláb ka leʼnáj ka tʼilmayat. Yan i atikláb u kʼalel kin tsuʼuw an dhítʼom, an tʼajchix, an dhíman, o an tének ilálix. Kʼeʼatchik in aliyal i ilál axi xaludh kʼal an dhimantaláb. Ani waʼats axi in belál abal i éjtowal ki tʼilmay an tsemélomchik. a A Jehová tu uchál: «Yab ka aliychik jitaʼ in tʼilmayal an tsemélom nibal an dhítʼomchik» (Levítico 19:31). A Jehová tu uchál axéʼ kom yab in léʼ abal a Satanás ani an demonios tu ku odhnaʼ.
ABAL KA EXÓBNAʼ MÁS
Ka exóbnaʼ jantʼoj in tʼajál an ángeles abal tu ku tólmiy ani jaleʼ ti lej kʼakʼadh ki exaʼ ki tʼilmay an kidháb. Jayej, neʼets ki exóbnaʼ jantʼoj i éjtowal ki tʼajaʼ abal yab tu ku odhnaʼ a Satanás ani an demonios.
4. An ángeles in tólmiyal an atiklábchik abal kin exlaʼ tin kwéntaj a Jehová
An ángeles yab u ólnom. Pero in tólmiyal in aykolil a Jesús abal kin elaʼ an atiklábchik axi in léʼ kin exlaʼ tin kwéntaj a Jehová. Ka ajiychik Apocalipsis 14:6, 7 ani ka tsálpaychik kal axéʼ:
-
¿Jaleʼ i yéjenchal abal an ángeles tu ku tólmiy ban olnomtaláb?
-
¿Jantʼoj a atsʼál tam ka exlaʼ abal an ángeles tu tólmiyal abal ki elaʼ an atiklábchik axi in léʼ kin exóbnaʼ tin kwéntaj an Biblia?
5. Yab jaykʼiʼ ka exaʼ ka tʼilmay an Tenekláb
A Satanás ani an demonios in kʼwiyál a Jehová, ani jayej tu kʼwiyál wawáʼ. Ka ajiychik Lucas 9:38-42 ani ka tsálpaychik kʼal axéʼ:
-
¿Jantʼoj in tʼajál an demonios kʼal an atiklábchik?
Wawáʼ yab i léʼ abal an demonios tu ku utenchij nibal tu ku abatnaʼ. Ka ajiychik Deuteronomio 18:10-12 ani ka tsálpaychik kʼal axéʼ:
-
¿Jantʼiniʼ in exál an demonios tu ku abatnaʼ ani tu ku tʼilmay? ¿Jantʼoj a tsuʼumal in tʼajál an atiklábchik axi ta kwenchálil abal kin exlaʼ jantʼoj neʼets kin watʼaʼ tin ejatal?
-
¿Walám tékedhits jawaʼ tu konchal a Jehová abal yab ki utenchij an Tenekláb? ¿Jaleʼ?
Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Walám chubax kʼakʼadh kin watʼaʼ jantʼoj in tʼeleʼil a Palesa kʼal jawaʼ in kwaʼalak tin kʼubak? ¿Jaleʼ?
-
¿Jantʼoj in tʼajaʼ a Palesa abal yabáts ka jikʼedháj kʼal an demonios?
In aykolil a Cristo etsʼey in tomolnámalchik an demonios. Ka ajiychik Hechos 19:19 ani 1 Corintios 10:21, ani ka tsálpaychik kʼal axéʼ:
-
¿Jaleʼ ti lej exbadh ki petʼnaʼ patal jawaʼ in éjtowal kin utuw an Tenekláb?
6. Ka ataʼ a Satanás ani an demonios
An demonios u okʼnáb kʼal a Satanás. Pero an ángeles axi putudh kʼal a Jehová, u okʼnáb kʼal a Jesús, axi jayej u bijiyáb arcángel Miguel. ¿Jay in tsap ani in éy in kwaʼal a Miguel? Ka ajiychik Apocalipsis 12:7-9 ani ka tsálpaychik kʼal axéʼ:
-
¿Jitaʼ in kwaʼal más i tsapláb: a Miguel ani an ángeles kʼal axi tu tolmiyáb, o a Satanás ani an demonios?
-
¿A tsálpayal abal in aykolil a Jesús in tomnál kin tsʼejnaʼ a Satanás ani an demonios?
Tatáʼ a éjtowal ka ataʼ a Satanás ani an demonios. Ka ajiychik Santiago 4:7 ani ka tsálpaychik kʼal axéʼ:
-
¿Jantʼoj a éjtowal ka tʼajaʼ abal a Satanás ani in demonios yab ti odhnaʼ?
JAWAʼ TALCHIK IN TSÁLPAYAL: «Yab kidháb ki eyendhaʼ i juegos o ki tsuʼuw i películas axi in kwaʼal i magia ani u kaw tin kwéntaj an Tenekláb. Expidh pel abal ku kʼijidhbéj».
-
¿Jaleʼ ti lej kʼakʼadh ki tsalpay antsanáʼ?
JAWAʼ I EXOBNÁMAL
An ángeles axi kʼwajat kʼal a Jehová tu tólmiyal. A Satanás ani an demonios in kʼwiyálchik a Jehová, jaxtám in exál kin tʼilmay an atiklábchik abal kin kʼambiy.
Ki tʼilaʼ jawaʼ i exóbnaʼ
-
¿Jantʼoj in tajál an ángeles abal an atiklábchik kin exlaʼ a Jehová?
-
¿Jitaʼchik játs a Satanás ani an demonios?
-
¿Jaleʼ ti yab in tomnál ka exaʼ ka tʼilmay an demonios?
KA EXÓBNAʼ JANTʼOJ ÍT
Ka exlaʼ jaleʼ i belál abal a Jesús pel an arcángel Miguel.
Ka ajiy jaleʼ ti belál abal an Diablo chubax waʼats.
«¿Chubax waʼats jun axi u bijiyáb ti Diablo?» (Artículo axi ti jw.org)
Ka ajiy jantʼoj in tʼajaʼ jun i mimláb abal yabáts ka odhnáj kʼal an demonios.
«In exlaʼ jantʼiniʼ kin eyendhaʼ in ejatal» (La Atalaya, 1 de julio de 1993)
Ka exlaʼ jantʼoj in tʼajál a Satanás abal kin kʼambiy an atiklábchik ani kin exaʼ kin tʼilmay.
a Ban ajumtaláb 29 neʼets ki exóbnaʼ abal an tsemélomchik yabáts in atsʼál jantʼoj nibal u tsalpax.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
