LESSON 24

Angels—Who Dem?

PLAY

Angels—Who Dem?

Jehovah like us fo learn about his ohana up in da sky. Dat ohana include angels, “da ones dat live wit God.” (Job 1:6) Wat da Bible tell about da angels? How wat dey do help peopo? An all da angels, dey part of God’s ohana o wat?

1. Who da angels?

Jehovah wen make da angels befoa he wen make da earth. Jalike him, dey da good spirits we no can see who live in heaven. (Fo Da Hebrew Peopo 1:14) Get uku million angels, an each one is diffren. (Jesus Show 5:11) Dey “lissen Him, an go do eryting [he] tell [dem] fo do.” (Songs Fo God 103:20) Way back, long time befoa time, sometimes Jehovah wen send angels fo give messages an fo help an save his peopo. Today, angels help Christians fo find da peopo who like learn about God.

2. Who Satan an da demons, da bad kine spirits?

Some angels neva stay tight wit Jehovah. Da firs angel who wen go agains God, “dey call um da Devil an Satan, who bulai all da peopo inside da world.” (Jesus Show 12:9) Satan wanted fo be in charge ova oddas, so he wen get Adam an Eve an layta even odda angels fo lissen him an go agains Jehovah. Da angels who wen go agains God, dey call um demons. Jehovah wen throw dem out of da sky, down on top da earth, an dey goin get wipe out foeva.—Read um Jesus Show 12:9, 12.

3. How Satan an da demons try bulai us?

Satan an da demons bulai plenny peopo wit spirit kine stuff. Dass wen somebody try talk story wit spirits an az pilau fo do dat. Some peopo try ask guys who know plenny about da stars, fortune-tella guys, da guys who try talk to da mahke peopo, an guys who put kahuna on top peopo fo help dem. Oddas try use spirit kine stuff fo try hemo da sickness dey get. Some peopo believe dey can talk story wit da mahke peopo. But Jehovah tell us fo watch out: “No go look fo da wahines dat talk to da mahke peopo, an no go find da guys dat know how fo find out wat da mahke peopo spirits know.” (Da Prieses 19:31) He tell us dat fo proteck us from Satan an da demons. Dey da ones who go agains God an dey like try hurt us.

DIG MOA DEEP

Try learn about da good kine tings dat da angels do, how come az dangerous fo do spirit kine stuff, an how us can proteck ouaselfs from Satan an da demons.

4. Angels help peopo fo learn about Jehovah

God’s angels no preach to peopo. But dey help da guys who worship God find peopo who like learn about him. Read um Wat Jesus Show John 14:6, 7, an den talk story about dese questions:

How come we need help from da angels fo preach?
Make you feel good inside fo know dat angels can help you find peopo who need fo lissen wat da Bible tell o wat? How come?

5. Say “A’ole!” to da spirit kine stuff

Satan an da demons go agains Jehovah. Dey go agains us too. Read um Luke 9:38-42, an den talk story about dis question:

Wat da demons do to peopo?

We no like do anyting fo let da demons come close to us. Read um Da Rules Secon Time 18:10-12, an den talk story about dese questions:

Wat kine ways da demons try get us fo do someting an try talk story wit us? Wat kine tings you see wea you stay?
You tink az good dat Jehovah tell us fo no do da spirit kine tings? How come?

Play um da VIDEO, an den talk story about da questions afta.

VIDEO: “Gotta Stan Up Agains Da Devil” (5:02)

You tink da bracelet Palesa’s daughtah wen wear had hurt her o wat? How come?
Wat Palesa had fo do fo stay safe from da demons?

Fo real kine Christians always go agains da demons. Read um Jesus Guys 19:19 an 1 Fo Da Corint Peopo 10:21, an den talk story about dis question:

How come az importan fo wipe out any kine spirit kine stuff you get?

6. Be da winna agains Satan an his demons

Satan da one in charge of da demons. But da chief leada of da angels is Michael, one odda name fo Jesus. He lead da angels who trus God. How much powa Michael get? Read um Jesus Show 12:7-9, an den talk story about dese questions: