EHONGWA 24
Ovaengeli ovangendu nu ovikwaye mbi ve tjita?
Jehova u vanga kutja tu rihonge ohunga neṱunḓu re romeyuru. Eṱunḓu ndo ri kamburira mo ovaengeli, mbe isanewa ‘ovanatje ovazandu vaNdjambi.’ (Genesis 6:2; Job 38:7) Ovikwaye Ombeibela mbi i hungira ohunga novaengeli? Hapo owo ve norupa rwaye mehupo rovandu? Nu hapo ovaengeli avehe orupa rweṱunḓu ra Mukuru?
1. Hapo ovaengeli ovangendu?
Jehova wa mema ovaengeli ngunda e hi ya mema ehi. Tjimuna Jehova, owo oviutwa vyombepo mbi kara meyuru. (Ovaheberi 1:14) Pe novaengeli ovengi, nu auhe wawo omundu wapeke. (Omavandururiro 5:11) Owo ve ‘kara nonḓuviro komarakiza we, nu ve puratena ku imbi Eye mbi ma hungire.’ (Epsalme 103:20) Ozombura ozonguru nḓa kapita, Jehova aa hindi ovaengeli okuvasisa ombuze ye, okuvatera nokuyama ovakarere ve. Ndino ovaengeli ve vatera Ovakriste kutja ve mune ovandu mbu mave vanga okurihonga ohunga na Mukuru.
2. Satan nozondemone ze ovangendu?
Ovaengeli tjiva kave karere nouṱakame ku Jehova. Omuengeli omutenga ngwa pirukira Mukuru ‘Omudiaboli poo Satan, ngu pukisa ouye auhe.’ (Omavandururiro 12:9) Satan aa vanga okuhonaparera po varwe, ku nao eye wa popa ovandu ovatenga, nu kombunda wa tjita kutja ovaengeli varwe ave ha kara nonḓuviro ku Jehova. Ovaengeli ovapirukire mbo ve isanewa kutja ozondemone. Jehova we ve ramba meyuru okuya kombanda yehi, nu owo mave kanyonwa.—Lesa Omavandururiro 12:9, 12.
3. Omomuano uṋe Satan nozondemone mu ve kondja okutupukisa?
Satan nozondemone ze, ve pukisa ovandu ovengi okupitira moundjai, mbu ri omuano omuvi wokuhakaena ku nozombepo ozombi. Otjotjihorera, ovandu tjiva ve yenda kovandu mbe tara kozonyose, kozombuke na kozonganga zovazorondu. Varwe ve paha omiano omingi vyomapangero mbi ungurisa oundjai. Varwe ve pukisiwa mokukambura kutja mave yenene okuhungira ku novaṱi. Posi ya, Jehova u tu pa erakiza ndi: “Kamu nakuyenda ko kozondjai nḓe nozombepo zovaṱi na kozombetere.” (Levitikus 19:31) Eye we tu pa erakiza ndi okututjevera ku Satan nozondemone. Owo ovanavita na Mukuru nu ve vanga okutuhihamisa.
KONḒONONA OUKOTO
Rihonga ohunga noviṋa oviwa ovaengeli mbi ve tjita, noumba mbu za moundjai, nomuano mu matu yenene okuritjevera oveni ku Satan nozondemone.
4. Ovaengeli ve vatera ovandu okurihonga ohunga na Jehova
Ovaengeli va Mukuru kave zuvarisa kovandu ongarate. Posi ya owo ve hongorera po ovakarere va Mukuru ku imba mbu mave vanga okurihonga ohunga na ye. Lesa Omavandururiro 14:6, 7, nu okuzambo hungirira komapuriro nga:
-
Ongwaye tji tu hepa ombatero yovaengeli tji matu zuvarisa?
-
Hapo otjitunduuze okutjiwa kutja ovaengeli ve yenena okutuhongorera po okumuna ovandu mbe vanga okutjiwa ohunga nOmbeibela? Omena raye?
5. Nakaura oundjai
Satan nozondemone ovanavita na Jehova. Owo wina ovanavita na eṱe. Lesa Lukas 9:38-42, nu okuzambo hungirira kepuriro ndi:
-
Ozondemone ze tjita ye kovandu?
Katu nokuvanga okuyandjera ozondemone kutja ze tu pukise. Lesa Deuteronomium 18:10-12, nu okuzambo hungirira komapuriro nga:
-
Omomiano viṋe ozondemone mu ze kondja okutupukisa nokukondja okuhakaena ku na eṱe? Ozongaro zeṋe nḓe tjitwa tjinene momaturiro woye?
-
Hapo u muna kutja otjiṋa otjiwa kutja Jehova ke tu yandjere okuungurisa oundjai? Omena raye?
Nyanda OKAVIDIO, nu okuzambo hungirira komapuriro ngu maye kongorere mba.
-
Hapo ove mo munu kutja okamukova kaake zarewa i yokanatje ka Palesa aake eta oumba? Omena raye?
-
Ovikwaye Palesa mbyaa hepa okutjita kutja me ritjevere kozondemone?
Ovakriste vatjiri aruhe aave pirukire ozondemone. Lesa Oviungura 19:19 no 1 Ovakorinte 10:21, nu okuzambo hungirira kepuriro ndi:
-
Ongwaye tje ri ounanḓengu okunyona otjiṋa ngamwa atjihe tji tji ku hakaenisa ku nozondemone?
6. Taara otjirwa ku na Satan nozondemone ze
Ozondemone ze honaparerwa po i Satan. Posi ya, ovaengeli ovaṱakame ve hongorerwa po i yomuengeli otjiuru Mikael, ndi ri ena ra Jesus rarwe. Mikael omunamasa pu pe ṱa pi? Lesa Omavandururiro 12:7-9, nu okuzambo hungirira komapuriro nga:
-
Ouṋe ngu ri omunamasa tjinene? OMikael novaengeli ve poo oSatan nozondemone ze?
-
Hapo ove mo munu kutja ovakongorere va Jesus mave hepa okutira Satan nozondemone ze?
Ove mo yenene okutaara otjirwa ku na Satan nozondemone ze. Lesa Jakobus 4:7, nu okuzambo hungirira kepuriro ndi:
-
Mo yenene vi okuritjevera ku Satan nozondemone ze?
OVANDU TJIVA VE TJA: “Kanavi okunyanda ozongeima poo okutarera ozomuvi zoundjai. Okurikuturisa ouruvi uriri.”
-
Ongwaye tje ri otjiṋa otjinaumba okukara noumune mbwo?
OKUYARUKIRA PO OUSUPI
Ovaengeli ovaṱakame ve tu vatera. Satan nozondemone ze ovanavita na Jehova, nu owo ve ungurisa oundjai okupukisa ovandu.
Okurizemburukisa
-
Omomuano uṋe ovaengeli va Jehova mu ve vatera ovandu okurihonga ohunga na ye?
-
Satan nozondemone ze ovangendu?
-
Ongwaye tji tu hi nokuvanga okukara notjiṋa noundjai?
RIHONGA OVINGI
Tara koviṋa mbi mavi raisa kutja Jesus otjiuru tjovaengeli.
“Ouṋe ngu ri Mikael Otjiuru tjOvaengeli?” (Okarupa okasupi morungovi)
Tara koviṋa mbi raisa kutja Satan omundu wakatjiri.
“Hapo Omudiaboli omundu wakatjiri?” (Okarupa okasupi morungovi)
Tara komuano omukazendu umwe ma yenena okupoka kozondemone.
“Eye wa muna ondando yokuhupa” (Oruhungu, 1 ku Juli, 1993)
Tara komuano Satan me ungurisa oundjai okupukisa ovandu.
“Ouatjiri ohunga noundjai nourozi” (Ondjira ndji twara komuinyo waaruhe, orupa 5)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
