LEKSION 24
Anni i Kinakurug Meyannung ta Anghel Ira?
Kayà ni Jehova nga mammuattam i familiana ta langi. Kasali tatun nga familia i anghel ira nga nagalan tu “ána na Dios.” (Job 38:7) Anni i kagian na Biblia meyannung ta anghel ira? Kunnasida nga influwensian i totolay? Parte kari na familia na Dios i ngamin nga anghel?
1. Sinni i anghel ira?
Pinaratu ni Jehova i anghel ira nigena nga kingngua i davvun. Espiritu ira nga ari masingan nga maddian ta langi. (Hebreo 1:14) Minillion i anghel ira, anna neruma i kada tadday nira. (Nepakannammu 5:11) “Mamarulo ta bili-bilin [ni Jehova] anna magginna ta ngamin nga kagian na” i anghel ira. (Salmo 103:20) Ta ollu nga tiempo, nangidog nu karuan si Jehova tu anghel ira tapenu iyadde i mensahena anna tapenu suportan anna ipaliag i totolena. Ta kaggawattam, igiyada i Cristiano ira ta totolay nga maya maggigiammu meyannung ta Dios.
2. Sinni si Satanas anna i demoniona ira?
Ari nga nattalupaddian nga matalo kani Jehova i karuan nga anghel. Nagalan tu “Satanas nga minannabag ta tanga-ravvunan” i ollu nga anghel nga narrebelde. (Nepakannammu 12:9) Kayà ni Satanas i mammaguray, yatutta ininfluwensianna nga marrebelde da Adan anni Eva kunnatun gapa ta karuan nga anghel ira. Magalan tu demonio i anghel ira nga narrebelde. Pinapanaw ira ni Jehova ta langi anna netabbo ira ta davvun. Aranni ngana gapa i kadaralda.—Bibbigan i Nepakannammu 12:9, 12.
3. Kunnasi ittam ilologo ni Satanas anna na demoniona ira?
Ilologo ni Satanas anna na demoniona ira i aru nga totolay gukaban na espiritismo—i pakiyuvovug ta espiritu ira. Marake yatun. Angngariganna, makkonsulta i karuan ta astrolohiya, ta minallavvun, espiritista, anna ta albulariu ira. Mapporu gapa i karuan maski nu nakivuan yatun tu espiritismo. Mangurug gapa i karuan nga totolay nga awayyada kibbidan i natay. Ngem kinagi ni Jehova: “Ariannu nga mappoffun ta espiritista ira, anna ariannu nga makkonsulta ta minallavvun.” (Levitico 19:31) Makoffun yatun tapenu maprotektan ittam kani Satanas anna ta demoniona ira. Kontra ira na Dios anna kayàda ittam nga takitan.
GIGIAMMUAN I ARU PAGA
Ammuan i makasta nga kukukuan na anghel ira, i peligro na espiritismo, anna nu kunnasi tam maprotektan i baggi tam kani Satanas anna ta demoniona ira.
4. Uffunan na anghel ira i totolay nga magigiammu i meyannung kani Jehova
Ari tu direkta nga layyagayyan na anghel ira na Dios i totolay. Ngem igiyada i aripan ira na Dios ta totolay ira nga kayàda i maggigiammu meyannung ta Dios. Bibbigan i Nepakannammu 14:6, 7, anna paguvovugan yaw ira nga pakkiavu:
-
Ngatta kawagattam i uffun na anghel ira ta pallayyagayya?
-
Napagaram ka kari ta ammum tu awayya naka igiya na anghel ira ta totolay nga kayàda mammuan i mensahe na Biblia? Ngatta?
5. Lillitan i espiritismo
Kontra ni Jehova si Satanas anna i demoniona ira. Kontra tam gapa ira. Bibbigan i Lucas 9:38-42, anna paguvovugan yaw nga pakkiavu:
-
Anni i kuan na demonio ira ta totolay?
Ariattam kayà nga mappa-influwensia ta demonio ira. Bibbigan i Deuteronomio 18:10-12, anna paguvovugan yaw ira nga pakkiavu:
-
Kunnasi nga purueban na demonio ira nga influwensian ittam anna makikomunika nittam? Anni ira i annangngua ta diannu nga egga koneksionna ta espiritismo?
-
Mepangngo kari laman i pangigamma ni Jehova ta espiritismo? Ngatta?
Girawan i VIDEO, anna paguvovugan yaw ira nga pakkiavu:
-
Egga kari i peligro na anting-anting nga egga ta lima na ana ni Palesa? Ngatta?
-
Anni i mawag nga kuan ni Palesa tapenu maprotektan kontra ta demonio ira?
Kontran na kurug ira nga Cristiano i demonio ira. Bibbigan i Kingngua 19:19 anna 1 Corinto 10:21, anna paguvovugan yaw nga pakkiavu:
-
Ngatta mawag nga daralattam i ngamin nga gannug nga egga i koneksionna ta espiritismo?
6. Affutan si Satanas anna i demoniona ira
Immagurayan ni Satanas i demonio ira. I matalo gapa nga anghel ay irolluan na dakal na anghel ira nga si Miguel—tanakuan paga nga ngagan ni Jesus. Makapangngua kari si Miguel? Bibbigan i Nepakannammu 12:7-9, anna paguvovugan yaw ira nga pakkiavu:
-
Sinni i mas makapangngua? Si Miguel anna i anghelna ira onu si Satanas anna i demoniona ira?
-
Mawag kari nga ikassing na tagatuttul ira ni Jesus si Satanas anna i demoniona ira?
Awayyam affutan si Satanas anna i demoniona ira. Bibbigan i Santiago 4:7, anna paguvovugan yaw nga pakkiavu:
-
Kunnasim maprotektan i baggim kani Satanas anna ta demoniona ira?
I KAGIAN NA KARUAN: “Awan tu marake ta paggayam onu paggiraw meyannung ta espiritismo. Ariakku mabba parigan.”
-
Ngatta delikadu yatun nga pagimamma?
ANNI I NAGIGIAMMUM?
Uffunan ittam na matalo ira nga anghel. Kontra ni Jehova si Satanas anna i demoniona ira, anna usadda i espiritismo tapenu ilogo i totolay.
Review
-
Kunnasi uffunan na anghel ira ni Jehova i totolay tapenu magigiammu i meyannung nisa?
-
Sinni si Satanas anna i demoniona ira?
-
Ngatta mawag nga lillitammu i espiritismo?
I AWAYYAM PAGA KUAN
Innan i pamakurug nga si Jesus i dakal na anghel ira nga si Miguel.
“Sinni si Miguel nga Dakal na Anghel Ira?” (Artikulo ta website)
Ikonsidera i ebidensia nga kurug nga persona i Diablo.
Innan nu kunnasi niyemmang na tadday nga babay i kukukuanna nga konektadu ta espiritismo.
“Naleganna i Gakkag na Pattolay” (Passifusifutan, Hulio 1, 1993)
Gigiammuan nu kunnasi usan ni Satanas i espiritismo ta pangilogo ta totolay.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
