ANG ỌJẸ́JẸ 24

Ẹlịlẹhị u-Uhye nya Alegu-Ẹrụ

IJihova tịtọ kahị ka jẹ́ ang u-uhye nya ugbiyegu nyamwụ olepwoohe. Alegu-ẹrụ juwa ẹ-ẹpwụ nya ugbiyegu ọwẹ ịnyịnyị. ỊBayịbụụ wụraa nya “anyị nya Ohe.” (IJobu 38:7, NW) Ẹlịyẹ ịBayịbụụ à tị́ ya u-uhye nya alegu-ẹrụ? Ọngịrị oyina ị tị́ la u-uhye nya angịnyị ehe? Alegu-ẹrụ wuu à ji ẹpwụ nya ugbiyegu nya Ohe lẹ?

1. Owo alegu-ẹrụ à tị́ ri?

IJihova họ alegu-ẹrụ ene kọọ họ odehe. Jaabwọ kahị jẹ́-ẹ yẹ iJihova ka, áhị jẹ́-ẹ yẹ alegu-ẹrụ ka ịnyịnyị. (Ala iHiburu 1:14) Alegu-ẹrụ la uku ịmanyị tị́, ị tị la abwẹla ịdatị-datị ịnyịnyị. (Ọwụrụụ-wụrụ 5:11) Ị kaa “kpa ehile [nya iJihova], juwa họ ang ọlẹ kọ [byaa.]” (Eje Ọnyịịla 103:20) Lụka onyogo, iJihova kaa du alegu-ẹrụ kaka ya ẹla nyamwụ je angịnyị bala ọ-ka da anchẹ nyamwụ ụbwọ bala ọ-chaa da. Alẹ, alegu-ẹrụ kaa kpa Angịnyị nya ịKịrayịsị ụgbẹyị ka ẹga nya angịlẹ kị tịtọ nyọka jẹ́ ẹla nya Ohe.

2. Owo Ohe Onyobyi bala alegu inyibyi à tị́ ri?

Alegu-ẹrụ ịhyẹ la egbeju ọngịrị ta iJihova. Olegu-ẹrụ ọhọhẹ ọlẹ kọ la egbeju ọngịrị ta Ohe à ri “ọlẹ kị wụrụ olegu onyobyi bala Ohe Onyobyi ọlẹ kọ ri ọngọ pịrị alodehe ọlẹ wuu ju lẹ.” (Ọwụrụụ-wụrụ 12:9) Ohe Onyobyi tịtọ kọ ka ri olegbeju nya angịkịla, lẹ ọ pịrị angịnyị ehe ịhọhẹ, tụ́ alegu-ẹrụ ịkịla kaka julọọ la egbeju ọngịrị ta iJihova. Alegu-ẹrụ ịkịla ịịwa à ri alegu inyibyi lẹ. IJihova kwaa rụ bwu epwoohe wẹ odehe, ọ tị ja ka taa ayịreji.—Wa Ọwụrụụ-wụrụ 12:9, 12.

3. Ụgbẹyị oyina Ohe Onyobyi bala alegu inyibyi à tị́ kaa maga nyọka hụ angịnyị ahị?

Ohe Onyobyi bala alegu inyibyi kaa hụ angịnyị ahị bwula ọ-pịraa kaka họ ang balaa ụ-ụgbẹyị ọhẹ lee ọkịla. Ị kaa họ ịnyị kpụrụrụ lee o-bwula ọngọkịla. Ụka ọhẹ angịịwa ayịdang á tị kaa jẹ́ nyori alegu inyibyi nya-à wẹẹ họ ang bala lẹ ka. Jaabwọ wẹẹ, angịhyẹ kaa maga nyọka ya ẹla ta egu, maga nyọka kpa ịdịchụ jẹ́ ẹla ọlẹ kọ ka họ ị-ịlahị, ka ẹga nya angị yọyị a-arụrụ, angị mwụ́ ịnwa, bala alijiga. Angịkịla kaa họ utoji ọlẹ kọ ju ẹla nya alegu inyibyi ẹ-ẹpwụ. Alegu inyibyi kaa me ọnọọkịla ju angịnyị nyori nyị ka jẹ́-ẹ ya ẹla ta egu. IJihova tị dahị ọna yẹkẹẹ: “Ānụ ka ẹga nya ọlọmwụ lee ẹga nya angị kaa ya ẹla ta egu koo.” (Ala iLivayị 19:31) Ọ dahị ọna ọwẹ nyọka chewu keehi hi Ohe Onyobyi bala alegu inyibyi ịnyị. Ị ri aluji nya Ohe ịnyị, ị tị myịmyị tịtọ nyọka họhị ẹla ọtịpyọ.

JẸ́ GỤ ỌỌWA

Jẹ́ ang ịnyịịla ịlẹ ká alegu-ẹrụ kaa họ, ang odudu ká ẹla ọ-họ bala alegu inyibyi tịpyọ, bala abwọlẹ kahị ka bwu chewu ke ịlọhị hi Ohe Onyobyi bala alegu inyibyi.

4. Alegu-ẹrụ kaa da angịnyị ụbwọ nyọka jẹ́ iJihova

Alegu-ẹrụ á kaa ya ẹrụ ọnyịịla je angịnyị kpụrụrụ ka. Ma, ị kaa kpa anchẹ nya Ohe ụgbẹyị ka ẹga nya angịlẹ kị tịtọ nyọka jọ́ọ. Wa Ọwụrụụ-wụrụ 14:6, 7, kanụ ya ẹla u-uhye nya ịtọ ẹla ịlẹ:

Ịyẹ tị́ du kahị baba nya ụbwọ ọdada nya alegu-ẹrụ nyọka ya ẹrụ ọnyịịla?
O ri ọhụ ojuju hang nyọka jẹ́ nyori alegu-ẹrụ ka jẹ́-ẹ kpang ka ẹga nya angịlẹ kị tịtọ nyọka jẹ́ ịBayịbụụ? Ịyẹ tị́ du?

5. Cheji ba hi alegu inyibyi

Ohe Onyobyi bala alegu inyibyi ri aluji nya iJihova. Ị ri aluji nyahị ịnyịnyị. Wa iLuku 9:38-42, kanụ ya ẹla u-uhye nya ịtọ ẹla ọlẹ:

Ịyẹ alegu inyibyi à tị́ kaa họ angịnyị?

Áhị tịtọ nyọka wụrụ alegu inyibyi wẹ ọhịhị nyahị ka. Wa Ehile Ọmada 18:10-12, kanụ ya ẹla u-uhye nya ịtọ ẹla ịlẹ:

Agbẹyị iyina alegu-inyibyi à tị́ kaa maga nyọka la ọngịrị u-uhye nyahị bala ọ-ka ya ẹla balahị? Ịhọhọ iyina angịnyị lụmẹ-lụmẹ o-oye nyang à tị́ kaa yụbwọ ju?
À me irya kọ há nyọlẹ ká iJihova ya ahị nyị la ịngịngịhyẹ ka họ bala alegu inyibyi ka? Ịyẹ tị́ du?

Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

IFIM: “Juwa Tụ Ohe Onyobyi Pyịpyị” (5:02)

À me irya ká ogbo ọlẹ ká Palesa ya du ọnyị nyamwụ ụ-ụbwọ tịpyọ? Ịyẹ tị́ du?
Ịyẹ Palesa à tị́ baba nyọka họ chajị kọ ka yé ewu ọ-chị ke hi alegu inyibyi?

Angịnyị nya ịKịrayịsị nyịlẹhị kaa pwa ẹla nya alegu inyibyi. Wa Ụkụrwọ nya Alẹrụ 19:19 bala 1 Ala ịKọrịntị 10:21, kanụ ya ẹla u-uhye nya ịtọ ẹla ọlẹ:

Ịyẹ tị́ du ká baba nyọka ta ang myị́ ang nyang ọlẹ kọ la ịngịngịhyẹ ka họ bala alegu inyibyi ayịreji?

6. Kụrụ Ohe Onyobyi bala alegu inyibyi

Ohe Onyobyi à ri olegbeju nya alegu inyibyi lẹ. Ma olegbeju nya alegu-ẹrụ ịkpẹẹkpẹẹ ri iJisọsị, ká ẹnyị nyamwụ ọkịla ri ịMayịkẹlụ. Ányị ịMayịkẹlụ à tị́ la ọngịrị kaka ba? Wa Ọwụrụụ-wụrụ 12:7-9, kanụ ya ẹla u-uhye nya ịtọ ẹla ịlẹ:

Owo à tị́ la ọngịrị gụ? ỊMayịkẹlụ bala alegu-ẹrụ nyamwụ lee Ohe Onyobyi bala alegu inyibyi tị́?
À me irya ká angị ba iJisọsị jẹ baba nyọka juhi nya Ohe Onyobyi bala alegu inyibyi?

À ka jẹ́-ẹ kụrụ Ohe Ohe Onyobyi bala alegu inyibyi. Wa iJemsi 4:7, kanụ ya ẹla u-uhye nya ịtọ ẹla ọlẹ:

Ányị a tị́ ka bwu chewu ke ịlọng hi Ohe Onyobyi bala alegu inyibyi?

ANGỊHYẸ KAA YẸKẸẸ: “Ifim bala ayịlọ ịlẹ kị ju ang nya alegu inyibyi ẹ-ẹpwụ á tịpyọ ka. Ayịlọ tị́.”

Ịyẹ tị́ du ká ẹlẹwẹ tịpyọ?

ẸLỊYẸ A TỊ́ JẸ́?

Alegu-ẹrụ ịkpẹẹkpẹẹ kaa dahị ụbwọ. Ohe Onyobyi bala alegu inyibyi ri aluji nya iJihova ịnyị, ị tị kaa pịrị angịnyị kaka ya ẹla bala ịlaa chajị kị ka kpaa hwahị.

Ẹlịyẹ A Tị́ Yụbwọ Chị?

Ányị alegu-ẹrụ nya iJihova à tị́ wẹẹ da angịnyị ụbwọ nyọka jọ́ọ?
Owo à tị́ ri Ohe Onyobyi bala alegu inyibyi?
Ịyẹ tị́ du ká tịtọ nyọka lụbwọ ẹ-ẹpwụ nya ang nya alegu inyibyi ka?

Ahyẹẹnụ ọlẹ ká ang ọjẹ́jẹ ọlẹ cheju:

Ụkụrwọ ọlẹ á ka họ

Kụ ẹhị yẹ ang ịlẹ ká la wuu, ká yẹ kori ká ọhẹ lẹpwụ nyaa á la ang ka họ bala alegu inyibyi. Kori kọ lịnyị, à raabwọ bịlẹ iJihova kọ ya ẹla ọjẹ́jẹ hang, nyọka jẹ́ ang ọlẹ á ka họ la ang abwọ ọọwa.

Ọkịla:

Ụkụrwọ ọkịla ọlẹ á ka họ