TOLUMỌYE 24

Angel-otubo Tebara K’emi A O?

FARỊ

Angel-otubo akị “Ọkpọnanaowei awọụama” kị tịịn wẹrị emi. (Job 38:7) Amịnị kpọ Jehovah warịbolou-otubo a sụọ emi. Omịnị Jehovah warị bolou tolumọ nimi kị Jehovah mụ dọụ wẹrị emi. Angel-otu gbelemọ yọmị Bible teeki gbaa wẹrị emi a o? Amịnị tebara ka kị wó gbele mịnị a o? Má angel-otubosẹ Jehovah warịbolou bọọ sụọ emi a o?

1. Angel-otubo tebara k’emi a o?

Jehovah angel-otumọ tẹmẹ dẹ kị bei kiriogbo tẹmẹ mị. Amịnị tẹmẹ angọ kị nana wẹrị agọnọ a inyenrin mịnị. (Hebrews 1:14) Biin million angel-otuama kị agọnọ bọọ emi, má a sẹ́ bẹbẹ inyenrinbụọ-ama kị nana wẹrị emi. (Revelation 5:11) Amịnị “Jehovah okolo pei wẹrị wo gbaa ye kị mịẹ mịnị.” (Psalm 103:20) Oruseri ifie mị, Jehovah wo angel-otubo fịrịmọ mú zụa ifie-ama ịsọmụ egberi gbaa, baratụa wo kịmịbo pịrị má a zụọ tim’mị. Bei ifie bị, angel-otubo baratụa Christtuuduo-otubo pịrị wẹrị Ọkpọnanaowei nimi dọụ emi kịmịbo dọụ ẹrị mịnị.

2. Satan mọ seitẹmẹbo mọ tebara k’emi a o?

Zụa angel-otuama má peibolou akị Jehovah ghọ tụagha. Kẹnị angel kị bọlọụ tịbịkụrọ mị, “wo ẹrẹ bị Devil má Satan, omịnị kị kiriogbosẹ lẹlẹmọ mịnị.” (Revelation 12:9) Satan kịmịọwọụ daa dọụ mịnị duonị, omịnị Adam, Eve má zịnị angel-otuama kpọ mịẹ tịbịkụrọ Jehovah pịrị mị. Bei tịbịkụrọ angel-otubo akị seitẹmẹ-ama kị tịịn mị. Jehovah agọnọ duo a kpotu koromọ bo dẹ, má omịnị a baa mịnị.—Revelation 12:9, 12 goo.

3. Satan mọ seitẹmẹbo mọ tebara ka kị wó lẹịmọ dọụ ema o?

Satan mọ seitẹmẹbo mọ, kịmịotu lẹịmọ wẹrị a mọ mọ́ ẹrẹ mịnị. Anị tẹmẹ tolumọ inyenrinbụọ. Gbaa maba, zụa kịmịama bụrụọtu dọụ mú wẹrị bọlọụ a paamọ ye gbaa akị a pịrị mịnị. Zụa kịmịama bụrụọtu dọụ mú wẹri anị dọọnbo zụọ mịnị. Má amịnị laa fị dẹ otumọ ẹrẹtei a paa emi bara kpọ iroro mịnị. Anịa Jehovah gbaa mị: “Tẹmẹ tolumọ-otu má bọlọụ a paamọ ye gbaa mịnị otu dọụ mú kụmọ.” (Leviticus 19:31) Satan mọ seitẹmẹbo mọ seiye akị wó mịẹ dọụ mịnị kị duonị Jehovah bei egberi gbaa wó pịrị wẹrị emi.

EBIBARA TUUDỌỤ

Angel-otubo mịẹ mịnị ebi yebo tolumọ nimi. Tẹmẹ-tolumọye duo bo kịmị laa mịnị akpotubo mọ má Satan mọ wo seitẹmẹbo mọ duo wó angọ kekere mụ bara tolumọ.

4. Angel-otu baratụa kịmịotu pịrị wẹrị bo Jehovah nimi mịnị

Angel-otubo egberi gbaa kịmịotu pịrịgha, anịa amịnị baratụa akị Ọkpọnanaowei karị mịnị otubo pịrị wẹrị mú ụ karị dọụ emi kịmịmọ laa mịnị. Revelation 14:6, 7 goo dá, bei biibịbịmọ kẹrị ẹrẹtei:

Egberigbaa fịrị gbelemọ yọmị, tetuu kị duonị angel-otu baratụa wó pịrị agbẹị emi a o?
Angel-otubo baratụa ị́ pịrị wẹrị Bible nimi dọụ emi otubo dọụ ẹrẹ mịnị yọmị, ị́ kụrọmọ ma o? Tetuu a o?

5. Tẹmẹ-tolumọye mịẹkụmọ

Satan mọ seitẹmẹbo mọ, Jehovah egiren-otuama. Má wó kpọ egiren-otuama. Luke 9:38-42 goo dá, bei biibịbị kẹrị ẹrẹtei:

Seitẹmẹbo teye ka kị kịmịama mịẹ mịnị a o?

Omịnị seitẹmẹbo bụọmọ wẹrị wó dọụ bogha fa. Deuteronomy 18:10-12 goo dá, bei biibịbịmọ kẹrị ẹrẹtei:

Seitẹmẹbo tebara ka kị wó mọ naịn má ẹrẹtei dọụ mịnị a o? Iné emi yọmị te tẹmẹ-tolumọ inyenrinbụọ kị ị́ mọ ẹrị mịnị a o?
Jehovah tẹmẹ-tolumọ inyenrinbụọ dịsẹgha yọbị, ebimi a? Tetuu a?

VIDIO farị dá, biibịbịmọ kẹrị ẹrẹtei.

VIDIO: “Devil Daatịẹmọ” (5:02)

Palesa akị tọbọụma barakpa wẹrị yemị ebi ma o? Tetuu a?
Palesa seitẹmẹbo mọ naịn dọụgha sẹ amịnị teeki mịẹ agbei emi a o?

Gesii Christtuuduo-otumọ ifiemọsẹ seitẹmẹbo daatịẹmọ mịnị. Acts 19:19 má 1 Corinthians 10:21 goo dá, bei biibịbị kẹrị ẹrẹtei:

Tetuu kị duonị ị́mịnị iné nana wẹrị emi tẹmẹ-tolumọ yebosẹ seri siin agbẹị emi a o?

6. Satan mọ seitẹmẹbo mọ dẹịnmọ

Satan kị seitẹmẹbo daa mịnị. Michael kị peibolou nana wẹrị emi angelbo daa mịnị. Michael kpọ Jesus ẹrẹ́. Michael kụrọ mị dụba tebara kị laa emi a o? Revelation 12:7-9 goo dá, mị biibịbịbo kẹrị ẹrẹtei:

Michael mọ wó angel-otubo mọ má Satan mọ wó seitẹmẹbo mọ te otu kị kụrọ nana dẹịn emi a o?
Jesus tuuduo-otu Satan mọ seitẹmẹbo mọ esiin agbẹị emi a?

Ị́mịnị laa Satan mọ seitẹmẹbo mọ dẹịnmọ a paa emi. James 4:7 goo dá, bei biibịbị kẹrị ẹrẹtei:

Ị́mịnị tebara ka kị Satan mọ seitẹmẹbo mọ duo angọ kekere mịnị a o?

ZỤA KỊMỊAMA GBAA MỊNỊ: “Tẹmẹ tolumọ vidio-ama dii mịnị yọmị seigha.”

Tetuu kị duonị bịsẹ bara iroro agbẹịgha o?

KỊLỌỌBARA

Peibolou nana wẹrị emi angel-otubo baratụa wó pịrị mịnị. Satan mọ seitẹmẹbo mọ wó lẹlẹmọ mịnị. Amịnị tẹmẹ-tolumọ inyenrinbụọ ka kị kịmịama lẹlẹmọ mịnị. Amịnị Jehovah egiren-otuama.