LESN 24

Wa A Di Chuut Bout Di Ienjel Dem?

PLIE

Jeuova waahn wi fi nuo bout im fambili we de iina evn. Di ienjel dem, uu a “Gad son dem,” a paat a da fambili de. (Juob 38:7) Wa di Baibl av fi se bout di ienjel dem? Wa kain-a diilinz dem av wid piipl? Yu tingk aal a di ienjel dem a paat a Gad fambili?

1. Di ienjel dem—a uu dem bi?

Jeuova did mek di ienjel dem bifuo im mek di ort. Jos laik Gad, dem ienjel de a spirit we liv iina evn. (Iibruu 1:14) An jos laik ou yu kyaahn si Gad, yu kyaahn si dem. A wol iip a touzn a ienjel de bout an non a dem no tan di siem wie. (Revilieshan 5:11) Dem ‘lisn tu [Jeuova] an dem du wa im se dem fi du.’ (Saam 103:20) Fram wie bak wen, Jeuova yuus tu yuuz im ienjel dem fi tel im piipl dem wa im waahn fi tel dem se. An im yuuz dem tu fi elp an siev im piipl dem. Tide, Jeuova a yuuz im ienjel dem fi elp di Kristiyan dem fi fain piipl we waahn lorn bout Gad.

2. Sietan an im diiman dem—a uu dem bi?

Som a di ienjel dem did ton gens Jeuova. Di fos wan we did ton gens im a di wan we di Baibl kaal ‘di Devl, ar Sietan, we chrik di uol worl fi sin gens Gad.’ (Revilieshan 12:9) Sietan did waahn fi ruul uova piipl. So im inviigl di fos man an uman fi ton gens Gad an afta dat som a di ada ienjel dem fala Sietan an ton gens Jeuova tu. A dem ienjel ya dem kaal diiman. Jeuova mek dem get fling dong a ort ya, an im a-go get rid a aal a dem.—Riid Revilieshan 12:9, 12.

3. Wa Sietan an im diiman dem a du fi chrik wi op?

Sietan an im diiman dem chrai fi chrik piipl fi mek dem get miks op iina uobiya an dem tingz de. Som a di sitn dem we Sietan an im diiman dem a du fi chrik wi op a fi mek wi biliiv se wi kyan taak tu piipl we ded, an fi mek piipl go tu piipl we kliem se dem kyan luk pan di staar an dem ting de an mek dem nuo wa a-go gwaan. Ada piipl go a riida man an riida uman. Den yu av som we go a di wan dem we kliem se dem kyan tel yu wa a-go gwaan iina di fyuucha. An som piipl wen dem sik, dem go a som kain-a dakta we du som sitn tu dem we av fi du wid saiyans. Bot Jeuova tel wi se: “No chrai fi get elp fram piipl we kliem se dem kyan taak tu ded piipl spirit, an no go tu di sumadi dem we kyan tel yu wa a-go apm bifuo it apm.” (Livitikos 19:31) Jeuova tel wi se wi no fi av notn fi du wid dem sitn ya kaa im waahn fi kip wi sief fram Sietan an im diiman dem. Sietan an im diiman dem a fait gens Gad. Dem an Gad a no fren, an dem onggl waahn fi ort wi.

LORN SOM MUO

Lorn bout som a di gud sitn dem we di ienjel dem a du, an di wikid sitn dem we kyan apm wen wi miks op iina uobiya an dem tingz de. An wi a-go si som a di sitn dem we wi kyan du fi kip wiself sief fram Sietan an im diiman dem.

4. Di ienjel dem elp piipl fi lorn bout Jeuova

A no laik se Gad ienjel dem a go a piipl yaad go priich tu dem. Bot wa dem du a dat dem elp Gad piipl dem fi fain di wan dem uu riili waahn lorn bout im. Riid Revilieshan 14:6, 7, an den wi a-go taak bout dem kwestiyan ya:

Wa mek wi niid di ienjel dem fi elp wi wen wi a priich?
It mek yu fiil gud fi nuo se di ienjel dem di de a mek yu nuo wich paat fi go fi fain di wan dem we waahn ier wa di Baibl av fi se? Wa mek yu se so?

5. No av notn fi du wid uobiya an dem sitn de

Jeuova no iina notn wid Sietan an im diiman dem, an wi no iina notn wid dem niida. Wi an dem a no fren. Riid Luuk 9:38-42, an den wi a-go taak bout da kwestiyan ya:

Wa a som a di sitn dem we di diiman dem a du tu piipl?

Wi no waahn du notn fi aaba di diiman dem roun wi. Riid Dyuutaranami 18:10-12, an den wi a-go taak bout dem kwestiyan ya:

Wa a som a di sitn dem we di diiman dem a yuuz fi chrik wi, an wa dem a du fi get tu wi? Wa a som a di sitn dem we di piipl dem a du iina yu ieriya we av fi du wid Sietan an im diiman dem?
Yu tingk it mek sens se Jeuova no waahn wi av notn fi du wid uobiya an dem sitn de? Wa mek yu se so?

Plie di VIDIYO, an den wi a-go taak bout di neks kwestiyan dem.

VIDIYO: ‘Tan Op Chrang Chrang Gens Di Devl’ (5:02)

Yu tingk notn did rang wid di brieslet we Patsi daata did a wier? Wa mek yu se so?
Wa Patsi did fi du dat dem no get miks op wid di diiman dem?

Chuu Kristiyan aalwiez tan op chrang chrang gens di diiman dem. Riid Aks 19:19 an 1 Korintiyan 10:21, an den wi a-go taak bout da kwestiyan ya:

Wa mek wi fi bon op an get rid a evriting we wi av we av fi du wid uobiya an dem ting de?

6. Yu kyan win di fait gens Sietan an im diiman dem

A Sietan inchaaj a di diiman dem, bot di ienjel dem we neehn ton gens Jeuova, a Maikal inchaaj a dem. Dat a wan neda niem fi Jiizas. Ou powaful yu tingk im bi? Riid Revilieshan 12:7-9, an den wi a-go taak bout dem kwestiyan ya:

Uu yu tingk muor powaful? Maikal an im ienjel dem ar Sietan an im diiman dem?
Yu tingk Jiizas falara dem fi fried a Sietan an im diiman dem?

Yu kyan win di fait gens Sietan an im diiman dem. Riid Jiemz 4:7, an den wi a-go taak bout da kwestiyan ya:

Wa yu fi du so dat yu no get miks op wid Sietan an im diiman dem?

SUMADI MAIT-A SE: “Notn no rang fi plie giem, ar wach dopi shuo ar shuo wid uobiya an dem ting de iina it bikaa giem a giem, an shuo a shuo.”

Wa mek it rang fi tingk da wie ya?

DIS A WA YU FI MEMBA

Di ienjel dem we neva ton dem bak pan Gad, a dem a elp wi. Sietan an im diiman dem a fait gens Jeuova. Dem an im a no fren, an dem waahn wi fi miks op iina uobiya an dem tingz de fi chrik wi op.