Yehowa gaw sumsing lamu hta nga ai shi a nta masha ni a lam hte seng nna anhte hpe chye shangun mayu ai. Dai nta masha ni hta, “Karai Kasang a ali ama ni” ngu shaga ai lamu kasa ni lawm ai. (Yoba 38:7) Lamu kasa ni hte seng nna Chyum Laika hta hpa tsun da ai kun? Shanhte gaw shinggyim masha ni hpe gara hku akyu shabyin ya lu ai kun? Lamu kasa ni yawng gaw Karai Kasang a nta masha ni rai kun?

1. Lamu kasa ni gaw kadai ni rai kun?

Yehowa gaw ginding aga hpe garai n hpan shi yang lamu kasa ni hpe shawng hpan ai. Karai Kasang zawn sha shanhte hpe mung myi hte n mu lu nna, sumsing lamu hta nga ai wenyi hkum ni re. (Hebre 1:14) Lamu kasa ni gaw wan hkying hku law nna, langai hpra hta laklai ai atsam ningja ni nga ai. (Shingran 5:11) Shanhte gaw, “[Yehowa] a mungga nsen madat let, Shi a mungga hpe shadik ya ai.” (Shakawn 103:20) Moi aten hta, Yehowa gaw shi a amyu masha ni hpe hkye la na matu, madi shadaw ya na matu, shiga sa na matu, kalang lang lamu kasa ni hpe akyu jashawn ai. Dai ni aten hta mung, lamu kasa ni gaw Karai Kasang a lam hpe chye mayu ai masha ni hpang de sa na matu, Hkristan ni hpe lam matsun ya nga ai.

2. Satan hte shi a nat ni gaw kadai ni rai kun?

Lamu kasa nkau gaw, Yehowa hpe matut nna sadi n dung ai. Shawng nnan ninghkap wa ai lamu kasa hpe, “mungkan ga ting hpe hkalem kau ai, Nat hte Satan” ngu shaga ai. (Shingran 12:9) Satan gaw kaga ni hpe uphkang mayu ai majaw, Adam yan Ewa hpe gunglau wa ai. Dai hpang, kaga lamu kasa ni mung shi a gumlau ai lam hta shang lawm wa ai. Dai gumlau ai lamu kasa ni hpe nat ni ngu nna shaga ai. Yehowa gaw, shanhte hpe sumsing lamu kaw na ginding aga de gawt shapraw kau ai. Hpang de shanhte jahten hkrum na re.​—Shingran 12:​9, 12 hpe hti u.

3. Satan hte nat ni gaw anhte hpe hkalem na matu gara hku shakut ai kun?

Nat hpaji hte masha law law hpe hkalem na matu, wenyi hte matut mahkai na matu, Satan hte nat ni shakut nga ai. Ga shadawn, masha nkau gaw gumhpan hpan ai ni, gam maka yu ai ni, wenyi hpaji, hpyi hpaji chye ai ni hpang de sa nna hpaji hpyi ma ai. Nkau mi gaw, nat hpaji lawm ai tsi ladat ni hte tsi tsi ma ai. Si ai ni hte ga shaga lu ai ngu ai hpe masha ni kam hkra mung shanhte hkalem nga ai. Raitim, Yehowa anhte hpe ndai hku sadi jaw da ai: “Nat lahkum ni hte gumhpan re ai ni kaw hkum sa chyu myit.” (Jaw Jau 19:31) Shi ndai hku sadi jaw ai gaw, Satan hte nat ni kaw na anhte hpe makawp maga ya na matu re. Shanhte gaw, Karai a hpyen ni rai nna, anhte hpe shoihpa jaw mayu nga ai.

 Kahtap Hkaja

6. Satan hte shi a nat ni hpe gasat awng dang lu

Satan gaw nat ni hpe uphkang ai. Raitim, lamu kasa agyi Mihkaela gaw sadi dung ai lamu kasa ni hpe lam matsun ya ai. Mihkaela ngu ai gaw, Yesu a kaga amying langai re. Mihkaela gaw kade daram atsam kaba ai kun? Shingran 12:​7-9 hpe hti nna, ndai ga san ni hpe bawngban u:

• Kadai gaw grau atsam kaba ai kun? Mihkaela hte shi a lamu kasa ni kun? (sh) Satan hte shi a nat ni kun?

• Yesu a hpang hkan ai ni gaw, Satan hte nat ni hpe hkrit ra ai ngu nang shadu ai kun?

Satan hte nat ni hpe nang gasat awng dang lu ai. Yaku 4:7 hpe hti nna, ndai ga san hpe bawngban u:

• Satan hte nat ni a shoihpa kaw na tinang hkum tinang gara hku makawp maga lu ai kun?

 Kadun Dawk

Sadi dung ai lamu kasa ni gaw anhte hpe karum ya ai. Satan hte nat ni gaw Yehowa a hpyen ni re. Shanhte gaw nat hpaji hpe akyu jashawn nna masha ni hpe hkalem nga ai.

Bai Maram

• Yehowa a lamu kasa ni gaw, Karai Kasang hte seng ai lam hpe masha ni sharin la lu hkra gara hku karum ya ai kun?

• Satan hte shi a nat ni gaw kadai ni rai kun?

• Nat hpaji ni hte nang hpa majaw asan sha nga mayu ai kun?