ĨSOMO YA 24
Ũwʼo Ĩũlũ wa Alaĩka
Yeova nĩwendaa twĩmanyĩsye ĩũlũ wa mũsyĩ wake wa ĩtunĩ. Amwe methĩawa nthĩnĩ wa mũsyĩ ũsu nĩ alaĩka, ala Mbivilia ĩmetĩte ‘ana ma Ngai.’ (Yovu 38:7) Mbivilia ĩmanyĩasya kyaũ ĩũlũ wa alaĩka? Alaĩka matethasya andũ ata? Na nĩ alaĩka onthe methĩawa nthĩnĩ wa mũsyĩ wa Ngai?
1. Alaĩka naaũ?
Yeova oombie alaĩka atanamba kũmba nthĩ. O tondũ Ngai ũtonekaa, alaĩka nĩ syũmbe sya veva itonekaa, na mekalaa ĩtunĩ. (Aevelania 1:14) Ve alaĩka milioni mbingĩ, na kĩla ũmwe e nguma syĩ kĩvathũkanyʼo. (Ũvuanyʼo 5:11) Alaĩka ‘nĩmeanĩasya ndeto yake, na makĩwʼa wasya wa ndeto yake.’ (Savuli 103:20) Ĩvindanĩ ya tene, mavinda amwe Yeova nĩwatũmaa alaĩka matwaĩe andũ ũtũmani kana mamatetheesye na kũmatangĩĩa. O na ũmũnthĩ, alaĩka nĩmatongoeasya Aklĩsto mathi kwa andũ ala mekwenda kwĩmanyĩsya ĩũlũ wa Ngai.
2. Satani na ndaimoni naaũ?
Alaĩka amwe mayaaendeea kwĩthĩwa me aĩkĩĩku kwa Yeova. Mũlaĩka wa mbee ũla watwʼĩkie mũlei etĩtwe “Ndevili na ĩngĩ Satani, ũla ũkengaa nthĩ yonthe.” (Ũvuanyʼo 12:9) Satani endaa kũsumbĩka ala angĩ, na nĩkyo kĩtumi watatie Atamu na Eva na ĩtina atuma alaĩka angĩ methĩwa mate ewi kwa Yeova. Alaĩka asu alei nĩmo metawa ndaimoni. Yeova nĩwamalũngilye ĩtunĩ mooka kũũ nthĩ, na o mĩtũkĩ nĩmekwanangwa.—Soma Ũvuanyʼo 12:9, 12.
3. Satani na ndaimoni matataa kũtũkenga kwa nzĩa syĩva?
Satani na ndaimoni nĩmakengaa andũ aingĩ melikye maũndũnĩ ma kũneenanyʼa na maveva, ala nĩ maũndũ mathũku mũno. Kwa ngelekanyʼo, andũ amwe nĩmaendaa kwa ala masomaa ndata, awe, kana andũ angĩ maneenanasya na maveva. O na angĩ nĩmatũmĩaa nzĩa sya ũiiti ikonanĩtye na maveva mavuku. O na eka ũu, andũ amwe nĩmakengawa kana nĩ ũndũ ũtonyeka makaneenanyʼa na andũ ala makwie. Ĩndĩ Yeova atũkanĩtye akatwĩa atĩĩ: “Mũikakũlye ala mesene na maveva, kana ala mombasya ithitũ.” (Alivai 19:31) Atũnengete ũkanyʼo ũsu nĩ kana atũsũvĩane na Satani na ndaimoni. Mo nĩ amaitha ma Ngai na mendaa kũtũũmĩsya.
ĨMANYĨSYE MŨNANGO
Ĩmanyĩsye ĩũlũ wa maũndũ maseo ala alaĩka mekaa, mũisyo wa kũneenanyʼa na maveva mavuku, na ũndũ tũtonya kwĩsũvĩana na Satani na ndaimoni.
4. Alaĩka nĩmatetheeasya andũ memanyĩsye ĩũlũ wa Yeova
Alaĩka ma Ngai maitavasya andũ ũvoo ĩmwe kwa ĩmwe. Vandũ va ũu, nĩmatonya kũtongoesya athũkũmi ma Ngai mathi makaneene na andũ me na vata wa kwĩmanyĩsya ĩũlũ wake. Somai Ũvuanyʼo 14:6, 7, na ĩndĩ mũineenea makũlyo aa:
-
Nĩkĩ twĩ na vata wa kũtetheewʼa nĩ alaĩka wĩanĩ wa kũtavanyʼa?
-
We nĩweewʼa weekĩwa vinya wamanya kana alaĩka no maũtongoesye ũthi kwa andũ ala me na vata wa kũmanyĩwʼa Mbivilia? Nĩkĩ wasũngĩa ũu?
5. Ndũketĩkĩle kũneenanyʼa na maveva mavuku
Satani na ndaimoni nĩ amaitha ma Yeova. O na nĩ amaitha maitũ. Somai Luka 9:38-42, na ĩndĩ mũineenea ĩkũlyo yĩĩ:
-
Ndaimoni syĩkaa andũ ata?
Tũikwenda o na vanini kũthokya ndaimoni thayũnĩ witũ. Somai Kũtũngĩlĩlwa Kwa Mĩao 18:10-12, na ĩndĩ mũineenea makũlyo aa:
-
Nĩ kwa nzĩa syĩva ndaimoni itataa kũtũthĩnyʼa kana kũneenanyʼa naitũ? Nĩ maũndũ meva makonanĩtye na ndaimoni mekawa kĩsionĩ kyenyu?
-
We nũkwona ne ũndũ wosanĩte na kĩlĩko kwĩthĩwa Yeova atũvatĩte kwĩlikya maũndũnĩ makonanĩtye na maveva mavuku? Nĩkĩ wasũngĩa ũu?
Ĩloelei VITIO, na ĩndĩ mũineenea makũlyo aa maatĩĩe:
-
We nũkwona kavangili kau kelĩtu ka Palesa kekĩĩtwe ta kaĩ katonya kũete mũisyo? Nĩkĩ ũkwasya ũu?
-
Palesa aaĩle kwĩka ata nĩ kana esũvĩane na ndaimoni?
Kuma tene, Aklĩsto ma wʼo nĩmeethĩĩtwe maileana na maũndũ ma ndaimoni. Somai Meko ma Atũmwa 19:19 na 1 Akolintho 10:21, na ĩndĩ mũineenea ĩkũlyo yĩĩ:
-
Nĩkĩ nĩ ũndũ wa vata kwananga syĩndũ syonthe ila wĩ nasyo ikonanĩtye na maveva mavuku?
6. Nũtonya kũmũsinda Satani na ndaimoni syake
Ndaimoni itongoewʼe nĩ Satani. Ĩndĩ alaĩka ala aĩkĩĩku matongoeawʼa nĩ ũla mũlaĩka mũnene wĩtawa Mikaeli, yĩla nĩ ĩsyĩtwa yĩngĩ ya Yesũ. We Mikaeli e vinya wĩana ata? Somai Ũvuanyʼo 12:7-9, na ĩndĩ mũineenea makũlyo aa:
-
Nũũ wĩ vinya mwingangĩ? Nĩ Mikaeli na alaĩka make-ĩ, kana nĩ Satani na ndaimoni syake?
-
We nũkwona aatĩĩi ma Yesũ ta maĩle kũmũkĩa Satani na ndaimoni syake?
Nũtonya kũmũsinda Satani na ndaimoni syake. Somai Yakovo 4:7, na ĩndĩ mũineenea ĩkũlyo yĩĩ:
-
Ũtonya kwĩka ata nĩ kana wĩsũvĩane na Satani na ndaimoni?
ANDŨ AMWE MAASYA: “Ti ũthũku kũthaũka mathaũ kana kwĩloela sinema syĩ na maũndũ makonetye maveva mavuku. Asu no maũndũ ma kwĩtanĩthya.”
-
Nĩkĩ woni ta ũsu ũtonya kũlikya mũndũ mũisyonĩ?
KĨLA TWEEMANYĨSYA
Alaĩka ala aĩkĩĩku nĩmatũtetheeasya. Ĩndĩ Satani na ndaimoni syake nĩ amaitha ma Yeova, na nĩmakengaa andũ maneenanyʼe na maveva mavuku.
Makũlyo ma Kũsyokeleela
-
Alaĩka ma Yeova matetheeasya andũ ata memanyĩsye ĩũlũ wake?
-
Satani na ndaimoni syake naaũ?
-
Nĩkĩ we ũkwenda kwĩvathana vyũ na maũndũ makonetye kũneenanyʼa na maveva mavuku?
MAŨNDŨ ANGĨ MA KWĨMANYĨSYA
Soma wone ũĩkĩĩthyo wa kana Yesũ nĩwe ũla mũlaĩka mũnene wĩtawa Mikaeli.
Soma ũmanye kana Ndevili nĩ kyũmbe kĩ kwʼo ĩndĩ ti o ũthũku wĩthĩawa nthĩnĩ witũ.
Soma wone kĩla kyatumie mũndũ mũka ũmwe aeka kũthĩnwʼa nĩ ndaimoni.
“Nĩwamanyie Kĩeleelo kya Kwĩthĩwa Thayũ” (Mũsyaĩĩsya, Ĩtukũ 1, Mwei wa 7, 1993)
Ĩmanyĩsye wone ũndũ Satani ũkengaa andũ melikye maũndũnĩ ma kũneenanyʼa na maveva mavuku.
“Ũwʼo Ĩũlũ wa Syama, Ũwe, na Ũoi” (Nzĩa ya Kũthi Thayũnĩ Ũtathela, kĩlungu kya 5)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
