TZOLOM 24

Anihebʼ li ánjel ut kʼaru nekeʼxbʼaanu?

XKʼEBʼAL CHI EKʼANK RIKʼIN

Li Jehobʼa naraj naq tqatzol chirix li xjunkabʼal li wank saʼ choxa, saʼ li junkabʼal aʼin wankebʼ li ánjel li nawbʼilebʼ ru joʼ: «Li ralal xkʼajol li Yos» (Génesis 6:2). Kʼaru naxye li Santil Hu chirixebʼ li ánjel? Chanru nekeʼokenk saʼ li qayuʼam? Ut ma chixjunilebʼ wankebʼ rikʼin li Yos?

1. Anihebʼ li ánjel?

Naq toj maajiʼ naxyiibʼ li Ruuchichʼochʼ, li Jehobʼa kixyobʼtesi ebʼ li ánjel. Ebʼ li ánjel wankebʼ saʼ choxa ut musiqʼejebʼ ajwiʼ joʼ li Jehobʼa (Hebreos 1:14). Wank chi miyon ebʼ li ánjel ut jalan jalanq xchaabʼil naʼlebʼebʼ (Apocalipsis 5:11). Aʼanebʼ nekeʼxpaabʼ «li rajom ut yoʼoon» wankebʼ «chi xkʼanjelankil li raatin» li Jehobʼa (Salmo 103:20). Junxil wank sut li Jehobʼa naxtaqla junaq li xʼánjel re xyeebʼal junaq li esil malaj re xtenqʼankil ut xkolbʼal li xtenamit. Saʼebʼ li qakutan ebʼ li ánjel nekeʼxbʼeresihebʼ li tzʼaqal aj paabʼanel re xtawbʼalebʼ li kristiʼaan li nekeʼraj xnawbʼal chirix li Jehobʼa.

2. Ani laj Tza ut ebʼ li maaʼus aj musiqʼej?

Wankebʼ li ánjel li xeʼxqʼet ribʼ chiru li Jehobʼa, li xbʼeen aʼan «li maaʼus ut aj tza nayeemank re: aʼan nabʼalaqʼink re chixjunil li ruuchichʼochʼ» (Apocalipsis 12:9). Laj Tza kiraj taqlank saʼ xbʼeenebʼ li junchʼol joʼkan naq kixbʼalaqʼi laj Adán ut li xʼEva ut moqon kixbʼaanu naq naabʼal ebʼ li ánjel teʼxqʼet ribʼ chiru li Jehobʼa. Ebʼ li ánjel li keʼxqʼet ribʼ nawbʼilebʼ ru joʼ li maaʼus aj musiqʼej. Li Jehobʼa kirisihebʼ chaq saʼ choxa ut kixkutebʼ saʼ Ruuchichʼochʼ ut moqon teʼsacheʼq chi junajwa (yaabʼasi Apocalipsis 12:9, 12).

3. Chanru nekeʼxyal qabʼalaqʼinkil laj Tza ut ebʼ li maaʼus aj musiqʼej?

Laj Tza ut ebʼ li maaʼus aj musiqʼej nekeʼxyal xbʼalaqʼinkil naabʼalebʼ li kristiʼaan rikʼin li tuulak, aʼin naxbʼaanu naq teʼaatinaq rikʼinebʼ li maaʼus aj musiqʼej. Jun eetalil, wankebʼ li qas qiitzʼin nekeʼxsikʼ ebʼ laj tuul, ebʼ laj qʼe, li nekeʼxtzʼili rix li chahim ut li uqʼej re rilbʼal li tkʼulmanq saʼ li kutan chalk re. Junchʼol chik nekeʼroksi li xnaʼlebʼebʼ li maaʼus aj musiqʼej re naq teʼkʼiraaq. Joʼkan ajwiʼ nekeʼxbʼaanu naq ebʼ li qas qiitzʼin teʼxkʼoxla naq teʼruuq aatinak rikʼinebʼ li kamenaq. Li Jehobʼa naxye qe: «Meerulaʼanihebʼ li nekeʼaatinak rikʼinebʼ li musiqʼej chi moko ebʼ laj qʼe» (Levítico 19:31). Aʼan naraj qakolbʼal chiru laj Tza ut ebʼ li maaʼus aj musiqʼej. Xbʼaan naq aʼanebʼ xikʼ nekeʼril li Yos ut nekeʼraj qarahobʼtesinkil.

QASIKʼAQ XCHAMAL LI NAʼLEBʼ

Aatinaqo chirix li chaabʼil naʼlebʼ li nekeʼxbʼaanu ebʼ li ánjel ut chirix li chʼaʼajkilal li naru naxkʼam chaq saʼ qabʼeen li tuulak ut li qʼehink ut chanru tqakol qibʼ chiru laj Tza ut ebʼ li maaʼus aj musiqʼej.

4. Ebʼ li ánjel nekeʼxtenqʼa ebʼ li qas qiitzʼin chi xnawbʼal ru li Jehobʼa

Ebʼ li ánjel moko nekeʼxye ta li chaabʼil esil rehebʼ li qas qiitzʼin, nekeʼxbʼeresihebʼ bʼan li tzʼaqal aj paabʼanel re naq teʼxtawebʼ li kristiʼaan li nekeʼraj xnawbʼal ru li Jehobʼa. Cheeyaabʼasi Apocalipsis 14:6, 7 ut chexʼaatinaq chirix ebʼ li patzʼom aʼin:

Kʼaʼut naʼajmank naq ebʼ li ánjel tooʼeʼxtenqʼa naq naqakʼe chi naweʼk li chaabʼil esil?
Ma nasahoʼk saʼ laachʼool xnawbʼal naq ebʼ li ánjel naru nakateʼxbʼeresi chi xtawbʼalebʼ li kristiʼaan li nekeʼraj rabʼinkil chirix li Santil Hu? Kʼaʼut?

5. Tzʼeqtaana li qʼehink ut li tuulak

Laj Tza ut ebʼ li maaʼus aj musiqʼej xikʼ nekeʼril li Jehobʼa ut xikʼ ajwiʼ nokooʼeʼril. Cheeyaabʼasi Lucas 9:38-42 ut chexʼaatinaq chirix li patzʼom aʼin:

Kʼaru nekeʼxbʼaanu ebʼ li maaʼus aj musiqʼej rehebʼ li poyanam?

Inkʼaʼ naqaj xkʼebʼal xnaʼaj laj Tza saʼ li qayuʼam. Cheeyaabʼasi Deuteronomio 18:10-12 ut chexʼaatinaq chirix ebʼ li patzʼom aʼin:

Kʼaru naxbʼaanu laj Tza ut ebʼ li maaʼus aj musiqʼej re naq tootʼaneʼq saʼ ruqʼebʼ? Kʼaru nakaawil laaʼat naq nekeʼxbʼaanu li kristiʼaan saʼ laateep?
Kʼaru nakaakʼoxla, ma us tawiʼ naq li Jehobʼa naxye qe naq inkʼaʼ tootzʼaqonq saʼ li xnaʼlebʼebʼ li maaʼus aj musiqʼej? Kʼaʼut?

Cheerilaq li BʼIDEO ut chexʼaatinaq chirix ebʼ li patzʼom aʼin:

BʼIDEO: «Kawaqex chiru laj Tza» (5:02)

Kʼaru nakaakʼoxla, ma xiwxiw tawiʼ li kixbʼakʼ li xPalesa chiru li ruqʼ li xkoʼ? Kʼaʼut?
Kʼaru kixbʼaanu li xPalesa re xkolbʼal ribʼ chiruhebʼ li maaʼus aj musiqʼej?

Ebʼ li tzʼaqal aj paabʼanel junelik nekeʼxyal xqʼe chiruhebʼ li maaʼus aj musiqʼej. Cheeyaabʼasi Hechos 19:19 ut 1 Corintios 10:21 ut chexʼaatinaq chirix li patzʼom aʼin:

Kʼaʼut aajel ru naq taakʼat chixjunil li naxchap ribʼ rikʼin li qʼehink ut li tuulak?

6. Qʼax ru laj Tza ut ebʼ li maaʼus aj musiqʼej

Laj Tza najolomink rehebʼ li maaʼus aj musiqʼej. Abʼan ebʼ li chaabʼil ánjel nekeʼjolomiik xbʼaan li arkánjel Miguel, joʼkaʼin ajwiʼ nakʼabʼaʼiik li Jesús. Ma qʼaxal kaw ribʼ laj Miguel? Cheeyaabʼasi Apocalipsis 12:7-9 ut chexʼaatinaq chirix ebʼ li patzʼom aʼin:

Anihebʼ li qʼaxal kawebʼ ribʼ, laj Miguel ut ebʼ li xʼánjel malaj laj Tza ut ebʼ li maaʼus aj musiqʼej?
Kʼaru nakaakʼoxla, ma teʼxuwaq chiru laj Tza ut ebʼ li maaʼus aj musiqʼej ebʼ li tzʼaqal aj paabʼanel?

Naru naqaqʼax ruhebʼ laj Tza ut ebʼ li maaʼus aj musiqʼej. Cheeyaabʼasi Santiago 4:7 ut chexʼaatinaq chirix li patzʼom aʼin:

Kʼaru taabʼaanu re xkolbʼal aawibʼ chiru laj Tza ut ebʼ li maaʼus aj musiqʼej?

WIIBʼ OXIBʼ NEKEʼXYE: «Moko xiwxiw ta bʼatzʼunk malaj rilbʼal ebʼ li pelikula chirixebʼ li maaʼus aj musiqʼej».

Kʼaʼut xiwxiw kʼoxlak chi joʼkan?

LI AK XQATZOL

Ebʼ li chaabʼil ánjel nokooʼeʼxtenqʼa. Laj Tza ut ebʼ li maaʼus aj musiqʼej xikʼ nekeʼril li Jehobʼa ut nekeʼroksi li qʼehink ut li tuulak re xbʼalaqʼinkilebʼ li qas qiitzʼin.

Qajultikaq

Kʼaru nekeʼxbʼaanu ebʼ li chaabʼil ánjel re naq ebʼ li kristiʼaan teʼxnaw ru li Jehobʼa?
Ani laj Tza ut ebʼ li maaʼus aj musiqʼej?
Kʼaʼut tento taatzʼeqtaana chixjunil li nachalk rikʼin li qʼehink ut li tuulak?

Li tzolom xraqmank saʼ li kutan:

Bʼaanu aʼin

Kʼoxla ma wank saʼ laawochoch yalaq kʼaru li naxchap ribʼ rikʼin li qʼehink ut li tuulak ut tzʼaama re li Jehobʼa naq tixkʼe aanaʼlebʼ re naq taanaw kʼaru taabʼaanu rikʼin.

Malaj aʼin:

Malaj aʼin