LYNNONG 24

Kaei ka Jingshisha Shaphang ki Angel?

TEM

U Blei Jehobah u kwah ba ngin tip shaphang ka longïing jong u kaba don ha bneng. Kata ka longïing ka kynthup ïa ki angel, ba la khot “ki khun U Blei.” (Job 38:7) Ka Baibl ka ong aïu shaphang ki angel? Hato ki lah ban ïarap ïa ngi? Bad hato ka longïing jong U Blei ka kynthup ïa ki angel baroh?

1. Ki angel ki dei kiei?

U Jehobah u la thaw ïa ki angel shuwa ban thaw ïa ka pyrthei. Ki ruh ki long ki mynsiem kiba im ha bneng. (Hebru 1:14) Ki don da ki klur ngut ki angel, bad uwei pa uwei na ki u long uba kyrpang. (Jingpynpaw 5:11) Ki angel ki ‘pyndep ïa ka ktien jong [U Jehobah], da kaba sngap ïa ka ktien jong u.’ (Salm 103:20) Ha ki por ba mynshuwa, U Jehobah u la pyndonkam da ki angel ban phah khubor bad ban ïarap ïa ki briew jong u. Mynta ruh, ki angel ki ïarap ïa ki Khristan ban shem ïa kito kiba kwah ban tip shaphang U Blei.

2. U Soitan bad ki ksuid jong u ki dei kiei?

Don ki angel kiba khlem ïaineh hok ha U Jehobah. U angel uba ïaleh pyrshah nyngkong eh u dei uta “uba la khot u Ksuid, bad u Soitan, uba shukor ïa ka pyrthei baroh kawei.” (Jingpynpaw 12:9) U Soitan u la kwah ban synshar halor kiwei, te u la pynshoi ïa ki briew kiba nyngkong bad hadien pat ïa kiwei de ki angel ban ïaleh pyrshah lang bad u. Ïa kita ki angel ba ïaleh pyrshah la khot ki ksuid. U Jehobah u la beh noh ïa kita ki angel na bneng sha pyrthei, bad kin sa shah pynjot.—Pule Jingpynpaw 12:9, 12.

3. Kumno u Soitan bad ki ksuid ki pyrshang ban ïalam bakla ïa ngi?

U Soitan bad ki ksuid ki pyrshang ban ïalam bakla ïa bun ngut ki briew lyngba ka jingaiksuid, ne ka jingleh byrtong, kaba long ka jingmlien kaba sniew kaba pyrshang ban ïakren bad ki mynsiem ksuid. Kum ka nuksa, don kiba leit sha ki nongbatai ïa ka lawei, kiba peit kti, peit kot ne ba phah sumar da kaba shu kñia ne phah duwai. Don ruh ki briew kiba la shah pynngop ban ngeit ba ki lah ban kren bad kiba la ïap. Hynrei U Jehobah u maham ïa ngi: “Wat phai sha ki nongkren blei, lymne sha ki nongkren byrtong.” (Lebitikos 19:31) U la ai ïa ngi kane ka jingmaham ban ïada ïa ngi na u Soitan bad ki ksuid. Kine ki dei ki nongshun jong U Blei, bad ki kwah ban pynjynjar ïa ngi.

WAD SHUH SHUH

Pule shaphang kiei kiei kiba bha kiba ki angel ki leh, ka jingma jong ka jingleh byrtong, bad kumno ngi lah ban ïada ïalade na u Soitan bad ki ksuid.

4. Ki angel ki ïarap ïa ki briew ban tip shaphang U Jehobah

Ki angel kim ju ïalap ha ki briew. Hynrei ki ïarap ïa ki briew jong U Blei ban ïakynduh bad kito kiba kwah ban tip shaphang jong u. Pule Jingpynpaw 14:6, 7, bad nangta sa ïa peit lang ïa kine ki jingkylli harum:

Balei ngi donkam ïa ka jingïarap jong ki angel ban ïalap?
Hato ka ai mynsiem ne em ïa phi ban tip ba ki angel ki lah ban ïalam ïa phi ban ïakynduh ïa ki briew kiba kwah ban tip shaphang ka Baibl? Balei?

5. Kyntait ïa ka jingleh byrtong

U Soitan bad ki ksuid ki dei ki nongshun jong U Jehobah. Ki dei ruh ki nongshun jong ngi. Pule Loukas 9:38-42, bad nangta sa ïa peit lang ïa kane ka jingkylli harum:

Ki ksuid ki leh kumno ïa ki briew?

Ngim kwah ban khring ïa ki ksuid ha ka jingim jong ngi. Pule Deuteronomi 18:10-12, bad nangta sa ïa peit lang ïa kine ki jingkylli harum:

Ha kino ki rukom ki ksuid ki pyrshang ban teh lakam ïa ngi bad ban kren bad ngi? Kum kiei ki jingleh byrtong kiba phi ju ïohi ne ïohsngew ba ki briew ki leh ha ka shnong jong phi?
Hato phi sngew ïahap ïa ki daw ba U Jehobah u khang ïa ngi ban leh byrtong? Balei?

Peit ïa ka VIDEO, bad nangta sa ïa peit lang ïa kine ki jingkylli harum:

VIDEO: “Ïaleh Pyrshah ïa u Soitan” (5:02) (Phareng)

Hato ka jingdeng ba la pyndeng da i Palesa ha ka kti i khun jong i ka long kaba sniew? Balei?
Kaei kaba i Palesa i dei ban leh khnang ban ïoh jingïada na ki ksuid?

Barobor ki Khristan bashisha ki ïaleh pyrshah ïa ki ksuid. Pule Kam 19:19 bad 1 Korinth 10:21, bad nangta sa ïa peit lang ïa kane ka jingkylli harum:

Balei ka long kaba kongsan ban pynduh ïa kiei kiei kiba don jingïadei bad ka jingleh byrtong?

6. Phi lah ban jop pyrshah ïa u Soitan bad ki ksuid jong u

Ïa ki ksuid la synshar da u Soitan. Hynrei ïa ki angel ba ïaineh la pynïaid da u angel rangbah uba kyrteng u Mikhal, ba la tip ruh kum u Jisu. Haduh katno u Mikhal u long uba khlaiñ? Pule Jingpynpaw 12:7-9, bad nangta sa ïa peit lang ïa kine ki jingkylli harum:

Mano ba kham khlaiñ? U Mikhal bad ki angel jong u ne u Soitan bad ki ksuid jong u?
Hato phi tharai ba ki nongbud jong u Jisu ki donkam ban sheptieng ïa u Soitan bad ki ksuid jong u?

Phi lah ban jop ïa ka jingleh pyrshah jong u Soitan bad ki ksuid jong u. Pule Jakob 4:7, bad nangta sa ïa peit lang ïa kane ka jingkylli harum:

Kumno phi lah ban ïada ïalade na u Soitan bad ki ksuid?

DON KIBA ONG: “Kam lei lei ban shu peit kai ïa ki phlim ksuid. Ka dei tang ka jingpynbyrngia.”

Balei kum kata ka jingpyrkhat ka long kaba ma?

KI MAT BAKONGSAN

Ki angel babha ki ïarap ïa ngi. U Soitan bad ki ksuid ki dei ki nongshun jong U Jehobah, bad ki pyndonkam da ka jingleh byrtong ban ïalam bakla ïa ki briew.