LUFUNJISHO 24

Bamalaika bo Bañanyi Kabiji Bengila Ñanyi Mwingilo?

JIZHAI

Yehoba ukeba’mba tuyuke kisemi kyanji kiji mwiulu. Mu kikye kisemi muji bamalaika batelwa ne kuba’mba “baana ba Lesa.” (Yoba 38:7) Nanchi Baibolo waambapo’mba ka pa bamalaika? Abya bakwasha bantu nyi? Nanchi bamalaika bonse baji mu kisemi kya Lesa nyi?

1. Bamalaika bo bañanyi?

Yehoba walengele bamalaika patanshi saka akyangye kulenga ntanda. Byonkatu biji Yehoba, bamalaika ke bilengwa bya mupashi bibula kumweka kabiji bekala mwiulu. (Bahebelu 1:14) Kuji bamalaika bavula bingi kabiji bonse kechi bajitu mutundu umotu ne. (Lumwekesho 5:11) Bamalaika “boba byo amba [Yehoba] ne kukookela jiwi janji.” (Salamo 103:20) Bimye bimo kala, Yehoba watumanga bamalaika kuya na kubuula bantu mikambizho yanji, kukwasha ne kupokolola bantu banji. Lelo jino, bamalaika batangijila bena Kilishitu kuya ku bantu babena kukeba kufunda pe Lesa.

2. Satana ne bandemona banji bo bañanyi?

Bamalaika bamo kechi batwajijile kwikala bakishinka kwi Yehoba ne. Malaika mutanshi wasatukile “utelwa’mba Diabola kabiji Satana, yenka ubena kujimbaika bantu ba pano pa ntanda ponse.” (Lumwekesho 12:9) Satana wakebelenga’mba atangijilenga bantu. Onkao mambo, waongwele Adama ne Evwa ne bamalaika bakwabo kuba’mba basatukile Yehoba. Abano bamalaika basatukile batelwa’mba bandemona. Yehoba wibapangilemo mwiulu ne kwibataya pano pa ntanda kabiji ukebonauna.—Tangai Lumwekesho 12:9, 12.

3. Nanchi Satana ne bandemona babena kwitongola byepi?

Satana ne bandemona babena kwingijisha kupopwela mipashi ne mashindatu akwabo kongwelamo bantu bavula bingi. Bantu bamo bepuzha bashayuka batubangabanga, bepuzha bamba bintu bikamweka kulutwe, baya ku bañanga babikishi ne ku bañangatu bakwabo. Bakwabo bakeba michi ya kubukilwamo yavwangamo kupopwela mipashi. Satana ne bandemona bajimbaika bantu amba bakonsha kwisamba na bantu bafwa. Bino Yehoba witujimunako kuba’mba: “Kechi wafwainwa kuya ku bantu besamba na mipashi nangwa bamba bikamweka kulutwe ne.” (Bena Levi 19:31) Yehoba watwajijila kwitujimunako, mambo ukeba kwitupokolola kwi Satana ne bandemona banji. Satana ne bandemona ke balwanyi ba Lesa. Kabiji Satana ne bandemona bakeba bingi kwitukatazha.

FUNJILAIPO BIKWABO

Yukai bintu byawama byuba bamalaika ne ene mambo o kyatamina kupopwela mipashi ne byo twafwainwa kwizhikijila kwi Satana ne bandemona banji.

4. Bamalaika bakwasha bantu kufunda pe Yehoba

Bamalaika ba Lesa kechi bo baya na kusapwila ku bantu ne. Pakuba batangijila bantu ba Lesa ku bantu bakeba kufunda pe aye. Tangai Lumwekesho 14:6, 7, ne kwisamba ano mepuzho:

Mambo ka o tukebela bamalaika kwitukwasha mu mwingilo wa kusapwila?
Nanchi kechi kimutundaika kuyuka’mba bamalaika betutangijila ku bantu bakeba kufunda bukine nenyi? Mambo ka o mwakumbwila byobyo?

5. Kanai kupopwela mipashi

Satana ne bandemona balwanyi ba Yehoba. Ne atwebatu balwanyi betu. Tangai Luka 9:38-42, ne kwisamba buno bwipuzho:

Ñanyi bintu bandemona byo boba ku bantu?

Kange twisulwe kuswisha bandemona kwitubuulanga bya kuba mu bwikalo bwetu ne. Tangai Mpitulukilo ya mu Mizhilo 18:10-12, ne kwisamba ano mepuzho:

Mu ñanyi mashinda bandemona mo betujimbaikila ne kwisamba ne atweba? Ñanyi bintu byuba bantu ku mpunzha ko mwikala bimwesha kupopwela mipashi?
Abya mwakonsha kwamba’mba kijitu bulongo Yehoba byo akanya kupopwela mipashi nyi? Mwakumbwila ka byobyo?

Tambai VIDYO, ne kwisamba ano mepuzho.

VIDYO: “Mukanai Diabola” (5:02)

Nanchi kyawamine ba Palesa byo bavwikile mwanabo wamukazhi mapingo nyi? Mambo ka o mwaambila byobyo?
Ñanyi kintu kyafwainwe kuba ba Palesa pa kuba’mba bezhikijile ku bandemona?

Bena Kilishitu ba kine bakanatu nsalansala bandemona. Tangai Byubilo 19:19 ne 1 Kolinda 10:21, ne kwisamba buno bwipuzho:

Mambo ka o kyawamina kusoka bintu byonsetu byo muji nabyo bitundaika kupopwela mipashi?

6. Mukanai Satana ne bandemona banji

Bandemona bebatangijila kwi Satana. Pakuba bamalaika bakishinka bebatangijila kwi Mikela malaika mwine mukatampe, ajino jo jizhina jikwabo ja kwa Yesu. Ñanyi bulume buji ne Mikela? Tangai Lumwekesho 12:7-9, ne kwisamba ano mepuzho:

Nanchi wepi uji na bulume bukatampe, Mikela na bamalaika banji nyi, inyi Satana ne bandemona banji?
Nanchi baana ba bwanga ba kwa Yesu bafwainwa kuchina Satana ne bandemona banji nyi?

Mwakonsha kushinda Satana ne bandemona banji. Tangai Yakoba 4:7, ne kwisamba buno bwipuzho: