တၢ်မၤလိ ၂၄
တၢ်မ့ၢ်တၢ်တီ ဘၣ်ဃးဒီးမူခိၣ်ကလူးတဖၣ်
ယဟိဝၤယွၤ အဲၣ်ဒိးလၢ ပကသ့ၣ်ညါဘၣ်ဃးဒီး အဒူၣ်ဖိထၢဖိလၢ အအိၣ်လၢမူခိၣ်တဖၣ် အဂ့ၢ်လီၤ. လၢကစၢ်ယွၤ အဒူၣ်ဖိထၢဖိအကျါန့ၣ် ပၣ်ဃုာ်ဒီး မူခိၣ်ကလူးတဖၣ် ဒီးအဝဲသ့ၣ်န့ၣ် ဘၣ်တၢ်ကိးအီၤလၢ “ကစၢ်ယွၤ အဖိခွါတဖၣ်.” (ယိၤဘး ၃၈:၇) ဘၣ်ဃးဒီး မူခိၣ်ကလူးန့ၣ် လံာ်စီဆှံတဲဝဲဒ်လဲၣ်. မူခိၣ်ကလူးတဖၣ် မၤတၢ်မနုၤလဲၣ်. မူခိၣ်ကလူးခဲလၢာ်န့ၣ် ပၣ်ဃုာ်လၢ ကစၢ်ယွၤ အဒူၣ်ဖိထၢဖိအကျါဧါ. ခဲအံၤပကတဲသကိး.
၁. မူခိၣ်ကလူးန့ၣ် မ့ၢ်မတၤတဖၣ်လဲၣ်.
တချုးလၢ ယဟိဝၤယွၤ တ့လီၤဟီၣ်ခိၣ်ဒံးဘၣ်န့ၣ် အဝဲတ့လီၤဆိဝဲ မူခိၣ်ကလူးတဖၣ်. ဒ်ယဟိဝၤယွၤအသိး မူခိၣ်ကလူးတဖၣ်န့ၣ် အိၣ်လၢမူခိၣ် ဒီးအဝဲသ့ၣ်ကဲဝဲ ပှၤနီၢ်သးဖိ လၢပထံၣ်အီၤတသ့ဘၣ်. (ဧ့ၤဘြံၤ ၁:၁၄) မူခိၣ်ကလူးတဖၣ်န့ၣ် အနီၣ်ဂံၢ်အိၣ်ဝဲ အကကွဲၢ်လၢ အကယၤတဖၣ်ညါ ဒီးအဝဲသ့ၣ် တဂၤဒီးတဂၤန့ၣ် လီၤဆီလိာ်အသး. (လီၣ်ဖျါ ၅:၁၁) တကးဒံးဘၣ် အဝဲသ့ၣ် “ဒိကနၣ် ဒီးမၤထွဲ [ယဟိဝၤယွၤ] အကလုၢ်.” (စံးထီၣ်ပတြၢၤ ၁၀၃:၂၀) လၢပျၢၤန့ၣ် တဘျီတခီၣ် ယဟိဝၤယွၤသူဝဲ မူခိၣ်ကလူးတဖၣ် လၢကတဲဖျါထီၣ်ဝဲ တၢ်ကစီၣ်, ကဆီၣ်ထွဲမၤစၢၤ ဒီးမၤပူၤဖျဲးဝဲ ကစၢ်ယွၤအပှၤဂီၢ်မုၢ်. မုၢ်မဆါတနံၤအံၤစ့ၢ်ကီး မူခိၣ်ကလူးတဖၣ် ဟံးစုနဲၣ်ကျဲဝဲ ကစၢ်ယွၤအခ့အပှၤတဖၣ် ဒ်သိးအဝဲသ့ၣ် ကထံၣ်လိာ်သးဒီးပှၤလၢ အအဲၣ်ဒိးမၤလိ ကစၢ်ယွၤအဂ့ၢ်.
၂. မုၣ်ကီၤလံၢ် ဒီးအတၢ်ဝံတၢ်နါန့ၣ် မ့ၢ်မတၤတဖၣ်လဲၣ်.
မူခိၣ်ကလူးတနီၤန့ၣ် အတသးတီဒီး ယဟိဝၤယွၤလၢၤဘၣ်. မူခိၣ်ကလူး အဆိကတၢၢ်တဂၤ လၢအထီဒါက့ၤတၢ်န့ၣ် “ဘၣ်တၢ်ကိးအီၤလၢ မုၣ်ကီၤလံၢ် ဒီးစၤတၣ် လၢအဆှၢကမၣ် ပှၤဟီၣ်ခိၣ်ဖိခဲလၢာ်.” (လီၣ်ဖျါ ၁၂:၉) မုၣ်ကီၤလံၢ်န့ၣ် အဲၣ်ဒိးပၢပှၤဂၤအဃိ အဝဲကွဲန့ၢ်လွဲန့ၢ်ဝဲ နီၢ်အံၣ်အု ဒီးစီၤအၤဒၣ်. ဒီးလၢခံန့ၣ် အကွဲန့ၢ်လွဲန့ၢ်စ့ၢ်ကီး မူခိၣ်ကလူးအဂၤတဖၣ် ဒ်သိးအဝဲသ့ၣ် သုတဒိကနၣ် ယဟိဝၤယွၤ အကလုၢ်လၢၤတဂ့ၤ. အဃိ မူခိၣ်ကလူးလၢ အထီဒါက့ၤတၢ်တဖၣ်န့ၣ် ဘၣ်တၢ်ကိးက့ၤအီၤလၢ တၢ်ဝံတၢ်နါ. ဒီးယဟိဝၤယွၤ ကွံာ်လီၤအဝဲသ့ၣ် လၢဟီၣ်ခိၣ်ချၢ ဒီးခါဆူညါန့ၣ် အဝဲသ့ၣ် ကဘၣ်တၢ်မၤဟးဂီၤကွံာ်အီၤလီၤ.—ဖး လီၣ်ဖျါ ၁၂:၉, ၁၂.
၃. မုၣ်ကီၤလံၢ် ဒီးအတၢ်ဝံတၢ်နါတဖၣ် ဂုာ်ကျဲးစၢး ကွဲန့ၢ်လွဲန့ၢ်ပှၤဒ်လဲၣ်.
မုၣ်ကီၤလံၢ် ဒီးအတၢ်ဝံတၢ်နါတဖၣ် ကွဲန့ၢ်လွဲန့ၢ်ပှၤအါဂၤ ခီဖျိ တၢ်ဝံတၢ်နါ အတၢ်ဖံးတၢ်မၤ. တၢ်ဝံတၢ်နါ အတၢ်ဖံးတၢ်မၤန့ၣ် အဲၣ်ဒိးတဲဝဲ ပှၤလၢ အမၤဘၣ်ဃးအသးဒီး တၢ်ဝံတၢ်နါတဖၣ် လၢအနီၢ်ကစၢ် မ့တမ့ၢ် မၤဝဲခီဖျိ ပှၤအဂၤဒ်သိးဒီး တၢ်ဝံတၢ်နါအသရၣ်. ဘၣ်ဆၣ် ပှၤတနီၤလၢအမၤဝဲ တၢ်ဝံတၢ်နါ အတၢ်ဖံးတၢ်မၤတဖၣ်အံၤန့ၣ် တသ့ၣ်ညါဝဲလၢ အမၤဘၣ်ဃးအသးဒီး တၢ်ဝံတၢ်နါဘၣ်. အဒိ ပှၤတနီၤန့ၣ် လဲၤသံကွၢ်တၢ်လၢ ပှၤဒွးတၢ်ကၢ်တၢ် မ့တမ့ၢ် ပှၤတဲဆိပာ်စၢၤတၢ်တဖၣ်အအိၣ်. ဒီးပှၤအဂၤတနီၤန့ၣ် ဒ်သိး အကဘှီဘျါအသးအဂီၢ် အဝဲသ့ၣ် ဃ့တၢ်မၤစၢၤလၢ သရၣ်လၢ အအူတၢ်သမူတၢ်အအိၣ်. မ့မ့ၢ်ပှၤအဂၤတနီၤန့ၣ် ပှၤလံၣ်န့ၢ်လီန့ၢ်အီၤလၢ အဝဲသ့ၣ် တဲတၢ်ဒီး ပှၤသံသ့. ဘၣ်ဆၣ် ယဟိဝၤယွၤ ဟ့ၣ်ပလီၢ်ပှၤလၢ “သုတဘၣ်ဃၣ်သုသး ဆူပှၤလၢ အဆဲးကျိးဒီးပှၤသံတဂ့ၤ. ဒီးသုတဘၣ်သံကွၢ်တၢ်လၢ ပှၤလၢအဟီဆိပာ်စၢၤတၢ် အအိၣ်တဂ့ၤ.” (၃ မိၤၡ့ ၁၉:၃၁) မုၣ်ကီၤလံၢ် ဒီးအတၢ်ဝံတၢ်နါတဖၣ်န့ၣ် မ့ၢ်ဝဲ ကစၢ်ယွၤအဒုၣ်အဒါ ဒီးအဝဲသ့ၣ် အဲၣ်ဒိးမၤဘၣ်ဒိပှၤအဃိ ကစၢ်ယွၤ ဟ့ၣ်ပလီၢ်ပှၤ တၢ်ဟ့ၣ်ပလီၢ်တခါအံၤ ဒ်သိးကဒီသဒၢပှၤလၢ မုၣ်ကီၤလံၢ် ဒီးအတၢ်ဝံတၢ်နါတဖၣ်အအိၣ်.
ဃုသ့ၣ်ညါအါထီၣ်
ခဲအံၤ ပကမၤလိဘၣ်ဃးဒီး တၢ်အဂ့ၤတဖၣ်လၢ မူခိၣ်ကလူးတဖၣ်မၤဝဲ, တၢ်ဝံတၢ်နါ အတၢ်ဖံးတၢ်မၤတဖၣ်န့ၣ် လီၤဘၣ်ယိၣ်ထဲလဲၣ် ဒီးပဒီသဒၢပသးလၢ မုၣ်ကီၤလံၢ် ဒီးအတၢ်ဝံတၢ်နါတဖၣ် ကသ့ဒ်လဲၣ်.
၄. မူခိၣ်ကလူးတဖၣ် မၤစၢၤဝဲ ပှၤဟီၣ်ခိၣ်ဖိ ဒ်သိး ပှၤဟီၣ်ခိၣ်ဖိ ကမၤလိဘၣ် ယဟိဝၤယွၤအဂ့ၢ်
ကစၢ်ယွၤ အမူခိၣ်ကလူးတဖၣ် တစံၣ်တဲၤတဲလီၤတၢ်လၢ အနီၢ်ကစၢ်ဘၣ်. သနာ်က့ အဝဲသ့ၣ် ဟံးစုနဲၣ်ကျဲဝဲ ကစၢ်ယွၤ အခ့အပှၤတဖၣ် ဒ်သိးကထံၣ်လိာ်သးဒီး ပှၤလၢ အအဲၣ်ဒိးမၤလိ ကစၢ်ယွၤအဂ့ၢ်. ဖး လီၣ်ဖျါ ၁၄:၆, ၇ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ဖဲပစံၣ်တဲၤတဲလီၤတၢ်အခါ ဘၣ်မနုၤအဃိ ပလိၣ်ဘၣ် မူခိၣ်ကလူး အတၢ်မၤစၢၤလဲၣ်.
-
ဖဲနသ့ၣ်ညါလၢ မူခိၣ်ကလူး ဟံးစုနဲၣ်ကျဲနၤ ဒ်သိးနကထံၣ်လိာ်သးဒီး ပှၤလၢအအဲၣ်ဒိးကနၣ် လံာ်စီဆှံအတၢ်ကစီၣ်အခါ နသးခုဧါ. ဘၣ်မနုၤအဃိ နသးခုလဲၣ်.
၅. မၤဘၣ်ဃးနသးဒီး တၢ်ဝံတၢ်နါ အတၢ်ဖံးတၢ်မၤတဂ့ၤ
မုၣ်ကီၤလံၢ် ဒီးအတၢ်ဝံတၢ်နါတဖၣ်န့ၣ် မ့ၢ်ဝဲ ယဟိဝၤယွၤ အဒုၣ်အဒါ. ဒီးအဝဲသ့ၣ် မ့ၢ်စ့ၢ်ကီး ပဒုၣ်ပဒါ. ဖး လူၤကၣ် ၉:၃၈-၄၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
တၢ်ဝံတၢ်နါ မၤကီမၤခဲ ပှၤဟီၣ်ခိၣ်ဖိဒ်လဲၣ်.
ပတအဲၣ်ဒိးပျဲ တၢ်ဝံတၢ်နါ လံၣ်န့ၢ်လီန့ၢ်ပှၤဘၣ်. ဖး ၅ မိၤၡ့ ၁၈:၁၀-၁၂ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
တၢ်ဝံတၢ်နါတဖၣ် ဂုာ်ကျဲးစၢး လံၣ်န့ၢ်လီန့ၢ်ပှၤ ဒီးမၤဘၣ်ဃးအသးဒီးပှၤ လၢကျဲဒ်လဲၣ်. လၢနအိၣ်တၢ်လီၢ်န့ၣ် တၢ်ဝံတၢ်နါ အတၢ်ဖံးတၢ်မၤ လၢပှၤမၤဝဲအါန့ၣ် မ့ၢ်ဝဲဖဲလဲၣ်တခါလဲၣ်.
-
ဘၣ်မနုၤအဃိ ယဟိဝၤယွၤ တအဲၣ်ပမၤ တၢ်ဝံတၢ်နါ တၢ်ဖံးတၢ်မၤဘၣ်လဲၣ်. နဆိကမိၣ် ယဟိဝၤယွၤ အတၢ်မၤလိာ်အံၤ ကြၢးဝဲဘၣ်ဝဲဧါ.
ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
-
တၢ်လၢ ဖလံစၤ စၢဃာ်ဝဲလၢ အဖိမုၣ်အစုလိၤန့ၣ် နဆိကမိၣ် အလီၤဘၣ်ယိၣ်ဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.
-
ဒ်သိး ဖလံစၤ ကဒီသဒၢလီၤအသးလၢ တၢ်ဝံတၢ်နါအဂီၢ် အဝဲဘၣ်မၤမနုၤလဲၣ်.
ခရံာ်ဖိ အမ့ၢ်အတီတဖၣ် ထီဒါဝဲ တၢ်ဝံတၢ်နါထီဘိလီၤ. ဖး မၤတၢ် ၁၉:၁၉ ဒီး ၁ ကရံၣ်သူး ၁၀:၂၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဘၣ်မနုၤအဃိ အရ့ဒိၣ်လၢ နကဘၣ်မၤဟးဂီၤကွံာ် နတၢ်ဖိတၢ်လံၤ တမံၤဂ့ၤတမံၤဂ့ၤ လၢအဘၣ်ဃးဒီး တၢ်ဝံတၢ်နါ အတၢ်ဖံးတၢ်မၤန့ၣ်လဲၣ်.
၆. ထီဒါဆၢက့ၤ မုၣ်ကီၤလံၢ် ဒီးအတၢ်ဝံတၢ်နါတဖၣ်
မုၣ်ကီၤလံၢ်န့ၣ် ပၢဝဲတၢ်ဝံတၢ်နါတဖၣ်. မ့မ့ၢ် မူခိၣ်ကလူးအခိၣ် မံၤက့လးန့ၣ် ဟံးစုနဲၣ်ကျဲဝဲ မူခိၣ်ကလူး လၢအသးတီတဖၣ်. တၢ်လၢ မံၤက့လးန့ၣ် မ့ၢ်ဝဲ ယ့ၣ်ၡူးအမံၤ လၢအဂၤတဖျၢၣ်. မံၤက့လးန့ၣ် အစိအကမီၤ ဒိၣ်ထဲလဲၣ်. ဖး လီၣ်ဖျါ ၁၂:၇-၉ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
မံၤက့လး ဒီးအမူခိၣ်ကလူးတဖၣ် မ့တမ့ၢ် မုၣ်ကီၤလံၢ် ဒီးအတၢ်ဝံတၢ်နါတဖၣ်န့ၣ် အစိအကမီၤဒိၣ် ဖဲလဲၣ်တဒူၣ်လဲၣ်.
-
ပဝဲလၢအမ့ၢ် ယ့ၣ်ၡူးအပျဲၢ်အဘီၣ်န့ၣ် ပကြၢးပျံၤ မုၣ်ကီၤလံၢ် ဒီးတၢ်ဝံတၢ်နါတဖၣ်ဧါ.
နမၤနၢၤ မုၣ်ကီၤလံၢ် ဒီးအတၢ်ဝံတၢ်နါတဖၣ်သ့. ဖး ယၤကိာ် ၄:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
နဒီသဒၢလီၤနသးလၢ မုၣ်ကီၤလံၢ် ဒီးအတၢ်ဝံတၢ်နါတဖၣ် သ့ဒ်လဲၣ်.
ပှၤတနီၤတဲဝဲလၢ– “နလိာ်ကွဲ ဝံၣ်ဒံၣ်အိၣ်က့(မ်) မ့တမ့ၢ် နကွၢ်တၢ်ဂီၤမူ လၢအဘၣ်ဃးဒီး တၢ်ဝံတၢ်နါန့ၣ် တဘၣ်တၢ်နီတမံၤဘၣ်, အကဲတၢ်လိာ်ကွဲလီၤ.”
-
တၢ်ဆိမိၣ်တခါအံၤ ဘၣ်မနုၤအဃိ အလီၤဘၣ်ယိၣ်လဲၣ်.
တၢ်ဂ့ၢ်လၢအရ့ဒိၣ်
မူခိၣ်ကလူး လၢအသးတီတဖၣ်န့ၣ် မၤစၢၤပှၤ. မ့မ့ၢ် မုၣ်ကီၤလံၢ် ဒီးအတၢ်ဝံတၢ်နါတဖၣ်န့ၣ် ကဲဝဲ ယဟိဝၤယွၤ အဒုၣ်အဒါ ဒီးအဝဲသ့ၣ် သူဝဲတၢ်ဝံတၢ်နါ အတၢ်ဖံးတၢ်မၤ လၢကလံၣ်န့ၢ်လီန့ၢ် ပှၤဟီၣ်ခိၣ်ဖိ.
တၢ်ကွၢ်ကဒါက့ၤ
-
ဒ်သိး ပှၤဟီၣ်ခိၣ်ဖိတဖၣ် ကမၤလိဘၣ် ယဟိဝၤယွၤအဂ့ၢ်အဂီၢ် ယဟိဝၤယွၤ အမူခိၣ်ကလူးတဖၣ် မၤစၢၤ အဝဲသ့ၣ်ဒ်လဲၣ်.
-
မုၣ်ကီၤလံၢ် ဒီးအတၢ်ဝံတၢ်နါတဖၣ်န့ၣ် မ့ၢ်မတၤတဖၣ်လဲၣ်.
-
ဘၣ်မနုၤအဃိ နအဲၣ်ဒိးဟးဆှဲး တၢ်ဝံတၢ်နါ အတၢ်ဖံးတၢ်မၤလဲၣ်.
ဃုသ့ၣ်ညါ
ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲ မူခိၣ် ကလူးအခိၣ် မံၤက့လးန့ၣ် အကဲဝဲယ့ၣ်ၡူး.
“မူခိၣ်ကလူးအခိၣ် မံၤက့လးန့ၣ် အကဲမတဂၤလဲၣ်” (တၢ်မၤလိလၢ အအိၣ်လၢ online အဖီခိၣ်)
ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲလၢ မုၣ်ကီၤလံၢ်န့ၣ် အအိၣ်နီၢ်ကီၢ်.
“မုၣ်ကီၤလံၢ်န့ၣ် အအိၣ်နီၢ်ကီၢ်ဧါ” (တၢ်မၤလိလၢ အအိၣ်လၢ online အဖီခိၣ်)
ဖးကွၢ် တၢ်ဂ့ၢ်လၢ အဘၣ်ဃးဒီး ပိာ်မုၣ် တဂၤ ထူၣ်ဖျဲးထီၣ်ကွံာ်လၢ တၢ်ဝံတၢ်နါ အတၢ်လံၣ်န့ၢ်လီန့ၢ်.
“အဝဲသ့ၣ်ညါထီၣ်ဘၣ် တၢ်အိၣ်မူအတၢ်တိာ်ပာ်” (တၢးထီခိးတၢ်, လါယူၤလံ ၁, ၁၉၉၃)
ဖးကွၢ် တၢ်ဂ့ၢ်လၢ အဘၣ်ဃးဒီး မုၣ်ကီၤလံၢ် သူဝဲတၢ်ဝံတၢ်နါ အတၢ်ဖံးတၢ်မၤ ဒ်သိး ကလံၣ်န့ၢ်လီန့ၢ် ပှၤဟီၣ်ခိၣ်ဖိ.