CIIYO 24
Ino Baanjelo Nshilengwa Shili Buyani?
Yehova alisuni kwaamba ayi twiiye pa mukwashi wakwe wakwiculu. Mukwashi uyu uleelikawo abaanjelo, abo beetwa ayi “baana bakwe Lesa.” (Jobo 38:7, NWT) Ino Baibo ilaamba nshi pabaanjelo? Ino balatukuma buyani? Alimwi sa baanjelo boonse bali lubasu lwa mukwashi wakwe Yehova?
1. Ino baanjelo mbaani?
Yehova wakataanguna kulenga baanjelo kaatana kulenga cishi capanshi. Bweenka Yehova mbwaataboneki, abalo baanjelo nshilengwa shakumushimu shikala kwiculu shitaboneki. (Bene Ebulu 1:14) Kuli baanjelo baanji abuumbi, alimwi womwi awomwi alipusene kuumwi. (Ciyubululo 5:11) ‘Balakonkela milawo yakwe [Yehova] akunyumfwila maswi ngabaambila.’ (Kulumbaisha 103:20) Kale kale, Yehova cimwi ciindi wakalinga kutuma baanjelo kutola makani alimwi akucafwa bantu bakwe. Munshiku shino, baanjelo balatanjilila Beneklistu kubantu basuni kwiiya pali Lesa.
2. Ino Satana ashibanda shakwe mbaani?
Baanjelo bamwi tabakwe kutolelela kushomeka kuli Yehova. Munjelo wakutaanguna wakapondoka aleetwa ayi ‘Diabolosi alimwi ayi Satana, uyo ucenjeeka bantu boonse mucishi capanshi.’ (Ciyubululo 12:9) Satana wakalinga kusuni kweendelesha, aboobo wakayunga Adamu a Efa alimwi mukuya kwaciindi wakayunga abaanjelo bamwi kupondokela Yehova. Baanjelo bakapondoka baleetwa ayi shibanda. Yehova wakabatanda kwiculu akubawaala pacishi capanshi, alimwi balaakunyonyoolwa.—Amubelenge Ciyubululo 12:9, 12.
3. Ino Satana ashibanda shakwe baleelesha buyani kutuyunga?
Satana ashibanda balayunga bantu baanji kwiinda mushamishimu, nkokwaamba ayi cilabo cibiibi cakusuna kubandikishanya amishimu. Kucakubonenaako, bantu bamwi balaya mukusonda kubaŋanga alimwi akubantu bashoma bweenda nyenyeenshi. Bamwi balalangoola kushilikwa munshila ikumite shamishimu. Alimwi bamwi balabecekwa ayi inga bacikonsha kubandika amuntu wakafwa. Nacibi boobo, Yehova alatucenjesha ayi: “Tamweelete kuya kubasonda na kwiipusha makani kubaŋanga.” (Bene Lefi 19:31, NWT) Alatulwiita makani akucenjesha aya kwaamba ayi atushitilishe kuli Satana ashibanda shakwe. Mbalwani bakwe Lesa, alimwi balisuni kutubika mumapensho.
AMWIIYILEWO ASHIMWI
Amwiiye shintu shibotu baanjelo nshobacita, akwiiya shamishimu ncoshitabetele kabotu, alimwi ansheenga twaciita kwaamba ayi tulishitilishe kuli Satana ashibanda shakwe.
4. Baanjelo balacafwa bantu kwiiya pali Yehova
Nabi kwaamba ayi baanjelo teshi mbobashimikila bantu cakubalulama, inga batanjilila basebenshi bakwe Lesa kubantu basuni kwiiya pali nguwe. Amubelenge Ciyubululo 14:6, 7, akubandika miipusho iyi:
-
Ino nceebonshi tulayandika lucafwo lwa baanjelo ndyetutooshimikila?
-
Sa kushiba cancine cakwaamba ayi baanjelo balacafwa bantu basuni kwiiya makani amu Baibo kwamuyuminisha? Ino nceebonshi?
5. Amuleye shamishimu
Satana ashibanda mbalwani bakwe Yehova. Aswebo mbalwani besu. Amubelenge Luka 9:38-42, akubandika mwiipusho uyu:
-
Ino shibanda shilacita buyani kubantu?
Tatweelete kuyungwa ku shibanda. Amubelenge Dutolonomi 18:10-12, akubandika miipusho iyi:
-
Ino shibanda shilayunga buyani bantu? Ino nshamishimu sha buyani shipukite kumishaanu?
-
Ino nciinshi nceenga twaambila ayi Yehova nshaatulwiita pamakani akuleya shamishimu shilibo kabotu? Ino nceebonshi?
Amweebele VIDYO, akubandika miipusho itokonkelaawo.
-
Sa mutoobona ayi kapaya ba Palesa nkobakalinga bafwalika mwanaabo kakalingabo kabotu? Ino nceebonshi?
-
Ino ba Palesa bakalinga kuyandika kucita nshi kwaamba ayi bashitilishikwe ku shibanda?
Kuswabo kale kale, Beneklistu bancine balapikisha shibanda. Amubelenge Milimo 19:19 alimwi a 1 Bene Kolinto 10:21, akubandika mwiipusho uyu:
-
Ino nceebonshi kunyonyoola cintu cili coonse ncomucite cikumite kushamishimu kulayandika?
6. Amukome Satana ashibanda shakwe
Shibanda shileendeleshekwa a Satana. Sombi baanjelo bashomeka baleendeleshekwa amunene wa baanjelo Mikaeli, liina limwi lyakwe Yesu. Ino Mikaeli alicite nkusu sha buyani? Amubelenge Ciyubululo 12:7-9, akubandika miipusho iyi:
-
Ino ngani ucite nkusu shiinditewo, Mikaeli abaanjelo bakwe na Satana ashibanda shakwe?
-
Sa mutoobona ayi bashikwiiya bakwe Yesu balyeelete kuloonda Satana ashibanda shakwe?
Inga mwacikonsha kukoma Satana ashibanda shakwe. Amubelenge Jemusi 4:7, akubandika mwiipusho uyu:
-
Ino inga mwalishitilisha buyani kukuyungwa a Satana alimwi ashibanda shakwe?
BANTU BAMWI BALAAMBA AYI: “Kusekana mageemu na kweebela mafilimu atondesha shamishimu kulibo kabotu, mukwiinga nkusekanabo.”
-
Ino nceebonshi kuyeeya kwa mushobo uyu takubete kabotu?
CITEENTE CINENE
Baanjelo bashomeka balatucafwa. Satana ashibanda shakwe mbalwani bakwe Yehova, alimwi balayunga bantu kwiinda mushamishimu.
Kwiindulukaamo
-
Ino baanjelo bakwe Yehova batoocita buyani kwaamba ayi bacafwe bantu kwiiya pali nguwe?
-
Ino Satana ashibanda shakwe mbaani?
-
Ino nceebonshi tamweelete kuba acintu cili coonse cikumite kushamishimu?
AMULANGWETEEWO ASHIMWI
Amwiiye pabumboni butondesha ayi Yesu ngo Mikaeli, munene wa baanjelo.
“Ino Mikaeli Munene wa Baanjelo Ngani?” (Makani acanika pa jw.org)
Amwiiye bumboni butondesha kwaamba ayi ncakwiila Satana nkwaali.
Amwiiye mwanakashi umwi mbwaakaanguluka kuswa kukuyungwa ashibanda.
“Wakacana Mpindu Mubuumi” (Njashi Yamulindilishi, July 1, 1993)
Amwiiye Satana mbwaabeca bantu kwiinda mushamishimu.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
