Yaˬhoˉvaˬ lehˬ ngaˬ hui htaꞈ mvuhˇ naw ma hkʼoˆ yawˇ ve yehˬ kʼa htaꞈ shiˍ tcuh gaˇ ve yoˬ. Yehˬ kʼa chi ve hkʼaw mvuhˇ naw ma tcuh yaˇ cawˬ maˇ jaˇ. Liꞈ hpu hkʼaw yawˇ hui htaꞈ Gʼuiˬ sha ve “yaˇ” tehꞈ kuˬ ve yoˬ. (Yawˇbaˆ 38:7) Mvuhˇ naw ma tcuh yaˇ htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ taˍ ve le? Yawˇ hui chaw yaˇ htaꞈ heuˆ la kuiˬ hkʼaˬ hkʼe cawˬ ve le? Leh mvuhˇ naw ma tcuh yaˇ hkʼa peu˗eˬ Gʼuiˬ sha ve yehˬ kʼa hkʼaw chehˇ˗aw laˇ?

1. Mvuhˇ naw ma tcuh yaˇ lehˬ a shu le?

Yaˬhoˉvaˬ miˬ guiˬ htaꞈ maˇ hpanˍ sheˍ htaˇ, mvuhˇ naw ma tcuh yaˇ htaꞈ awˉ lawˉ hpanˍ ve yoˬ. Yawˇ hui lehˬ Yaˬhoˉvaˬ hkʼa shuˍ awˬ hoꞈ awˬ han cawˬ leh mvuhˇ naw ma hkʼoˆ chehˇ ve pa taw, ngaˬ hui yawˇ hui htaꞈ mawˬ maˇ gʼa. (Heˍbrehˇ 1:14) Yawˇ hui laiˉ lanˬ gʼaˇ cawˬ ve, teˇ gʼaˇ leh teˇ gʼaˇ te hkʼaˇ dawˇ hkʼaˇ maˇ shuˍ daꞈ. (Hpeuꞈ maˍ ve 5:11) Yawˇ hui lehˬ ‘Yaˬhoˉvaˬ ve awˬ liˇ tawˇ hkawˇ teˇ hpaˍ htaꞈ na yuˬ chehˇ ve yoˬ.’ (Chiˇ mvuh ve 103:20) Aˬ sho˗eˬ htaˇ, Yaˬhoˉvaˬ yawˇ ve awˬ lawn chaw yaˇ htaꞈ kʼoˆ piˇ tuˬ, ga piˇ tuˬ, leh a shaꞈ htaꞈ ponˬ piˇ tuˬ, yawˇ ve mvuhˇ naw ma tcuh yaˇ htaꞈ kʼai tcuh ve yoˬ. Chi beuꞈ teˇ co˗e mvuhˇ naw ma tcuh yaˇ Hkriꞈ yaˇ htaꞈ ga piˇ leh Yaˬhoˉvaˬ ve awˬ lawn shiˍ gaˇ ve chaw htaꞈ ca mawˬ tcuh ve yoˬ.

2. Saˍtanˍ leh neˇ teˇ hpaˍ lehˬ a shu le?

Mvuhˇ naw ma tcuh yaˇ teˇ hpaˍ hpaˍ Gʼuiˬ sha ve hkawˇ maˇ na yuˬ ve yoˬ. Gʼuiˬ sha ve hkawˇ maˇ na ve mvuhˇ naw ma tcuh yaˇ awˉ lawˉ teˇ gʼaˇ lehˬ, ‘Saˍtanˍ tehꞈ meh leh miˬ guiˬ yaˇ hkʼa peu˗eˬ htaꞈ heˍ shehˍ hpaˇ hpehꞈ ve yoˬ.’ (Hpeuꞈ maˍ ve 12:9) Saˍtanˍ shu aꞈ kehˉ kanˇ paˆ cawˬ gaˇ ve pa taw, yawˇ Aˍdanˍ leh Eˇvaꞈ htaꞈ beˬ piˇ ve yoˬ. Peuˬ hkʼawꞈ nawˉ, yawˇ awˬ nu ve mvuhˇ naw ma tcuh yaˇ Gʼuiˬ sha hkawˇ maˇ na yuˬ tuˬ kaꞈ beˬ piˇ ve yoˬ. Maˇ na yuˬ ve mvuhˇ naw ma tcuh yaˇ htaꞈ neˇ tehꞈ kuˬ ve yoˬ. Yaˬhoˉvaˬ yawˇ hui htaꞈ mvuhˇ naw ma hkʼoˆ maˇ kʼawꞈ chehˇ tcuh leh miˬ guiˬ hkʼoˆ lo yuˬ baˬ piˇ ve yoˬ. Awˬ leh meuˇ gaˬ kʼo, yawˇ hui htaꞈ te luˬ piˇ tuˬ yoˬ.—Hpeuꞈ maˍ ve 12:9, 12 gʼaw sheˍ.

3. Saˍtanˍ leh neˇ teˇ hpaˍ ngaˬ hui htaꞈ hkʼaˬ hkʼe te beˬ chehˇ ve le?

Saˍtanˍ leh neˇ teˇ hpaˍ chaw yaˇ htaꞈ beˬ yuˬ tuˬ, yawˇ hui lehˬ neˇ teˇ hpaˍ htaꞈ caˉ daꞈ ve awˬ hkʼaˇ yehˇ ve yoˬ. Tawˇ pa haˉ te kʼo, mawˉ nyi ve, neˇ te ve, shaˉ hpehˇ ve, awˬ tcuhˉ awˬ yanˇ awˬ hkʼawꞈ awˬ nyi leh laꞈ hkʼaˇ nyi ve yoˬ. Chaw teˇ hpaˍ kʼo, a naˍ htaꞈ gu na˗e tuˬ neˇ teˇ hpaˍ htaꞈ caˉ daꞈ ve awˬ hkʼaˇ yehˇ ve yoˬ. Chaw teˇ hpaˍ kʼo, suh peuˬ ve chaw geh tawˇ yaw daꞈ gʼa ve tehꞈ heˍ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ kʼoˆ laˇ ve, “mawˉ paˍ sheˍ paˍ hui geh taˇ kʼai.” (Oˉ kʼoˍ pui ve 19:31) Saˍtanˍ leh neˇ teˇ hpaˍ htaꞈ ponˬ tuˬ Gʼuiˬ sha ngaˬ hui htaꞈ chi hkʼe kʼoˆ laˇ ve yoˬ. Yawˇ hui lehˬ Gʼuiˬ sha ve canˇ paˍ hpehꞈ ve leh ngaˬ hui htaꞈ kawˆ tuˬ te laˇ gaˇ ve yoˬ.

 Henˇ shiˍ maˇ la tuˬ

6. Saˍtanˍ leh neˇ teˇ hpaˍ htaꞈ ngaˬ hui gʼaˇ hpehꞈ ve

Neˇ teˇ hpaˍ ve awˬ hoˉ lehˬ Saˍtanˍ yoˬ. Yaꞈ hkʼaˇ, ka tiꞈ yeˬ ve mvuhˇ naw ma tcuh yaˇ teˇ hpaˍ ve awˬ hoˉ lehˬ uiˍ ve mvuhˇ naw ma tcuh yaˇ Miˆhkeˍlaˆ yoˬ. Miˆhkeˍlaˆ lehˬ Yeˍsuˆ ve awˬ meh teˇ meh hpehꞈ ve yoˬ. Miˆhkeˍlaˆ kanˇ paˆ hkʼaˬ hkʼe taw taw cawˬ ve le? Hpeuꞈ maˍ ve liꞈ 12:7-9 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Miˆhkeˍlaˆ leh yawˇ ve mvuhˇ naw ma tcuh yaˇ teˇ hpaˍ, maˇ heˆ leh Saˍtanˍ leh neˇ teˇ hpaˍ, hkʼaˬ ve teˇ moˍ kanˇ paˆ cawˬ jaˇ ve le?

• Nawˬ dawˇ kʼo, Yeˍsuˆ ve awˬ laꞈ gʼawˇ lehˬ Saˍtanˍ leh neˇ teˇ hpaˍ htaꞈ kawˆ tuˬ loˍ˗aw laˇ?

Nawˬ Saˍtanˍ leh neˇ teˇ hpaˍ htaꞈ gʼaˇ hpehꞈ ve yoˬ. Yaˍkoˆ liꞈ 4:7 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ Saˍtanˍ leh neˇ teˇ hpaˍ htaꞈ hkʼaˬ hkʼe te ponˬ gʼa ve le?

 A yeˇ uiˍ ve awˬ lawn

Ka tiꞈ yeˬ ve mvuhˇ naw ma tcuh yaˇ ngaˬ hui htaꞈ ga laˇ ve yoˬ. Saˍtanˍ leh neˇ teˇ hpaˍ Yaˬhoˉvaˬ ve canˇ paˍ hpehꞈ ve yoˬ. Yawˇ hui neˇ teˇ hpaˍ htaꞈ caˉ daꞈ ve awˬ hkʼaˇ yehˇ leh chaw yaˇ htaꞈ beˬ yuˬ ve yoˬ.

Kʼawꞈ gʼaꞈ na ve

• Chaw yaˇ Yaˬhoˉvaˬ htaꞈ shiˍ daꞈ tuˬ, ka tiꞈ yeˬ ve mvuhˇ naw ma tcuh yaˇ hkʼaˬ hkʼe ga piˇ chehˇ ve le?

• Saˍtanˍ leh neˇ teˇ hpaˍ a shu hpehꞈ ve le?

• Aˬ htoꞈ ma pa taw neˇ teˇ hpaˍ htaꞈ nawˬ maˇ caˉ daꞈ gaˇ ve le?