ບົດທີ 24

ທູດສະຫວັນແມ່ນໃຜແລະເຂົາເຈົ້າເຮັດຫຍັງແດ່?

ເປີດ

ພະເຢໂຫວາຢາກໃຫ້ເຮົາຮູ້ຈັກຄອບຄົວໃນສະຫວັນຂອງເພິ່ນ. ທູດສະຫວັນຫຼາຍອົງຢູ່ໃນຄອບຄົວນີ້ ຄຳພີໄບເບິນເອີ້ນເຂົາເຈົ້າວ່າ “ລູກຂອງພະເຈົ້າ.” (ໂຢບ 38:7, ລ.ມ.) ຄຳພີໄບເບິນບອກຫຍັງກ່ຽວກັບທູດສະຫວັນ? ສິ່ງທີ່ເຂົາເຈົ້າເຮັດມີຜົນຫຍັງກັບພວກເຮົາ? ແລະທູດສະຫວັນທຸກອົງຢູ່ໃນຄອບຄົວຂອງພະເຈົ້າບໍ?

1. ທູດສະຫວັນແມ່ນໃຜ?

ພະເຢໂຫວາສ້າງທູດສະຫວັນກ່ອນທີ່ຈະສ້າງໂລກ. ເຂົາເຈົ້າຢູ່ໃນສະຫວັນແລະມີຮ່າງກາຍແບບດຽວກັບທີ່ພະເຢໂຫວາມີ ນີ້ເຮັດໃຫ້ເຮົາເບິ່ງເຂົາເຈົ້າບໍ່ເຫັນ. (ເຮັບເຣີ 1:14) ມີທູດສະຫວັນຫຼາຍລ້ານອົງ ແຕ່ລະອົງກໍມີບຸກຄະລິກແລະລັກສະນະນິດໄສທີ່ບໍ່ຄືກັນ. (ພະນິມິດ 5:11) ເຂົາເຈົ້າ ‘ເຮັດຕາມຄຳສັ່ງຂອງພະເຢໂຫວາ.’ (ຄຳເພງ 103:20, ລ.ມ.) ໃນສະໄໝກ່ອນ ມີບາງເທື່ອທີ່ພະເຢໂຫວາສົ່ງທູດສະຫວັນໃຫ້ໄປບອກຂ່າວສານ ໄປຊ່ວຍເຫຼືອແລະຊ່ວຍຊີວິດຄົນຂອງເພິ່ນ. ໃນທຸກມື້ນີ້ ທູດສະຫວັນກໍຊ່ວຍຄົນຂອງພະເຢໂຫວາໂດຍໃຫ້ເຂົາເຈົ້າໄດ້ເຈິກັບຄົນທີ່ຢາກຮຽນຮູ້ເລື່ອງເພິ່ນ.

2. ຊາຕານແລະພວກປີສາດແມ່ນໃຜ?

ທູດສະຫວັນບາງອົງບໍ່ສັດຊື່ຕໍ່ພະເຢໂຫວາ. ທູດສະຫວັນອົງທຳອິດທີ່ເຮັດແບບນັ້ນ “ຖືກເອີ້ນວ່າມານຮ້າຍແລະຊາຕານທີ່ກຳລັງລໍ້ລວງທົ່ວໂລກໃຫ້ຫຼົງຜິດ.” (ພະນິມິດ 12:9) ຊາຕານຢາກມີອຳນາດເໜືອຄົນອື່ນ ມັນເລີຍລໍ້ລວງອາດາມກັບເອວາບໍ່ໃຫ້ເຊື່ອຟັງພະເຈົ້າ ແລະຫຼັງຈາກນັ້ນກໍມີທູດສະຫວັນບາງອົງທີ່ບໍ່ເຊື່ອຟັງພະເຈົ້າແລ້ວໄປເປັນພວກດຽວກັນກັບຊາຕານ. ທູດສະຫວັນທີ່ບໍ່ສັດຊື່ພວກນີ້ຖືກເອີ້ນວ່າປີສາດ. ພວກມັນຖືກໄລ່ອອກຈາກສະຫວັນເລີຍຕ້ອງມາຢູ່ເທິງໂລກ ແລະໃນທີ່ສຸດພວກມັນຈະຖືກທຳລາຍ.—ອ່ານພະນິມິດ 12:9, 12

3. ຊາຕານແລະພວກປີສາດພະຍາຍາມລໍ້ລວງເຮົາແນວໃດ?

ຊາຕານກັບພວກປີສາດລໍ້ລວງຄົນຈຳນວນຫຼາຍໃຫ້ໄປຫຍຸ້ງກ່ຽວກັບພວກມັນໂດຍໃຊ້ເລື່ອງໄສຍະສາດ. ຕົວຢ່າງເຊັ່ນ ການທຳນວາຍໂຊກສະຕາ ໂຫລາສາດ ການດູດວງ ການໃຊ້ເວດມົນຄາຖາ ພໍ່ມົດໝໍຜີ ແລະພະລັງເລິກລັບເໜືອທຳມະຊາດ. ບາງຄົນກໍໄປປິ່ນປົວພະຍາດໂດຍໃຊ້ວິທີຕ່າງໆທີ່ກ່ຽວຂ້ອງກັບໄສຍະສາດ. ແລະບາງຄົນກໍຖືກຕົວະໃຫ້ເຊື່ອວ່າເຂົາເຈົ້າຈະຕິດຕໍ່ແລະລົມກັບຄົນຕາຍໄດ້. ແຕ່ພະເຢໂຫວາເຕືອນເຮົາວ່າ “ຢ່າໄປຫາຄົນຊົງຫຼືປຶກສາໝໍດູ.” (ພວກເລວີ 19:31, ລ.ມ.) ທີ່ເພິ່ນເຕືອນເຮົາແບບນີ້ກໍຍ້ອນວ່າເພິ່ນຢາກປົກປ້ອງເຮົາຈາກຊາຕານແລະພວກປີສາດທີ່ຢາກທຳຮ້າຍເຮົາ. ພວກມັນເປັນສັດຕູຂອງພະເຈົ້າ.

ຮຽນຮູ້ຫຼາຍຂຶ້ນ

ທູດສະຫວັນທີ່ສັດຊື່ເຮັດສິ່ງທີ່ດີຫຍັງແດ່ ເປັນຫຍັງການເຂົ້າໄປຫຍຸ້ງກ່ຽວກັບເລື່ອງໄສຍະສາດຈຶ່ງອັນຕະລາຍ ແລະເຮົາຈະປົກປ້ອງໂຕເອງຈາກຊາຕານແລະພວກປີສາດໄດ້ແນວໃດ.

4. ທູດສະຫວັນທີ່ສັດຊື່ຊ່ວຍຜູ້ຄົນໃຫ້ມາຮູ້ຈັກພະເຢໂຫວາ

ທູດສະຫວັນຂອງພະເຈົ້າບໍ່ໄດ້ລົງມາປະກາດກັບຜູ້ຄົນໃນໂລກໂດຍກົງ. ແຕ່ເຂົາເຈົ້າຈະຊ່ວຍໃຫ້ຄົນຂອງພະເຈົ້າໄດ້ເຈິກັບຄົນທີ່ຢາກຮຽນຮູ້ເລື່ອງເພິ່ນ. ອ່ານພະນິມິດ 14:6, 7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຕ້ອງໃຫ້ທູດສະຫວັນຊ່ວຍເຮົາເມື່ອເຮັດວຽກປະກາດ?
ທູດສະຫວັນຈະຊ່ວຍໃຫ້ເຈົ້າໄດ້ເຈິກັບຄົນທີ່ຢາກຮູ້ເລື່ອງຂ່າວດີທີ່ພະເຈົ້າສັນຍາໄວ້ໃນຄຳພີໄບເບິນ ເມື່ອຮູ້ແບບນີ້ແລ້ວເຈົ້າຮູ້ສຶກມີກຳລັງໃຈບໍ? ຍ້ອນຫຍັງ?

5. ບໍ່ເຂົ້າໄປຫຍຸ້ງກ່ຽວກັບເລື່ອງໄສຍະສາດ

ຊາຕານແລະພວກປີສາດເປັນສັດຕູກັບພະເຢໂຫວາ. ແລະພວກມັນກໍເປັນສັດຕູກັບເຮົາຄືກັນ. ອ່ານລູກາ 9:38-42 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພວກປີສາດເຮັດຫຍັງແດ່ກັບຜູ້ຄົນ?

ເຮົາບໍ່ຢາກໃຫ້ພວກປີສາດມາລໍ້ລວງເຮົາ. ອ່ານພະບັນຍັດ 18:10-12 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພວກປີສາດພະຍາຍາມລໍ້ລວງເຮົາແລະຕິດຕໍ່ກັບເຮົາໂດຍໃຊ້ວິທີໃດແດ່? ເຈົ້າເຫັນວ່າຄົນສ່ວນຫຼາຍເຮັດຫຍັງແດ່ທີ່ກ່ຽວຂ້ອງກັບໄສຍະສາດ?
ເຈົ້າຄິດວ່າດີບໍທີ່ພະເຢໂຫວາຫ້າມເຮົາບໍ່ໃຫ້ເຮັດສິ່ງທີ່ກ່ຽວຂ້ອງກັບໄສຍະສາດ? ຍ້ອນຫຍັງເຈົ້າຈຶ່ງຄິດແບບນັ້ນ?

ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: “ຕໍ່ສູ້ກັບມານ” (5:02)

ເຈົ້າຄິດວ່າເຄື່ອງລາງທີ່ມັດຢູ່ແຂນລູກສາວຂອງປາເລຊາເປັນສິ່ງຂອງທີ່ບໍ່ມີພິດມີໄພບໍ? ເປັນຫຍັງເຈົ້າຈຶ່ງຄິດແບບນັ້ນ?
ປາເລຊາຕ້ອງເຮັດຫຍັງເພື່ອຈະປົກປ້ອງໂຕເອງຈາກພວກປີສາດ?

ຄົນທີ່ເປັນຄລິດສະຕຽນແທ້ບໍ່ຫຍຸ້ງກ່ຽວກັບພວກປີສາດ. ອ່ານກິດຈະການ 19:19 ແລະ 1 ໂກຣິນໂທ 10:21 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຈຶ່ງສຳຄັນທີ່ຈະທຳລາຍທຸກຢ່າງທີ່ກ່ຽວຂ້ອງກັບໄສຍະສາດ?

6. ເຮົາຊະນະຊາຕານແລະພວກປີສາດໄດ້

ພວກປີສາດມີຊາຕານເປັນຜູ້ນຳ. ແຕ່ທູດສະຫວັນທີ່ສັດຊື່ມີນາຍທູດສະຫວັນທີ່ຊື່ມີຄາເອນເປັນຜູ້ນຳ ມີຄາເອນເປັນອີກຊື່ໜຶ່ງຂອງພະເຢຊູ. ເພິ່ນມີພະລັງອຳນາດຫຼາຍສ່ຳໃດ? ອ່ານພະນິມິດ 12:7-9 ແລ້ວລົມກັນກ່ຽວກັບຄຳຖາມຕໍ່ໄປນີ້: