KALABO 24

Gaamai E Vile Gala Na Keelaitiɛ Ɓɔga Ŋinɛ Yowũitiɛ Va

TƐ GÁ

Jehova wõini de faa maa woli e vile na kaalai va e Gala ta. Jehova na keelaitiɛ te vɛɛvɛ na kaalai va. Tɔwɔ ta te lili ga “Gala deaitiɛ.” (Job 38:7) Zɛɓɛi Gala Kɔlɔi boga e vile Gala na keelaitiɛ va? Zɛɓɛi ta kɛ ga diɛ? E ɣisu keelai niitiɛ ɓɔgapɛ te vɛɛvɛ Gala na kaalai va?

1. Ɓɛɛni ka te ga Gala na keelaitiɛ?

Jehova na keelaitiɛ ɓɛtɛni ɔ vɛɛ zui ɓɛtɛzu. Te maʋaa wulovɛ e ɣɛ velei Gala e la. Ta ga ŋinɛ (ŋinɛ pagɔa) tɔwɔ ta Gala ta. (Hiiɓuluitiɛ 1:14) Gala na keelaitiɛ te lamagɛ ɓɔɔ ga ʋike, tɔwɔ te luɓo-veleitiɛ vagɛ. (Faa wuloai kɛnɛ ma 5:11) Ta “ziɛ ga [Jehova] laa woi, tiɛ wuito goi ma.” (Psalm 103:20) Wɔlɔ-wɔlɔi zu Jehova ɔ na keelai taniga leve ga te daa woi wo na ɣa ɣɛɛna te ɓɔ na numaitiɛ va te te maazu vɛtɛ. Zaa Gala na keelaitiɛ ta pele wulo ga Ziizɛ wulu veaitiɛ ga te ɓɔ niitiɛ va te wõini te faa wɛ̃ɛ e vile Gala ba.

2. Ɓɛɛ ɣa e ga Seeta ta ŋinɛ yowũitiɛ?

Gala na keelai taniga te goo-mɛni-tala wuloni zeea. Gala na keela maa-wũgi e goo-mɛni-talai wuloni “ta tili ga Dɛvele tiɛ wɔnɔ tili ga Seeta nii e ga nu pɛ gaa-wɔlɔ nui zui zu.” (Faa wuloai kɛnɛ ma 12:9) Seeta ɣɛni wõini e ɣɛ ga masa nu ɓuse maazu. Na ɣa e kɛɛni e nu maa-wũgitiɛ ɣaa-mɔɔlɛni. E kɛɛni wɔnɔ Gala na keelai taniga te goo-mɛni-tala wulo zeea. Gala na keelai niitiɛ te goo-mɛni-talai wuloni zeea ta te lili ga ŋinɛ yowũitiɛ. Jehova te ɓɛɛni te wulo Gala ta te va zui ma. Tɔwɔ tɔ vaazu te zu ŋala-ŋalasu.—Faa wuloai kɛnɛ ma 12:9, 12 lodo.

3. Seeta ɓɔga ŋinɛ yowũitiɛ ta ɣaa ɓaazu ɣɛ le ga te de ziɣi pele va?

Seeta ɓɔga ŋinɛ yowũitiɛ ta numaa ziɣi pele va ga sale yekegi ta gɔʋɛ wɔɔ ʋaa. Numaa ta ɣaa-ɓaa ga te yɛpɛ gɔʋɛitiɛ wɔ tɔwɔ tɔ ga faa yowũ ɓakpa. Nu taniga ta li ŋada ɓɛɛ vea wɔ ta zowoitiɛ. Salei fikaa ta siɣi ta sɔlɔwo zowoitiɛ ya. Ta numaa taniga ɣaa-mɔɔlɛ tiɛ bo te ma ga ta zoo te yɛpɛ saa veaitiɛ wɔ. Kɛ Jehova de lɛnɛgɛ ga: “Mɛlɛ li ŋada ɓɛɛ vea wɔ na ɣa ɣɛɛna mɛlɛ li sale yeke kɛɛ vea wɔ.” (Leviticus 19:31) E tɛnɛgi nii ʋeevɛ de ya ga e de maazu vɛtɛ Seeta ɓɔga ŋinɛ yowũitiɛ ya. Ta ga Gala zili yowũitiɛ te wõini te faa yowũ ɣɛ ga diɛ.

FAA LAMAA MAA WOLI

Faa maa woli e vile faa vapagitiɛ va Gala na keelaitiɛ ta kɛ. Nii e kɛɛ ɛ lɛ vani ga dɔ yee vili sale yeke kɛɛ ʋaazu. Wɛlɛ wɔnɔ velei da ɓɔɔ maazu vɛtɛ la ŋinɛ yowũitiɛ ya.

4. Gala na keelaitiɛ ta ɓɔ numaa va ga te faa maa woli e vile Jehova va

Gala na keelaitiɛ ta ɓɔɔ tɛ lɛ Gala goo wo ga numaa ma. Kɛ ta pele wulo ga Gala na numaitiɛ ga te li niitiɛ wɔ te wõini te faa maa woli e vile Gala ba. A Faa wuloai kɛnɛ ma 14:6, 7 lodo, wo gaa-zaɣa-kɛɛ niitiɛ ɣaa wote:

Zɛɓɛi e kɛɛ manɛɛ de kpɔba maa zɔlɔwo Gala na keelaitiɛ ya ga de Gala goi wo?
E ɣisu tɔ ga faa vagɔ ga de kwɛ̃ɛ ga Gala ka pele wulo ga niitiɛ te wõini te faa maa woli Gala Kɔlɔi zu? Zɛɓɛi e kɛɛ yiɛ na wo?

5. Mɛlɛ yee vili sale yeke kɛɛ ɔɔ gɔʋɛ wɔɔ ʋaazu

Seeta ɓɔga ŋinɛ yowũitiɛ ta ga Jehova zili yowũitiɛ. Ta ga de zili yowũitiɛ da ɓalaa. A Luki 9:38-42 lodo, wo gaa-zaɣa-kɛɛ nii ɣaa wote:

Zɛɓɛi ŋinɛ yowũitiɛ ta kɛ ga numaa?

De mɛlɛ ɓe ŋinɛ yowũitiɛ va tɔ de ɣaa-mɔɔlɛ. A Deuteronomy 18:10-12 lodo, wo gaa-zaɣa-kɛɛ niitiɛ ɣaa wote:

Ŋinɛ yowũitiɛ ta de ɣaa-mɔɔlɛ ɣɛ le? Ta ɣaa-ɓaa wɔnɔ ga te yɛpɛ de wɔ ɣɛ le? Numaa ta yee vili sale yeke kɛɛ ʋaazu ɣɛ le vɛ e na?
E ɣisu tɔ ga faa vagɔ ga Jehova boga ga de mɛlɛ yee vili sale yeke kɛɛ ʋaazu? Zɛɓɛi e kɛɛ yiɛ na wo?

ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: “Lo Dɛvelei La” (5:02)

E ɣisu nii Palesa tooni dui yee va e ɣɛni ga ŋɛni yowũ? Zɛɓɛi e kɛɛ yiɛ na wo?
Zɛɓɛi Palesa kɛɛni ga e ɓɔɔ maazu vɛtɛ ŋinɛ yowũitiɛ ya?

Kolai Maa Vea ɓɔɔɓɔɔgitiɛ te lebiga ŋinɛ yowũitiɛ wulu wulozu. A Te Ɣɛɛ Ʋaitiɛ 19:19 ɓɔga 1 Kɔlĩitiɛ 10:21 lodo, wo gaa-zaɣa-kɛɛ nii ɣaa wote:

Ani ŋɛni ta nɛpɛ ka e ya pilegɛi ŋinɛ yowũitiɛ va zɛɓɛi e kɛɛ manɛɛ e su ŋala-ŋala?

6. Dɛvelei ɓɔga ŋinɛ yowũitiɛ yee maazu ɣale

Seeta ɣa e ga ŋinɛ yowũitiɛ ta masagi. Kɛ Ziizɛ, nii ta tili wɔnɔ ga Gala ta ɣeela walai Maikɔ, towa e pele wulozu ga Gala na keelaitiɛ. E ɣisu gaa-ɓaa ɣa ɓɔɔ Maikɔ ya? A Faa wuloai kɛnɛ ma 12:7-9 lodo, wo gaa-zaɣa-kɛɛ niitiɛ ɣaa wote:

Ɓɛɛ ɣa ɓɔɔ gaa-ɓaa zeea e leve bɔlɔ va, Maikɔ ta Gala na keelaitiɛ ɔɔ Seeta ɓɔga ŋinɛ yowũitiɛ?
E ɣisu manɛɛ Ziizɛ wulu veaitiɛ te luo Seeta ɓɔga ŋinɛ yowũitiɛ va?

Ya zoo e Seeta ɓɔga na ŋinɛ yowũitiɛ yee maazu ɣale. A Jĩi 4:7 lodo, wo gaa-zaɣa-kɛɛ nii ɣaa wote: