TUTO 24
Ki Ifi Niti ka za Mangeloi?
Jehova ubata kuli luitute za lubasi lwahae lwa kwa lihalimu. Lubasi lo, lukopanyeleza ni mangeloi, ona abizwa kuli “bana ba Mulimu.” (Jobo 38:7) Bibele ibulelañi ka za mangeloi? Mangeloi atusanga cwañi batu? Kana ki mangeloi kaufela a mwa lubasi lwa Mulimu?
1. Mangeloi ki bo mañi?
Jehova naabupile mangeloi pili asika bupa kale lifasi. Ka kuswana ni Jehova, mangeloi ni ona anani mibili ya moya mi apila kwa lihalimu. (Maheberu 1:14) Kunani mangeloi amañata-ñata mi leliñwi ni leliñwi linani butu bwalona. (Sinulo 5:11) Mangeloi ‘alatelela linzwi la Jehova, ni kumamela sabulela.’ (Samu 103:20) Mwa linako za kwamulaho, Jehova fokuñwi naalumanga mangeloi kuyo taluseza batu litaba zahae, kubatusa ni kubalamulela. Mwa linako zaluna, mangeloi atusanga Bakreste kufumana batu bababata kuituta za Mulimu.
2. Satani ni madimona ahae ki bo mañi?
Mangeloi amañwi naasika zwelapili kusepahala ku Jehova. Lingeloi lene likalile kukwenuhela Mulimu ki “Diabulosi ni Satani, yanzaa kelusa lifasi kaufela.” (Sinulo 12:9) Satani naabata kubusa babañwi, kacwalo naapumile bashemi baluna bapili mi hasamulaho akukueza mangeloi amañwi kuli aswalisane ni yena kukwenuhela Mulimu. Mangeloi anaapumilwe ki Satani ao, abizwa kuli madimona. Jehova naalelekile mangeloi ao kwa lihalimu ni kuanepela fa lifasi mi akayundiswa.—Mubale Sinulo 12:9, 12.
3. Satani ni madimona ahae balikanga kulupuma ka mukwa ufi?
Satani ni madimona ahae bapuma batu babañata ka kuitusisa litumelo za mioya, ili mukwa omaswe wa kulika kuambola ni madimona. Ka mutala, batu babañwi bayo kupanga tuso kwa linuhi za linaleli ni liñaka. Babañwi bona bayo alafiwanga ka linzila zeama litumelo za mioya. Batu babañata basweli kupumiwa kuli bakona kuambola ni batu babashwile. Kono Jehova ululemusa kuli: “Musike mwaya kwa balauli, mi musike mwabuza linuhi.” (Livitike 19:31) Jehova ulufa temuso yeo kuli alusileleze ku Satani ni madimona ahae. Satani ni madimona ahae ki lila za Mulimu, mi babata kulukenya mwa butata.
MUBATISISE
Muitute lika zende zaezanga mangeloi, bumaswe bwa kuikenya mwa litumelo za mioya, ni molukona kuisileleleza ku Satani ni madimona ahae.
4. Mangeloi atusanga batu kuituta za Jehova
Mangeloi hatahangi kwa batu kuto bakutaza. Kono akona kutusa balapeli ba Mulimu kuli bafumane batu bababata kuituta zahae. Mubale Sinulo 14:6, 7, mi kihona mukanyakisisa lipuzo zelatelela:
-
Ki kabakalañi halutokwa kutusiwa ki mangeloi kuli lukutaze?
-
Kana kuziba kuli mangeloi akona kumitusa kufumana batu bababata kuziba za mwa Bibele, kwamisusueza? Libaka?
5. Muambuke litumelo za mioya
Satani ni madimona ahae ki lila za Jehova. Mi hape ki lila zaluna. Mubale Luka 9:38-42, mi kihona mukanyakisisa puzo yelatelela:
-
Madimona aezanga cwañi batu?
Halutabeli kuswalisana ni madimona ka nzila ifi kamba ifi. Mubale Deuteronoma 18:10-12, mi kihona mukanyakisisa lipuzo zelatelela:
-
Ki mwa linzila mañi mo madimona alika kulukukueza ni kuambola ni luna? Ki lika mañi zeama litumelo za mioya zeatile mwa silalanda semupila ku sona?
-
Kana mwautwisisa libaka Jehova haluhanisa kuikenya mwa litumelo za mioya? Libaka?
Mubuhe VIDIO, mi kihona mukanyakisisa lipuzo zelatelela.
-
Kana munahana kuli muulu wanaatinanga mwanaa bo Palesa neu mutahiseza butata? Libaka?
-
Bo Palesa nebatokwa kuezañi kuli baisileleze kwa madimona?
Bakreste ba niti bazwezipili kuhanela madimona. Mubale Likezo 19:19 ni 1 Makorinte 10:21, mi kihona mukanyakisisa puzo yelatelela:
-
Ki kabakalañi hamutokwa kusinya nto kaufela yemunani yona yeswalisana ni tumelo ya mioya?
6. Muzwelepili kuhanyeza Satani ni madimona ahae
Madimona abusiwa ki Satani. Kono mangeloi asepahala ona aetelelwa ki Mikaele nduna wa mangeloi, ili libizo leliñwi la Jesu. Mikaele unani maata amatuna cwañi? Mubale Sinulo 12:7-9, mi kihona mukanyakisisa lipuzo zelatelela:
-
Ki mañi yanani maata amatuna? Kana ki Mikaele ni mangeloi ahae kamba ki Satani ni madimona ahae?
-
Kana munahana kuli balateleli ba Jesu baswanela kusaba Satani ni madimona ahae?
Mwakona kuhanela Satani ni madimona ahae. Mubale Jakobo 4:7, mi kihona mukanyakisisa puzo yelatelela:
-
Mukona kuisileleza cwañi ku Satani ni madimona ahae?
BABAÑWI BABULELANGA KULI: “Hakusika fosahala kubapala lipapali zebonisa litumelo za mioya kamba kubuha mafilimu acwalo. Kueza cwalo mane kwakatulusa.”
-
Ki kabakalañi kuba ni mubonelo ocwalo hakukona kumikenya mwa butata?
LITABA KA BUKUSWANI
Mangeloi asepahala alutusa. Satani ni madimona ahae ki lila za Jehova, mi baitusisa tumelo ya mioya kupuma batu.
Mulundulule
-
Mangeloi a Jehova atusa cwañi batu kuziba ka za hae?
-
Satani ni madimona ahae ki bo mañi?
-
Ki kabakalañi hamubata kuambuka tumelo ya mioya?
MUBONE LITABA ZEÑWI
Munyakisise bupaki bobubonisa kuli Jesu ki yena Mikaele, nduna wa mangeloi.
“Mikaele, Yena Nduna wa Mangeloi ki Mañi?” (Taba ya fa webusaiti)
Munyakisise bupaki bobubonisa kuli Diabulosi uteñi luli.
Mubone zanaaezize musali yomuñwi kuli asike akukuezwa ki madimona.
“Naafumani Lika Zene Mutusize Mwa Bupilo” (Tawala ya Mulibeleli, July 1, 1993)
Mubone mo Satani asweli kupumela batu ka kuitusisa tumelo ya mioya.
“Niti ka za Mabibo ni Buloi” (Nzila Yeisa Kwa Bupilo Bobusa Feli, kalulo 5)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
