SULA MAR 24

Ang’o ma Muma Puonjo e Wi Malaike?

TUGE

Jehova dwaro ni wang’e joge manie polo. Malaike gin moko kuomgi kendo iluongogi ni “yawuot Nyasaye.” (Ayub 38:7) Muma wacho ang’o e wi malaike? Gitimo tije mage? To be malaike duto osebedo komakore gi Nyasaye?

1. Malaike gin jomage?

Jehova nochueyo malaike ka pok nochueyo piny. Gin chuech mag roho mana kaka Nyasaye, kendo gidak e polo. (Jo-Hibrania 1:14) Nitie malaike mang’eny ahinya kendo moro ka moro kuomgi ne ochue e yo makende. (Fweny 5:11) ‘Giwinjo wach Jehova kendo gitimo dwache.’ (Zaburi 103:20) E kinde machon, Jehova ne tiyo gi malaike mondo giter ote ne jotichne kendo mondo giresgi. E kindewagi, malaike tayo Jokristo mondo giyud joma dwaro puonjore wach Nyasaye.

2. Satan gi jochiendene gin jomage?

Nitie malaike moko ma ne ok omakore gi Jehova. Malaika ma ne okwongo ng’anyo ‘iluongo ni Jachien kendo Satan, kendo owuondo piny mangima.’ (Fweny 12:9) Satan ne dwaro ni oloch e wi jomoko, to mano e momiyo nowuondo dhano mokwongo, kendo bang’e nowuondo malaike moko mondo giriwe lwedo e ng’anyo. Malaike ma ne ong’anyogo iluongo ni jochiende. Jehova noriembogi e polo mowitogi e piny kendo obiro kethogi.—Som Fweny 12:9, 12.

3. Ere kaka Satan gi jochiendene temo wuondowa?

Satan gi jochiendene wuondo ji ka gitiyo gi timbe juok ma en temo tudore gi jochiende. Mano en tim marach ahinya. Kuom ranyisi, jomoko dhiga ir ajuoke, joma koro, kod jopenj jochiende wach. Jomoko manyo yore mag thieth ma otudore gi timbe juok. Bende, iwuondoga ji mondo gipar ni ginyalo wuoyo gi jomotho. Kata kamano, Jehova siemowa niya: “Kik udhi ir jo ma tudore gi jochiende, kendo kik upenj wach kuom ajuoke.” (Tim Jo-Lawi 19:31) Jehova miyowa siemni nikech odwaro ni Satan kod jochiende kik hinywa. Gin jowasik Nyasaye kendo gimanyo yore ma ginyalo hinyowago.

TIM NONRO

Ne ane gik mabeyo ma malaike timo, gimomiyo rach ka watudore gi jochiende, kod gima wanyalo timo mondo Satan gi jochiendene kik hinywa.

4. Malaike konyo ji mondo gipuonjre e wi Jehova

Malaike mag Nyasaye ok lend ne ji achiel kachiel. Kar mano, ginyalo tayo jotich Nyasaye mondo giyud joma dwaro puonjore Muma. Som Fweny 14:6, 7, kae to uwuo e wi penjo ma luwogi:

Ang’o momiyo dwarore ni malaike okonywa sama walendo?
Be en gima jiwi ng’eyo ni malaike nyalo tayi ir joma dwaro puonjore Muma? Ang’o momiyo iwacho kamano?

5. Kwed timbe juok

Satan gi jochiendene gin jowasik Jehova. Gin jowasikwa bende. Som Luka 9:38-42, kae to uwuo e wi penjo ma luwoni:

En ang’o ma jochiende timoga ne ji?

Ok wadwar ni jochiende ochik ngimawa. Som Rapar mar Chik 18:10-12, kae to uwuo e wi penjo ma luwogi:

Gin yore mage ma jochiende nyalo temo ywayowago, kata tudorego kodwa? Gin yore mage ma jochiende wuondogo ji e alwora midakie?
Be en gima owinjore mondo Jehova otamwa timo gik motudore gi jochiende kod timbe juok? Ang’o momiyo iwacho kamano?

Tug VIDIO, kae to uwuo e wi penjo ma luwogi:

VIDIO: ‘Kwed Jachien’ (5:02)

Be ris ma ne orwak ne nyar Palesa ne nyalo hinye? Ang’o momiyo iwacho kamano?
En ang’o ma Palesa nonego otim mondo jochiende kik chande?

Jokristo madier osebedo ka kwedo jochiende kinde duto. Som Tich Joote 19:19 kod 1 Jo-Korintho 10:21, kae to uwuo e wi penjo ma luwoni:

Ang’o momiyo dwarore ni waketh gimoro amora ma wan-go motudore gi timbe juok?

6. Inyalo kedo gi Satan gi jochiendene ma ilogi

Satan e jatend jochiende. Kata kamano, malaike mabeyo to otelnegi gi Mikael, ma en nying machielo mar Yesu. Mikael nigi teko ma romo nade? Som Fweny 12:7-9, kae to uwuo e wi penjo ma luwogi: