KJOAʼMIYA 24

Jótso je Biblia xi tʼatsʼe ánkje

TINÓʼYALAI NGA ÉN

Je Jeobá mele nga jchaa tʼatsʼe je ánkje xi tjío ya ngʼajmi. Ánkje jebi kʼoati “xtile Niná” ʼmile (Job 38:7). Jméni xi tso Biblia tʼatsʼe je ánkje. Jméni xi sʼín. A ánkjele Niná ma ngatsʼi.

1. ʼYáni je ánkje

Nga kjesa síndajin sonʼnde je Jeobá, jé ánkje títjon kisinda. Je ánkje kʼoati espíritu joni je Jeobá, alikui matsen kʼoa yaa tjío ya ngʼajmi (Hebreos 1:14). Millón mani je ánkje kʼoa alikui mangóson nga jngó jngó (Apocalipsis 5:11). Je ánkje kʼoasʼín jotsole je Jeobá kʼoa sítjoson kjoatéxomale (Salmo 103:20). Nichxin kjoatse, je Jeobá sakʼoa ánkje kisichjén kʼianga jme xi tsakájinkon je chjota. Kʼoati ánkje kisichjén kʼianga tsakasenkao kʼoa nga tsakʼasjentjai je naxinandále. Nichxin xi tiyoaa ndʼaibi jé ánkje bándiaale je chjotale Cristo kʼianga masjaile je chjota xi mele skoe̱ xi tʼatsʼe Niná.

2. ʼYáni je Na̱i kʼoa ʼyáni je sénnichxin xi chʼao kjoan

Tjínkʼa je ánkje xi tsín tikixi kitʼanile je Jeobá. Je xi títjon kontra tsakʼejnale je Niná, jé Na̱i xi kʼoati Satanás ʼmi xi tíbʼanachale ngatsʼi chjota (Apocalipsis 12:9). Je Na̱i kui xi koanmele nga je koatexoma kʼoa tsakʼanachale je Adán kao Eva nga ya katatsjoánganʼiole. Xijekoanni, kʼoati tsakʼanachale je ánkje xi kjaʼaí nga kʼoati ya katatsjoánganʼiole. Je ánkje xi ya kitʼale je Na̱i kui koan sénnichxin xi chʼao kjoan. Je Jeobá alikui tikitsjoaʼndenile nga ya ngʼajmi koatio, i kisikʼatsaojenngi i̱ tʼanangi kʼoa jeme tjóxin (tʼexkiai Apocalipsis 12:9, 12).

3. Jósʼin bʼanachaná je Na̱i kʼoa kao je sénnichxin xi chʼao kjoan

Je Na̱i kʼoa kao sénnichxin xi chʼao kjoan nʼio nkjín chjota bʼanachale kʼoa kui síchjén jotjín koya kjoabʼenda tjín. Nʼio xkón tíjna kjoa jebi nga̱ jéni Na̱i xi fákao. Tjínkʼa chjota xi kui bʼéxkia xi horóscopo ʼmi, tjínkʼa xi je fikonle chjota xi niño kotʼason nga kʼoatso jmeni xi koa̱n, kʼoa tjínkʼa xi chjinebʼenda fikonle kʼoa tsa jeje̱ xi kjoataon male. Kʼoa tjínkʼa xi kui síchjén je xki xi kjoabʼendani tjenkao. Kʼoa tjínkʼa xi kʼoaʼmile nga koa̱n kjoakaonajmí je ʼndíkʼienle. Je Jeobá itso: “Ali chjinebʼendajin mangínchonlao kʼoa ali jejin mangínchonlao xi tongini kʼoatso jme xi koa̱n” (Levítico 19:31). Kuinga kʼoatsoniná nga tsín mele nga josikaoná je Na̱i kʼoa kao sénnichxin xi chʼao kjoan, kontrale mani je Jeobá kʼoa mele nga tjín xi sikaoná.

KATAʼYASAI JME XI TÍNCHJA̱NI

Kataʼyala jmeni xi sʼín je ánkjele Niná kʼoa jokji xkón tíjna je xi kjoabʼenda tjenkao. Kʼoati jchaa jósʼin si̱kuindalee yaoná je Na̱i kʼoa kao je sénnichxin xi chʼao kjoan.

4. Je ánkje binyakao je chjota nga katabe xi tʼatsʼe Jeobá

Je ánkjele Niná alikui jesoa tsoyasonle je chjota. Je xi sʼín kuinga je bándiaale je choʼndale Niná nga katamasjaile je chjota xi mele skoe̱ xi tʼatsʼe Niná. Tʼexkiao Apocalipsis 14:6, 7 kʼoa cho̱bayaño jebi:

Ánni nga machjénniná nga katabinyakaoná je ánkje kʼianga ʼmiyasoán.
Jósʼe tokuin nga ʼyai kʼianga je ánkje koandiaali nga kuichonrʼoai je chjota xi mele skoe̱ tʼatsʼe Biblia. Ánni.

5. Alikuijin nisin tojotjín koya kjoabʼenda tjín

Je Na̱i kʼoa kao je sénnichxin xi chʼao kjoan kontra tjíole Jeobá kʼoa kʼoati kontra tjíoná tsanda ñá. Tʼexkiao Lucas 9:38-42 kʼoa cho̱bayaño jebi:

Jósíkao je chjota je sénnichxin xi chʼao kjoan.

Alikui kʼoaiʼndelee yaoná nga jme xi si̱koaa xi tʼatsʼe Na̱i tínroani. Tʼexkiao Deuteronomio 18:10-12 kʼoa cho̱bayaño jebi:

Jmé xi síchjén je sénnichxin xi chʼao kjoan nga mele koanentsjaná kʼoa mele kjoakaoná. Jméni xi sʼín chjota ya jñani tsi je xi kjoabʼenda tjenkao.
A ndatjín nga bʼéchjoayejená Niná jmeni xi kjoabʼenda tjenkao. Ánni.

Chótsenlao VIDEO kʼoa cho̱bayaño jebi:

VIDEO: “Tiyotajalao je na̱i” (5:02)

A xkón tíjna nga tjín xi tsakʼékjá ntsja je ʼndíleele Palesa, jósingái ji. Ánni.
Jmé xi kisʼin je Palesa nga tsín tijokatasíkaoni je sénnichxin xi chʼao kjoan.

Je xi ñaki chjotale Cristo ma alikui kui sísin xi tʼatsʼe Na̱i tínroani. Tʼexkiao Hechos 19:19 kao 1 Corintios 10:21 kʼoa cho̱bayaño jebi:

Ánni nga nʼio machjénni nga chja̱ʼaxin tojmeni xi tjíoli xi kjoabʼenda tjenkao.

6. Tikinjelai je Na̱i kʼoa kao je sénnichxin xi chʼao kjoan

Je sénnichxin xi chʼao kjoan jé Na̱i batéxomale. Tonga je ánkjele Niná jé bándiaale je ánkjetítjon xi Miguel ʼmi, jé Jesús xi Miguel ʼmile. Jókji nganʼio tjínle je Miguel. Tʼexkiao Apocalipsis 12:7-9 kʼoa cho̱bayaño jebi:

ʼYáni xi ngisa tse nganʼio tjínle, a je Miguel kao ánkjele axo je Na̱i kao je sénnichxin xi chʼao kjoan.
Je xi chjotale Cristo ma, a tjínnele tsokjonle je Na̱i kʼoa kao je sénnichxin xi chʼao kjoan.

Koaan si̱kinjelai je Na̱i kʼoa kao sénnichxin xi chʼao kjoan. Tʼexkiao Santiago 4:7 kʼoa cho̱bayaño jebi:

Jmé xi koa̱n sʼiain nga si̱kuindalai yaoli je Na̱i kao sénnichxin xi chʼao kjoan.

TJÍNKʼA XI I̱ TSO: “Alikui chʼaotjín tsakui si̱skákoaa kʼoa tsakui chótsenlee película xi tsʼe magia, xi tsʼe kʼien kʼoa tsa tsʼe sénnichxin xi chʼao kjoan. Ali josikaoná nga̱ totibʼetsaojinñá”.

Ánni nga xkón tíjnani tsa kʼoasʼin si̱kjaʼaitsjeen.

XI KACHOTʼAYÁ

Je ánkje binyakaoná. Kʼoa je Na̱i kʼoa kao sénnichxin xi chʼao kjoan kontra tjíole je Jeobá kʼoa kui síchjén jmeni xi kjoabʼenda tjenkao nga bʼanachale je chjota.