LESON 24
Laverite lor Bann Anz
Zeova anvi ki nou aprann konn so fami ki dan lesiel. Dan so fami ena bann anz, ek Labib apel zot “bann garson Bondie.” (Zob 38:7) Ki Labib dir lor bann anz? Ki linflians zot ena lor bann dimounn? Ek eski tou bann anz form parti dan fami Bondie?
1. Kisannla bann anz?
Zeova ti kree bann anz avan ki Li kree later. Parey kouma Li, zot invizib ek zot viv dan lesiel. (Ebre 1:14) Ena plizir milyon anz, ek sak anz ena so prop personalite. (Revelasion 5:11) Zot ‘akonplir instriksion Zeova ek obeir parol ki Li dir.’ (Psom 103:20) Dan lepase, parfwa Zeova ti avoy bann anz pou fer konn so mesaz, pou ed so pep ek sap zot. Azordi, bann anz ed bann Kretien pou trouv bann dimounn ki anvi aprann konn Bondie.
2. Kisannla Satan ek so bann demon?
Sertin anz pa finn res fidel ar Zeova. Premie anz ki ti rebele “apel diab, ou Satan, sedikter lemonn.” (Revelasion 12:9) Satan anvi ena enn lotorite lor lezot. Akoz sa, li ti inflians Adan ek Ev pou ki zot dezobeir Zeova. Ek plitar, li ti inflians bann lezot anz pou fer mem zafer. Labib apel sa bann anz rebel la bann demon. Zeova finn tir zot depi dan lesiel ek finn zet zot lor later. Ek biento, Li pou detrir zot.—Lir Revelasion 12:9, 12.
3. Kouma Satan ek so bann demon esey anbet nou?
Satan ek bann demon servi bann pratik demoniak pou esey anbet bann dimounn. Bann pratik demoniak, se kan bann dimounn esey koz avek bann demon. Ek sertin dimounn fer sa san mem ki zot kone. Par exanp, ena bann dimounn ki al get bann treter, bann longanis, ouswa bann ki get destin. Ena lezot ki get zot oroskop ouswa ki al get bann dimounn ki servi sorselri pou gagn gerizon. Satan ek bann demon anbet bann dimounn kan zot fer zot krwar ki zot kapav koz avek bann mor. Me Zeova donn nou sa lord-la: “Pa al get bann medium ek bann dimounn ki predir lavenir.” (Levitik 19:31) Zeova dir nou sa pou protez nou kont Satan ek bann demon. Kifer? Parski zot bann lennmi Bondie, ek zot anvi fer nou ditor.
ANOU GET INPE PLIS
Nou pou aprann bann bon kitsoz ki bann anz fer, kifer bann pratik demoniak zot danzere, ek kouma nou kapav protez nou ar Satan ek bann demon.
4. Bann anz ed bann dimounn pou aprann konn Zeova
Bann anz pa pres avek bann dimounn. Me zot ed bann serviter Bondie pou zwenn bann dimounn ki anvi aprann konn Li. Lir Revelasion 14:6, 7, ek apre sa, get sa bann kestion-la ansam:
-
Kifer nou bizin led bann anz pou prese?
-
Eski sa ankouraz ou kan ou kone ki bann anz kapav ed ou pou trouv bann dimounn ki anvi kone seki Labib ansegne? Kifer?
5. Rezet bann pratik demoniak
Satan ek bann demon zot bann lennmi Zeova. Zot nou bann lennmi osi. Lir Lik 9:38-42, ek apre sa, get sa kestion-la ansam:
-
Kouma bann demon tret bann dimounn?
Nou pa anvi les bann demon inflians nou. Lir Deteronom 18:10-12, ek apre sa, get sa bann kestion la ansam:
-
Kouma bann demon esey inflians nou ek koz avek nou? Parti kot ou reste, ki bann pratik demoniak ki bien popiler?
-
Eski ou panse li rezonab ki Zeova kondann sa bann pratik demoniak la? Kifer?
Zwe VIDEO-la, ek apre sa, get sa bann kestion-la ansam:
-
Eski ou panse ki portboner ki Vanessa ti met dan lame so tifi ti danzere? Kifer?
-
Ki Vanessa ti bizin fer pou protez li kont bann demon?
Bann vre Kretien finn touletan opoz zot ar bann demon. Lir Zistwar Bann Apot 19:19 ek 1 Korintien 10:21, ek apre sa, get sa kestion-la ansam:
-
Kifer li inportan ki ou detrir ninport ki kitsoz ki ena enn lien avek bann demon?
6. Gagn laviktwar kont Satan ek so bann demon
Satan, li sef bann demon. Me se Misel ki sef bann anz fidel, ek Misel se enn lot nom pou Zezi. Ki kantite Misel li pwisan? Lir Revelasion 12:7-9, ek apre sa, get sa bann kestion-la ansam:
-
Kisannla pli pwisan? Misel ek so bann anz ouswa Satan ek so bann demon?
-
Eski ou panse ki bann disip Zezi bizin per Satan ek so bann demon?
Ou kapav gagn laviktwar kont Satan ek so bann demon. Lir Zak 4:7, ek apre sa, get sa kestion-la ansam:
-
Kouma ou kapav protez ou kont Satan ek so bann demon?
SERTIN DIMOUNN DIR: “Pena nanye demal ki nou zwe bann zwe ki ena enn lien avek bann demon, ouswa ki nou get bann fim koumsa. Se zis enn divertisman sa!”
-
Kifer sa fason panse-la li danzere?
SEKI NOU’NN APRANN
Bann anz fidel ed nou. Satan ek so bann demon zot bann lennmi Zeova, ek zot servi bann kitsoz demoniak pou anbet bann dimounn.
Eski Ou Rapel?
-
Kouma bann anz Zeova pe ed bann dimounn pou aprann konn Li?
-
Kisannla Satan ek so bann demon?
-
Kifer ou anvi rezet tou seki ena enn lien avek bann demon?
DEKOUVER
Get bann prev ki montre ki Zezi limem Misel sef bann anz.
Get bann prev ki montre ki Diab se pa zis lemal ki andan nou.
Gete kouma enn madam ti reisi liber li ar linflians bann demon.
« Elle a trouvé un but dans la vie » (Latour Degard, 1e Ziliet 1993, an Franse)
Aprann kouma Satan servi bann kitsoz demoniak pou anbet bann dimounn.
« La vérité sur la magie et la sorcellerie » (La route qui mène à la vie éternelle, seksion 5)
Ena Osi
KESTION KI POZE SOUVAN
Ki sa Inplike Etidie Labib Avek Bann Temwin Zeova?
Bann Temwin Zeova ofer bann letid Labib gratis, ek ou kapav servi ninport ki version Labib ki ou anvi. Santi ou lib pou invit bann manb ou fami ouswa bann kamarad ki ou anvi.
