MPANTTA 24
Malayikha phaapani ni isiyani impankaaya?
Yehova nopheela wiira naacuwele amucyaawe amphwanyannya wiirimu. Malayikha anaapanka mphantte wo ayo amucyaayo, phimaana Ibiiblya inwiihana “asaana a Nluku.” (Jó 38:7) Ibiiblya ineetthuciha isiyani mwaha wo malayikha? Isiyani ayo impankaaya? Niireke wiira malayikha otheene anaapanka mphantte waamuci a Nluku?
1. Malayikha phaapani?
Yehova hinaaya wumpa ituninya aapacenre wumpa malayikha. Ayo malayikhaayo ari khampa Nluku, khaanonnya ni ankhala wiirimu. (Maberewu 1:14) Ahaavo malayikha imiliyau cene ni khula nlayikha niri nimakhalelwaaya. (Apokalipise 5:11) Ayo ‘anaweettela malamulo a Yehova ni ile inhimyaawe.’ (Isaalimu 103:20) Khalayi, Yehova anrumaka malayikhaawe wiira yoohimyace moolumwaawe, yawaakavihere apoovwaawe ni yoowoopole. Mahukwaala, malayikha anawaakavihera makristau waaphwanya atthu ampheela wiitthuca moolumo a Nluku.
2. Sotwani ni maciini phaapani?
Ahaavo malayikha ahiile umwiiwelela Yehova. Nlayikha naapacenre uhiya umwiiwelela Yehova nineehaniya ‘Tiyapu awula Sotwani, nohapusa ituninya yotheene inkhaliya.’ (Apokalipise 12:9) Itthu yaapheelaawe Sotwani waari ulamulela. Phimaana, Sotwani ahompankiha Atamu, Hawa ni ciicammo malayikha makhwaawe uhiya umwiiwelela Nluku. Ayo malayikha anrukunuwenle Nlukwaayo aneehaniya Maciini. Yehova hoomola ayo malayikhaayo wiirimu ni nna vaa ari vaa watuninyani va. Masi woohipica ayo anaarwaa umalamalihiya.—Nsome Apokalipise 12:9, 12.
3. Manannani Sotwani ni maciini ammananihaaya unithepya?
Sotwani ni maciini anawaathepya atthu enci yavarelaka nteko ukhwiri, ukhanle utotha ukaviheriya ni minepa. Iyo ikhanle itthu yoohinamaana. Wootakihera, ahaavo anrwaaka waakulukhano ni ahaavo anrwaaka uwaseriha ihako. Akiina anaatothaka mirette cinvoniha iretta masi cinvaranaca nuukhwiri. Sotwani ciicammo naawiiriha atthu ukupali wiira wanaakhitirya uwuulumana atthu ookhwa. Masi Yehova neera: “Nhaatothe atthu anlompela minepa ni hataa ale anwasera ihako.” (Levitiku 19:31) Uyo nooniirela commo wiira ninsempe Sotwani nimaciinnyaawe. Ayo akhanle awanani a Nluku ni ampheela unipanka pusya.
MUNCERERE WIITTHUCA WINYU
Ncuwele citthu comaana cimpankaaya malayikha, nlattuni unreeraaya unyema ukhwiri ni isiyani inlamuliyeehu upanka wiira ninsempe Sotwani nimaciinnyaawe.
4. Malayikha anawaakavihera atthu wiitthuca myaha ca Yehova.
Malayikha khanwuulumana atthu co ni co wiira yaahimyeere moolumo a Nluku. Uhiya commo, ayo anawaakavihera ale anonswalela Nluku wiira yaaphwanye atthu ampheela wiitthuca myaha ca Yehova. Nsome Apokalipise 14:6, 7, ni mwamalihaka usoma, moopele mwaha ala makohwaala:
-
Wiira nilalyeere, kontha isiyani nihaana nikaviheriyaka ni malayikha?
-
Khunreera ucuwela wiira malayikha pooti wuukaviherani waaphwanya atthu ampheela wiitthuca myaha co mbiiblyani? Kontha isiyani nneereenyu commo?
5. Nnyeme ukhwiri
Sotwani ni maciini akhanle awanani a Yehova, ayo ciicammo akhanle awananiihu. Nsome Luka 9:38-42, ni mwamalihaka usoma, moopele mwaha nna nikohonna:
-
Isiyani maciini inaapankaaya atthu?
Nihihiyerere maciini yahoolelaka ukumiihu. Nsome Deuteronomiyu 18:10-12, ni mwamalihaka usoma, moopele mwaha ala makohwaala:
-
Manannani maciini cimmananihaaya unuulumana ni uhoolela ukumiihu? Citthuni cookhwiri cimpankiya ncoko unkhaleenyu?
-
Niireke Yehova haana isariya yoonikhottiiha ukhwiri? Kontha isiyani?
Moone IVIDIYU, ni mwamalihaka woona, moopele mwaha ala makohwaala:
-
Nvidiyuni mmo nihoona wiira athiyana aneehaniya Paula yahotthukelela nripwe mmoononi wa mwanaya. Woonela winyu iyo itthwiiyo yaari yowoopiha? Kontha isiyani?
-
Isiyani ayo athiyanaayo yaalamuliyaaya upanka wiira anyeme maciini?
Makristau eekhweeli ikhumelo yo khalayi anawaarusa maciini. Nsome Miteko 19:19 ni 1 Akorintu 10:21. Mwamalihaka usoma, moopele mwaha nna nikohonna:
-
Kontha isiyani unaareera umalamaliha khula itthu inooneehu wiira inaavaranaca nuukhwiri?
6. Munttheme Sotwani nimaciinnyaawe
Maciini anhooleliya ni Sotwani masi malayikha ookhluvelyaa anhooleliya ni nlayikha nuulupale, nineehaniya Mikeli, nno nikhanle ncina nikhwaawe na Yesu. Ikuruni irinaawe Mikeli? Nsome Apokalipise 12:7-9, ni mwamalihaka usoma, moopele mwaha ala makohwaala:
-
Phaapani arina ikuru cinene: Mikeli nimalayikhaawe awula Sotwani nimaciinnyaawe?
-
Nyuuva woonela winyu, atthari a Yesu ahaana yamoovaka Sotwani nimaciinnyaawe?
Wanaakhitirya nyuuva untthema Sotwani nimaciinnyaawe. Nsome Tiyaku 4:7, ni mwamalihaka usoma, moopele mwaha nna nikohonna:
-
Isiyani inlamuliyeenyu upanka wiira munnyeme Sotwani ni maciini?
ATTHU AKIINA ANEERA: “Khuntakhala uttikha ikeemi awula woona ividiyu cinoonihera ukhwiri. Nwo ukhanle uthuka paasi.”
-
Kontha isiyani wuupuwela ala manannaala ikhanle itthu yowoopiha?
UTHIKILELA
Malayikha ookhuluvelya anaanikavihera. Sotwani ni maciini akhanle awanani a Yehova ni ayo anaavarela nteko ukhwiri wiira yaathepye atthu.
Wuupuwela
-
Manannani malayikha cinaakaviheraaya atthu wiitthuca myaha ca Yehova?
-
Sotwani ni maciini phaapani?
-
Kontha isiyani nyuuva nnopheeleenyu unyema maciini?
MWAPHEELAKA UCUWELA CITTHU CIKIINA
Moone citthu cinthoonyera wiira Yesu phiri nhooleli o malayikha neehaniya Mikeli.
“Tipani khanle nhooleli o malayikha neehaniya Mikeli?” (Mwaha umphwanyannya nsayitini jw.org)
Moone citthu cinthoonyera wiira Tiyapu ntthu okhweeli kahi itthu yoohinamaana ntthu irinaawe wanrimani wawe.
“Tiyapu khweeliini haavo” (Mwaha umphwanyannya nsayitini jw.org)
Moone mananna athiyana amoca cihiilyaaya uhooleliya ni maciini.
“Ayo ahophwanya ukumi womaana” (Ukhalenla, 1 yo Julho yo 1993)
Moone manannani Sotwani novarelaawe nteko ukhwiri wiira aathepye atthu.
“Ikhweeli cinhimya macattuka ni ukhwiri isiyani” (O Caminho para a Vida Eterna, mphantte 5)
