ISAMBILILO 24

I Visinka ci Vino Mwamanya Pali ya Malaika?

LIZYINI

Yeova akalonda tusambilile pa lupwa lwakwe ulwa kwi yulu. Mu lupwa lulo mwaya na ya malaika aakaamwa ukuti “ana yakwe Leza.” (Yobo 38:7) I vyani vino Baibo yalanda pali ya malaika? Uzye vino yakacita vyakuma uli antu? Nupya uzye ya malaika yonsi yaya umu lupwa lwakwe Leza?

1. Uzye ya malaika aaweni?

Yeova waumvile ya malaika lino atatala wapanga insi. Ya malaika yaya wakwe aliwe, yasiloleka nupya yakaikala ukwi yulu. (Aebele 1:14) Kwaya ya malaika aingi sana nupya cila wino waiyela. (Kusokolola 5:11) ‘Yakayela amazwi yakwe’ Yeova. (Masamu 103:20) Mpiti, insita zimwi Yeova watumanga ya malaika uku kulanda amazwi yakwe, ukwazwa nu kupususya antu yakwe. Ndakai, ya malaika yakatungulula aina Klistu uku antu aakulondesya ukusambilila pali Leza.

2. Uzye Satana ni viwa vyakwe aaweni?

Ya malaika yamwi yatatwalilile ukuya na ucisinka kuli Yeova. Malaika uwatandikilepo ukupondoka akaamwa “ukuti Ciwa nupya Satana, aakaponzya yonsi aya pano nsi.” (Kusokolola 12:9) Satana walondanga atungulula yauze, fwandi walenzile Adamu na Eva alino na ya malaika yauze ukupondokela Yeova. Ya malaika yaa apondwike yakaamwa ukuti iviwa. Yeova wayazinzile ukufuma ukwi yulu nu kuyasumbila pano nsi nupya yalononwa.—Kusokolola 12:9, 12.

3. Uzye Satana ni viwa vyakwe yakaezya uli ukutuponzya?

Satana ni viwa vyakwe yakaponzya antu ukupitila umu vya mipasi kuli kuti ukuvwana ni mipasi. Wakwe, yamwi yakaya kuli ya kasapoola, ya kasowela, antu aasambilila vino umuntu akaelenganya alino na kuli ya sing’anga. Yamwi yakazumila imilwazizye umwaya ivya mipasi. Yamwi nayo yakayabeepa ukuti yangalanda na afwe. Nomba Yeova watucelula ukuti tutalinzile “kuuzya kuli yakasapoola nanti ku antu yano yakavwanga ni mipasi.” (Aina Levi 19:31) Akatucelula pano akalonda ukutucingilila kuli Satana ni viwa, aalwani yakwe Leza nupya yakalonda ukutuponzya.

LONDELEZYINI NA VYUZE

Sambililini pa visuma vino ya malaika yakacita, uyi uwaya umu kukonkelela ivya mipasi, na vino tungaicingilila kuli Satana ni viwa vyakwe.

4. Ya malaika yakaazwa antu ukusambilila pali Yeova

Ya malaika yakwe Leza yasisimikila uku yantu umu kulungatika. Lelo, yangatungulula aomvi yakwe Leza uku yantu aakulonda ukusambilila pali aliwe. Belengini Kusokolola 14:6, 7, alino mulanzyanye mauzyo yaa:

U mulandu ci uno tukalondekwa uwazwilizyo ukufuma kuli ya malaika lino tukusimikila?
Uzye mwakomeleziwa ukumanya ukuti ya malaika yangamutungulula uku yantu akulonda ukusambilila pali Baibo? U mulandu ci?

5. Mwataluka uku vya mipasi

Satana ni viwa vyakwe aalwani yakwe Yeova. Naswe kwene aalwani itu. Belengini Luka 9:38-42, alino mulanzyanye iuzyo lii:

I vyani vino iviwa vikacita uku yantu?

Tusilonda ukuti viwa vyatutungulula umu umi witu. Belengini Malango 18:10-12, alino mulanzyanye mauzyo yaa:

U mu nzila ci muno iviwa vikalonda ukulatutungulula nu kulalanda naswe? I vyani vikacitika sana kuno mukaikala?
Uzye mungati caya sile ningo vino Yeova walesya ukucitako ivya mipasi? U mulandu ci?

Tambini VIDYO, alino mulanzyanye mauzyo atiyalondelelapo.

VIDYO: “Mwakaanya Ciwa” (5:02)

Uzye mukwelenganya ukuti cali sile ningo vino ya Palesa yazwisile umwana incilizi ukwikasa? U mulandu ci?
I vyani vino ya Palesa yalondekwanga ukucita pakuti yacingililwe uku viwa?

Aina Klistu ya cumi lyonsi yakakaanya iviwa. Belengini Milimo 19:19 na 1 Kolinto 10:21, alino mulanzyanye iuzyo lii:

U mulandu ci uno cacindamila ukonona vyonsi vikauvwana ni mipasi?

6. Cimvini Satana ni viwa vyakwe

Iviwa vikatungululwa na Satana. Nomba ya malaika aya na ucisinka yakatungululwa na malaika mukalamba Mikaeli, izina lyuze lyakwe Yesu. A maka ya musango ci yano Mikaeli wakwata? Belengini Kusokolola 12:7-9, alino mulanzyanye mauzyo yaa:

Pali Mikaeli na ya malaika yakwe na pali Satana ni viwa vyakwe, aaweni aakwatisya amaka?
Uzye mukwelenganya ukuti alondezi yakwe Yesu yalinzile ukutiina Satana ni viwa vyakwe?

Mungacimvya Satana ni viwa vyakwe. Belengini Yakobo 4:7, alino mulanzyanye iuzyo lii: