ISAMBILILO 24
Uzye Awangeli Awaweni Swinya Avyani Vino Wakawomba?
E Yehova akalonda tusambilile pa lupwa lwakwe ulwa kwi yulu. Pe lo-o ulupwa pawa na wangeli wano wakakwitwa ukuti “awanakwe Leza.” (Job 38:7) Avyani vino Baibolo yikalanda pa wangeli? Amulimo ci wuno wakawombela awantu? Uzye wonsinye wawa mu lupwa lwa kwe Leza?
1. Uzye awangeli awaweni?
E Yehova watalicizile ukwelewula awangeli pano atani apange insi. Amizimu yino yisiloleka swinya wakakwikala kwi yulu. (Waheberi 1:14) Kwawa imintapendwa ya wangeli, swinya watawa icili conga, lelo cila mungeli wayiwela ku muwuye. (Ukuwumbulika 5:11) ‘Wakatontela amasundo yakwe [Yehova], wakakwivwa vino akutaka.’ (Amalumbo 103:20) Kali e Yehova wawomvyanga awangeli pa kulanda na wantu, ukuwavwa nu kuwapususya. Ya-a amanda wakatungulula awina Klistu ku wantu wano wakulonda ukusambilila pe Leza.
2. Uzye e Satana ni viwa vyakwe awaweni?
Awangeli wamwi watatwalilizile ukuwa ni cisinka kwe Yehova. Umungeli wakutalicila wino wapondocezile e Yehova akakwitwa ukuti “Muwipe pamwi Satana, wino wakopeka insi yonsi.” (Ukuwumbulika 12:9) E Satana walondanga ukuti awateka wanji. Awuli umulandu wuno wawipizile e Adamu ne Eva. Ne mukupita kwa mpindi wizile awipa na wangeli wawuye, pakuti wapondocele e Yehova. Wa-a awangeli wano wapondosile wakakwitwa ukuti iviwa. E Yehova wa wawinzile kwi yulu nu kuwasumbila munsi swinya wali nu kononwa.—Wazya Ukuwumbulika 12:9, 12.
3. Uzye e Satana ni viwa vyakwe wakacita wuli pa kuti watusovye?
E Satana ni viwa vyakwe wakasovya awavule nkaninye ukupitila mu vya mizimu ni nzila zinji izya kwivwanilamo ni mizimu. Ku cakulolelako wamwi wakakolowozya kwa kalengula wa ntanda, wano wakalandila lyankani ulongo na ku ng’anga. Ne wanji wakasola imipozezye muno mwasanzyamo ivya mizimu. Cinji acakuti awantu wakawawipa ukusuwila ukuti wangalanda na wafwe. Lelo e Yehova akatusoka ukuti: “Mutize mwakonka wamuzimu na wano wakakwetetuka ivinjelengwe nanti akuwavwamba mutize muwawavwamba.” (Levitikasi 19:31) Akatusoka pakuti atucinjilile kwe Satana ni viwa vyakwe. Amuno awalwani wa kwe Leza swinya wakalonda ukutusovya.
SAMBILILA IVICILE PA-A
Sambilila pa vizima vino awangeli wakawomba, nu wuwipe wuno wawa mukukoncelela ivya mizimu, na vino tungayicinjilila kwe Satana ni viwa vyakwe.
4. Awangeli wakakwavwa awantu ukusambilila pe Yehova
Awangeli wa kwe Leza wasiwizizya awantu mukulungatika. Lelo wangatungulula awawomvi wa kwe Leza ukuya kwe wano wakulonda ukusambilila pe weliwe. Wazyani Ukuwumbulika 14:6, 7, nu kulanzyanya ya-a amawuzyo:
-
Amulandu ci wuno tukalondela ukwavwa kwa wangeli pano tukuwizya?
-
Uzye wivwa wuli pa kumanya ukuti awangeli wangakutungulula ku wantu wano wakulonda ukusambilila pe Yehova? Amulandu ci wuno wayivwila wowo?
5. Kanani ivya mizimu
E Satana ni viwa vyakwe awalwani wa kwe Yehova. Nasweswenye awalwani witu. Wazyani Luka 9:38-42, nu kulanzyanya lyo-o iwuzyo:
-
Uzye iviwa vikacita wuli ku wantu?
Tusilonda ukuti iviwa vyatutungulula. Wazyani Amasundo 18:10-12, nu kulanzyanya ya-a amawuzyo:
-
Anzila ci zimwi zino iviwa vikawomvya pakuti vyatutungulula nu kulanda na sweswe? Uzye kuno mwikalila avyani vino awantu wavulila ukucita pakulanzyanya ni viwa?
-
Uzye ungati cawa icetenye wo-o vino e Yehova walesya ukucita ivya mizimu ivili vyonsinye? Acani cino wasucila wowo?
Tambani e VIDYO, nu kulanzyanya lyo-o iwuzyo.
-
Uzye ukulola ukuti impundu yino wa Palesa wazwisile umwana wawo yalinji icetenye? Amulandu ci?
-
Avyani vino wa Palesa wazipizile ukucita pa kuti wayicinjilile ku mizimu miwipe?
Awina Klistu wacisinka wakalewuka ku mizimu miwipe. Wazyani Imilimo 19:19 ne 1 Wakorinte 10:21, nu kulanzyanya ya-a amawuzyo:
-
Ukulola ukuti amulandu ci wuno uzipizile ukononela vyonsinye vino vyalemenkana ni vya mizimu?
6. Cimvyani e Satana ni viwa vyakwe
Iviwa vikatungululwa ne Satana. Nomba awangeli wacisinka wakatungululwa ne Mikaeli, akuli ukuti e Yesu e songo wa wangeli. Amaka ya musango ci yano e Mikaeli wawa nayo? Wazyani Ukuwumbulika 12:7-9, nu kulanzyanya ya-a amawuzyo:
-
Ungati awaweni wano walusya awawuye amaka, pe Mikaeli na wangeli wakwe ne Satana ni viwa vyakwe?
-
Uzye ukulola ukuti wano wakakonka e Yesu wazipizile ukutina e Satana ni viwa vyakwe?
Ungacimvya Satana ni viwa vyakwe. Wazyani Jemusi 4:7, nu kulanzyanya lyo-o iwuzyo:
-
Uzye ungayicinjilila wuli kwe Satana ni viwa vyakwe?
WAMWI WAKATI: “Ukuteya indwizyo nu kutamba amavidyo muno mwawa ivya wulozi kutawipa, andwizyo vye.”
-
Amulandu ci wuno ukwelenganya kwa musango wo-o kwawipila?
IVISINKA VIKULU
Awangeli wakatwavwa. Ne Satana ni viwa vyakwe, awalwani wa kwe Yehova, swinya wakawomvya ivya mizimu pa kuti watusovye.
Avyani Vino Wasambilila?
-
Uzye awangeli wa kwe Yehova wakakwavwa wuli awantu ukusambilila pe weliwe?
-
Uzye e Satana ni viwa vyakwe awaweni?
-
Amulandu ci wuno ukulondela ukufuntuka kwe vyonsinye vino vyakuma imizimu miwipe?
MANYILAPO NA VINJI
Sambilila pa wusinincizyo wuno wukalanjizya ukuti e Yesu awili e Mikaeli.
“Uzye e Mikaeli, Umungeli Mukulu Weweni?” (Icipande ca pa webusayiti)
Lolani cino cikalanjizya ukuti mukusimicilanye e Satana amuntu.
Lola vino umwanaci walesile ukutina ivya mizimu.
“Wazanile Umulandu Wuno Wawela mu Nsi” (Ulupungu lwa kwa Kalinda, July 1, 1993)
Sambilila vino Satana akawomvya imizimu pa kuwipa awantu.
“Icisinka pe Majiki, Ivinjelengwe nu Wulozi” (Inzila ya Kuya ku Wumi wa Muyayaya, Uluwali 5)
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
