ISIFUNDO 24
Iqiniso Ngezingilosi
UJehova ufuna sazi okunengi ngezingilosi. IBhayibhili lithi izingilosi ‘ngamadodana kaNkulunkulu.’ (UJobe 38:7) Kodwa liyini iqiniso ngezingilosi? Ngowani umsebenzi wazo? Zonke izingilosi zenza intando kaNkulunkulu yini?
1. Zingobani izingilosi?
UJehova wadala izingilosi engakadali umhlaba. Izingilosi zihlala ezulwini futhi zilomzimba womoya njengoNkulunkulu. (KumaHebheru 1:14) Kulamamiliyoni lamamiliyoni ezingilosi futhi zonke zitshiyene. (ISambulo 5:11) Izingilosi ‘zenza lokho [uJehova] akutshoyo’ futhi ‘zilalela ilizwi lakhe.’ (IHubo 103:20) Endulo uJehova wayeke athume izingilosi ukuthi zivikele abantu bakhe, zibasekele njalo zibatshele lokho ayefuna bakwenze. Lalamuhla izingilosi zincedisa amaKhristu eqiniso ukuthi enelise ukuthola abantu abalesifiso sokufunda ngoNkulunkulu.
2. Ngubani uSathane njalo angobani amadimoni akhe?
Ezinye izingilosi azizange zihlale zithembekile kuJehova. Ingilosi eyaqala ukuhlamuka ibizwa ngokuthi “nguDeveli langokuthi nguSathane, odukisa umhlaba wonke.” (ISambulo 12:9) USathane wayefuna ukubusa yikho wayenga u-Adamu lo-Eva ukuthi bahlamukele uJehova njalo ngokuhamba kwesikhathi wayenga lezinye izingilosi. Izingilosi ezahlamukayo kuthiwa ngamadimoni. Izingilosi lezi zaxotshwa ezulwini zaphoselwa emhlabeni futhi sekuseduze ukuthi zibhujiswe.—Bala iSambulo 12:9, 12.
3. USathane lamadimoni akhe bazama njani ukusidukisa?
USathane lamadimoni akhe badukisa abantu abanengi besebenzisa isidimoni, okutsho loba yiziphi indlela ezisetshenziswa ngabantu ukuze bakhulume lemimoya. Ngokwesibonelo, abanye abafuna ukwazi ngekusasa bayahamba ezinyangeni kumbe ebantwini abachasisa amaphupho labatshaya amathambo. Abanye njalo belatshwa ngezindlela ezilesidimoni ikanti abanye bacabanga ukuthi bangenelisa ukukhuluma labafileyo. a Kodwa uJehova uthi: “Lingayi kwabalamadlozi njalo lingabuzi kwabalomoya wokutshela abantu ngekusasa.” (ULevi 19:31) USathane lamadimoni akhe bayizitha zikaNkulunkulu ezifuna ukusilimaza, yikho uJehova esixwayisa ukuze asivikele.
GEBHA UJULE
Engxenyeni le uzafunda ngokuthi izingilosi zibanceda njani abantu. Uzafunda langezingozi zokusebenzisa isidimoni lokuthi ungazivikela njani kuSathane lamadimoni akhe.
4. Izingilosi zibanceda njani abantu abafuna ukufunda ngoJehova?
Lanxa izingilosi zingatshumayezi abantu, zincedisa izinceku zikaNkulunkulu ukuthi zenelise ukuthola labo abafuna ukufunda ngaye. Bala iSambulo 14:6, 7 beselixoxa ngemibuzo le:
-
Izingilosi zisincedisa njani emsebenzini wokutshumayela?
-
Uzwa njani ngokuthi izingilosi zingakuncedisa ukuthi wenelise ukuthola abantu abafuna ukufunda iBhayibhili?
5. Balekela isidimoni
USathane lamadimoni akhe bayizitha zikaJehova baphinde babe yizitha zethu. Bala uLukha 9:38-42 beselixoxa ngombuzo lo:
-
Amadimoni abenzani abantu?
Ungavumi ukudukiswa ngamadimoni. Bala uDutheronomi 18:10-12 beselixoxa ngemibuzo elandelayo:
-
Amadimoni azama njani ukudukisa abantu? Yiphi imikhuba yesidimoni ojayele ukuyibona isenziwa lapho ohlala khona?
-
Ubona angani kuqondile yini ukuthi uJehova asalise ukwenza izinto ezilesidimoni? Kungani usitsho njalo?
Bukelani IVIDIYO beselixoxa ngemibuzo elandelayo.
-
Ucabanga ukuthi intebe uPalesa ayeyigqizise umntanakhe yayiyingozi yini? Kungani usitsho njalo?
-
UPalesa wenzani ukuze angasahlaselwa ngamadimoni?
Kusukela kudala amaKhristu eqiniso ebekubalekela ukwenza loba yini elesidimoni. Bala imiSebenzi 19:19 lo-1 Khorinte 10:21 beselixoxa ngombuzo lo:
-
Kungani kuqakathekile ukulahla loba yini engasihlanganisa lamadimoni?
6. Ungamnqoba uSathane lamadimoni akhe
Amadimoni akhokhelwa nguSathane. Kodwa izingilosi ezithembekileyo zikhokhelwa nguJesu obizwa langokuthi nguMikhayeli. Ulamandla anganani uMikhayeli? Bala iSambulo 12:7-9 beselixoxa ngemibuzo le:
-
USathane lamadimoni akhe balamandla ukwedlula uMikhayeli lezingilosi zakhe yini?
-
Ubona angani kumele simesabe yini uSathane lamadimoni akhe?
Ungamnqoba uSathane lamadimoni akhe. Bala uJakhobe 4:7 beselixoxa ngombuzo lo:
-
Ungazivikela njani kuSathane lamadimoni akhe?
ABANYE BATHI: “Akukubi ukuzilibazisa ngemidlalo kumbe amafilimu alesidimoni. Uyabe ufuna ukuzikholisela nje.”
-
Kungani ukucabanga njalo kuyingozi?
ISIFINQO
Izingilosi ziyasincedisa. USathane lamadimoni akhe bona bayizitha zikaJehova futhi basebenzisa isidimoni ukudukisa abantu.
Ufundeni?
-
Izingilosi zibanceda njani abantu abafuna ukufunda ngoJehova?
-
Ngubani uSathane lamadimoni akhe?
-
Kungani kuqakathekile ukubalekela loba yini engasihlanganisa lamadimoni?
THOLA OKUNENGI
Bala isihloko lesi ukuze uthole ubufakazi obutshengisa ukuthi uJesu nguMikhayeli ingilosi enkulu.
“Ngubani UMikhayeli Ingilosi Enkulu?” (Isihloko esikuwebhusayithi yethu)
Bala isihloko lesi ukuze ubone ubufakazi obutshengisa ukuthi uDeveli ukhona sibili.
“USathane Ukhona Sibili Yini?” (Isihloko esikuwebhusayithi yethu)
Bala isihloko lesi uzwe ukuthi omunye umama wenzani ukuze anqobe amadimoni.
“Usekwazi Ukuthi Uphilelani!” (INqabayokulinda, July 1, 1993)
Bala uzwe ukuthi uSathane ubayenga njani abantu.
“Iqiniso Mayelana Lamasalamusi Lobuthakathi” (Indlela Eya Ekuphileni Okungapheliyo, Ingxenye 5)
[Amabala angaphansi]
a Esifundweni 29 sizaxoxa ngokuthi abafileyo abakwazi lutho.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
