OSHILESHWA 24
Oshili kombinga yaayengeli
Jehova okwa hala tu ilonge kombinga yuukwanegumbo we womegulu. Uukwanegumbo mboka owa kwatela mo aayengeli, mboka haya ithanwa “aana yaKalunga.” (Genesis 6:2; Job 38:7) Ombiimbeli otayi ti shike kombinga yaayengeli? Ohaya nwetha mo ngiini aantu? Mbela aayengeli ayehe oye li oshitopolwa shuukwanegumbo waKalunga?
1. Aayengeli oyo oolye?
Jehova okwa shiti aayengeli manga inaa shita evi. Ngaashi ye, aayengeli iishitwa yopambepo ihaayi monika, yi li megulu. (Aahebeli 1:14) Oye li omamiliyona, nomuyengeli kehe oku na uukwatya wa yooloka ko kuwayakwawo. (Ehololo 5:11) Ohaya ‘fala omalombwelo gaJehova nohaya vulika koohapu dhe.’ (Episalomi 103:20) Konalenale, Jehova okwa li ha tumu aayengeli ya fale omalombwelo, ya ka kwathele noya ka hupithe oshigwana she. Kunena, aayengeli ohaya wilike Aakriste, ya ye kaantu mboka ya hala okwiilonga kombinga yaKalunga.
2. Satana noompwidhuli dhe oyo oolye?
Aayengeli yamwe inaya kala aadhiginini kuJehova. Omuyengeli ngoka a tukula tango oshipotha, ohi ithanwa “Omuhindadhi nenge Satana, ngoka ta pukitha uuyuni auhe.” (Ehololo 12:9) Satana naye okwa li a hala okupangela yalwe, onkee okwa nwetha mo aantu yotango, nokonima okwa nwetha mo aayengeli yalwe kaaya vulike kuKalunga. Aayengeli mboka aanashipotha ohaya ithanwa oompwidhuli. Jehova okwa li a pitike dhu umbilwe kombanda yevi notadhi ka hanagulwa po masiku. — Lesha Ehololo 12:9, 12.
3. Satana noompwidhuli dhe ohaya kambadhala ngiini oku tu pukitha?
Satana noompwidhuli dhe ohaya pukitha aantu oyendji okupitila muumpulile, mboka wu li omukalondjigilile omwiinayi gwokukambadhala okupopya noompwidhilu dhe. Pashiholelwa, aantu yamwe ohaya yi kaayanekeli yoonyothi, koompulile nokoonganga. Aantu yamwe ohaya ka konga epango lya kwatela mo uumpulile. Yamwe oya pukithwa wo mokwiitaalithwa kutya otaya vulu okupopya noonakusa. Ihe Jehova ote tu londodha ta ti: “Inamu ya kaantu mboka haa pula aathithi nokoompulile.” (Levitikus 19:31) Okwe tu pa elondodho ndyoka e tu gamene kuSatana nokoompwidhuli dhe. Aayengeli mboka oye li aatondi yaKalunga noya hala oku tu ehameka.
ILONGA OSHINDJI
Ilonga kombinga yiinima iiwanawa mbyoka hayi ningwa kaayengeli, yuupyakadhi mboka hawu zi muumpulile nokombinga yankene tatu vulu okwiigamena kuSatana nokoompwidhuli dhe.
4. Aayengeli ohaya kwathele aantu yi ilonge kombinga yaJehova
Aayengeli hayo yene haya uvithile aantu. Pehala lyaashono, ohaya vulu okuwilika aapiya yaKalunga ya ye kaantu mboka ya hala okwiilonga kombinga ye. Lesha Ehololo 14:6, 7, e tamu kundathana omapulo taga landula:
-
Omolwashike twa pumbwa okukwathelwa kaayengeli, sho tatu uvithile aantu?
-
Mbela ihashi ku tsu omukumo okutseya kutya aayengeli otaya vulu oku ku wilika wu ye kaantu mboka ya pumbwa okuuva kombinga yOmbiimbeli? Omolwashike to tile ngawo?
5. Yanda uumpulile
Satana noompwidhuli dhe, oye li aatondi yaJehova. Oye li wo aatondi yetu. Lesha Lukas 9:38-42, e tamu kundathana epulo tali landula:
-
Oompwidhuli ohadhi ningile shike aantu kunena?
Inatu hala tu pitike oompwidhuli dhi tu nwethe mo. Lesha Deuteronomium 18:10-12, e tamu kundathana omapulo taga landula:
-
Omomikalo dhini oompwidhuli hadhi kambadhala oku tu nwetha mo nokupopya natse? Iinima yini ya kwatela mo uumpulile hayi ningwa moshitopolwa sheni?
-
Sho to tala, oshi li ngaa nawa sho Jehova ta ti kutya inatu kutha ombinga miinima yi na ko nasha nuumpulile? Omolwashike to tile ngawo?
Dhana OKAVIDIO, e tamu kundathana omapulo taga landula.
-
Sho to tala, okamuya hono Petrina a li a zaleka okamwana, oka li ngaa ka nika oshiponga? Omolwashike to tile ngawo?
-
Petrina okwa li a pumbwa okuninga po shike, opo i igamene koompwidhuli?
Aakriste yashili oya kala aluhe nokukondjitha oompwidhuli. Lesha Iilonga 19:19 nosho wo 1 Aakorinto 10:21, e tamu kundathana epulo tali landula:
-
Omolwashike sha simana wu fike po oshinima kehe shoka wu na, shi na ekwatathano nuumpulile?
6. Sindana molugodhi lwokukondjitha Satana noompwidhuli dhe
Oompwidhuli ohadhi wilikwa kuSatana. Ihe aayengeli aadhiginini ohaya wilikwa komuyengeli omukuluntu Mikael, edhina limwe lyaJesus. Mikael oku na oonkondo dhi thike peni? Lesha Ehololo 12:7-9, e tamu kundathana omapulo taga landula:
-
Olye e na oonkondo unene e vule mukwawo, oMikael naayengeli ye nenge oSatana noompwidhuli dhe?
-
Mbela sho to tala, aalanduli yaJesus oye na okukala ya tila Satana noompwidhuli dhe?
Oto vulu okusindana molugodhi lwokukondjitha Satana noompwidhuli dhe. Lesha Jakob 4:7, e tamu kundathana epulo tali landula:
-
Ongiini to vulu okwiigamena kuSatana nokoompwidhuli dhe?
AANTU YAMWE OHAYA TI: “Inashi puka okudhana uudhano nenge okutala oomuvi ndhoka dha kwatela mo uumpulile, oshoka omuntu otwi inyanyudha owala.”
-
Omolwashike etaloko ndyoka lya nika oshiponga?
OWI ILONGO SHIKE?
Aayengeli aadhiginini ohaye tu kwathele. Satana noompwidhuli dhe aatondi yaJehova, nohaya longitha uumpulile ya pukithe aantu.
Omapulo geendululo
-
Aayengeli yaJehova ohaya kwathele ngiini aantu yi ilonge kombinga ye?
-
Satana noompwidhuli dhe oyo oolye?
-
Omolwashike wu na okuyanda uumpulile?
UUYELELE WA GWEDHWA PO
Tala kuuyelele mboka tawu ulike kutya Jesus oye Mikael, omuyengeli omukuluntu.
“Omuyengeli omukuluntu Mikael olye?” (Oshitopolwa shi li kepandja lyetu lyokointaneta)
Tala kuuyelele mboka tawu ulike kutya Satana oko e li shili, ihe ke shi owala ombepo ombwinayi yi li maantu.
“Mbela omuhindadhi oko e li shili?” (Oshitopolwa shi li kepandja lyetu lyokointaneta)
Tala nkene omukiintu gumwe a manguluka ko koompwidhuli.
“Okwa mono elalakano monkalamwenyo” (Oshungolangelo, 1 Juli 1993)
Lesha wu uve nkene Satana ha longitha uumpulile a pukithe aantu.
“Oshili kombinga yuumpulile nuulodhi” (Ondjila ndjoka tayi fala komwenyo gwaaluhe, oshitopolwa 5)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
