WANGƆ 24

Aangelo du ana, kwa mɛ ala ndo li nɛ?

Yehova ye ya e hĩnga ndasewa tɛ lo mɛ ka ndozu. Aangelo nga kaya ndasewa niko, ni la Ngbangɔ ndo ili ala ya “aya Nzapa.” (Yobo 38:7) Tɛnɛ mɛ Ngbangɔ tɛnɛ na lo tɛ aangelo nɛ? Ala ndo li kpale tɛrɛ azi ngasia? Aangelo zu la ndo du kaya ndasewa tɛ Nzapa?

1. Aangelo du ana?

Yehova lindó Aangelo uzu ti nɛngɔ ya lo li sese. Nga mabere lo, aangelo na tɛrɛ ti nyingɔ mɛ ta zo lengbi ti hũngɔ la ma, wa ala ndo du ka ndozu. (Aebreo 1:14) Aangelo ndo du gba nvɛ̃ni, kanda kɔi kɔi na seliye tɛ lo. (Suma 5:11) Ala ndo “kpã tɛnɛ tɛ lo na kwa, wa ala ndo ma legɔ̃ lo.” (Nzembo 103:20) Na ngoi ti gã, Yehova ndo tondó aangelo ya ala pa nyɔ lo hɛ̃ azi tɛ lo, ala za azi wa ala so nga na la. Ndɛ nga lo mɛ ko, aangelo ndo fa awakwa tɛ Yezo na azi mɛ na gwɛ̃ ti hĩngangɔ Nzapa.

2. Satana ná ademɔ̃ ndo du ana?

Ambanga aangelo atɔmbɔgɔndó tɛrɛ Yehova. Angelo ti uzu mɛndó tɔmbɔgɔ “andoili lo ya Zabulu bere Satana. Lo ndohanda azi ti lɛ sese zu.” (Suma 12:9) Na lo mɛ ya Satana ndó na gwɛ̃ ti lɛngɔ gbia ndo azi ko, lo handandó Adamu ná Eva nga na aangelo mɛndɛ̃ ya ala kɛ̃ nyɔ Nzapa. Ando ili aangelo mɛndó kɛ̃ mangɔ nyɔ Nzapa ya ademɔ̃. Yehova tomandó la ka ndozu lo sa ala ge tise wa angbã dã lo kpɔ la.—Di Suma 12:9, 12.

3. Satana na ademɔ̃ tɛ lo ndo handa azi ngasia?

Satana ná ademɔ̃ tɛ lo ndo handa azi na lége ti kwa tɛ asiɔ nyingɔ, afa ya ala ndo li ya azi tɛnɛ tɛnɛ na asiɔ nyingɔ. Na ndakisa, azi mɛndɛ̃ ndo gwe ka tɛ azi mɛ ndo ba tongolo ti hĩngangɔ lo mɛ na lingɔ tɛrɛ lo, azi mɛ ndo tɛnɛ tɛnɛ na asiɔ nyingɔ, awa hãngɔ biando bere alí. Azi mɛndɛ̃ ndo gi sarangɔ tɛrɛ la na lége tɛ asiɔ nyingɔ. Ambanga azi ndo gi tɛnɛngɔ tɛnɛ na azi mɛ kpili. Kanda Yehova hɛ̃ e nyɔ ya: “Ta ĩ gwe ka tɛ azi mɛ ndo tɛnɛ tɛnɛ na asiɔ nyingɔ ma, wa ta ĩ hũnda nga ndo na azi mɛ ndo kambisa alo mɛ na gangɔ ma.” (Balevi 19:31) Lo hɛ̃ ndia niko ti nɛngɔ ya ta e ti ya sɔ̃ tɛ Satana ná ademɔ̃ ma. Satana na ademɔ̃ tɛ lo du awa kula tɛ Nzapa, wa ala ndo gi nga lingɔ e siɔni.

GI HĨNGANGƆ LO MƐNDƐ̃

Gi hĩngangɔ kwa mɛ aangelo ti mbilimbili ndo li, siɔ lo mɛ kwa tɛ asiɔ nyingɔ ndo si na ni, nga na ye mɛ elengbi ti lingɔ ti nɛngɔ ya ta e ti ya sɔ̃ tɛ Satana na ademɔ̃ ma.

4. Aangelo ndo za azi mɛ na gwɛ̃ ti hĩngangɔ Yehova

Ta aangelo tɛ Nzapa ndo pa nzɔ̃ pa nyɔ da na nyɔ da ma, kanda ala ndo za awakwa tɛ Nzapa ya ala tengbi na azi mɛ na gwɛ̃ ti hĩngangɔ Yehova. Di Suma 14:6, 7, wa na pɛni hɛ̃ gbinya ti hũnda olo mɛ:

Nda mɛ e na gwɛ̃ ya aangelo za e na ngoi mɛ e ndo pangɔ nzɔ̃ pa nɛ?
Hĩngangɔ ya aangelo lengbi ti zangɔ e ya e si ka ndo azi mɛ na gwɛ̃ ti mangɔ tɛnɛ ti ya Ngbangɔ, asa ngunu bɛ mɔ? Na lo nɛ?

5. Kɛ̃ kwa tɛ asiɔ nyingɔ

Satana na ademɔ̃ tɛ lo ndo du awa kula tɛ Yehova. Ala nga awa kula tɛ e. Di Luka 9:38-42, wa na pɛni hɛ̃ gbinya ti hũnda olo mɛ:

Ademɔ̃ ndo li kpale tɛrɛ azi ngasia?

Ta e lengbi ti zingɔ lége hɛ̃ ademɔ̃ ya ala handa e ma. Di Kolimbola Mibeko 18:10-12, wa na pɛni hɛ̃ gbinya ti ahũnda olo mɛ:

Ademɔ̃ ndo gi lingɔ kpale tɛrɛ e nga na tɛnɛngɔ tɛnɛ na e ngasia? Kwa tɛ ademɔ̃ mɛ azi ndo li ni ka ndo mɛ mɔ da nɛ?
Mɔ da bɛ mɔ ya nɛ, Yehova li nzɔ̃ ni na ndenge mɛ lo gbanzi e na kwa zu tɛ asiɔ nyingɔ? Na lo nɛ?

Ba VIDEO, wa na pɛni hɛ̃ gbinya ti ahũnda olo mɛ.

VIDEO: “Bótɛmɛla Zabolo” (5:02)

Mɔ da bɛ mɔ ya kpu mɛndó Palesa to ka gɔ̃ ti nyi lo ti wali adundó siɔni? Na lo nɛ?
Ye mɛndó ayɔ ya Palesa li ti nɛngɔ ya ta lo ti ya sɔ̃ tɛ ademɔ̃ ma nɛ?

A bɛta awakristo ndo li zu ti kɛ̃ngɔ kwa tɛ ademɔ̃. Di Awa Pangɔ Kwa 19:19 nga na 1 Kɔrinto 10:21, wa na pɛni hɛ̃ gbinya ti hũnda olo mɛ:

Se du ya mɔ na aye mɛ na mangbi na asiɔ nyingɔ, nda mɛ adu ngbondoni ya mɔ gbɛ̃ ni nɛ?

6. Mɔ lengbi ti nwɔ̃ngɔ Satana na ademɔ̃ tɛ lo

Satana la du gbia tɛ ademɔ̃. Kanda zo mɛ du gbia tɛ aangelo ti mbilimbili la du Mikaɛlɛ, ni du ila mɛndɛ̃ tɛ Yezo. Mikaɛlɛ na ngunu mɛ ngasia? Di Suma 12:7-9, wa na pɛni hɛ̃ gbinya ti ahũnda olo mɛ: