Manako a Iehova ke iloa e tautolu e magafaoa haana he lagi. Putoia ke he magafaoa ia e tau agelu ne fakahigoa ko e “tau tama tane . . . he Atua.” (Iopu 38:7) Ko e heigoa ne talahau he Tohi Tapu hagaao ke he tau agelu? Lauia fēfē e tau tagata ha ko e tau agelu? Ti ko e tau agelu oti kia ko e vala he magafaoa he Atua?

1. Ko hai e tau agelu?

Tufugatia e Iehova e tau agelu ato tufuga e ia e lalolagi. Tuga a Ia, ko e tau mena momoui fakaagaaga a lautolu ne nonofo he lagi. (Heperu 1:14) Totou miliona e tau agelu ti kehekehe a lautolu takitokotaha. (Fakakiteaga 5:11) Ko lautolu ia “kua eke hana [Iehova] tau fekau, kua fanogonogo ke he hana tau kupu.” (Salamo 103:20) He vahā i tuai, falu magaaho ne fakafano e Iehova e tau agelu ke fakahoko e tau fekau mo e lagomatai mo e fakahao e tau tagata haana. Mogonei, kua takitaki he tau agelu e tau Kerisiano ke he tau tagata ne manako ke fakaako hagaao ke he Atua.

2. Ko hai a Satani mo e haana a tau temoni?

Falu agelu ne nakai fakamooli tumau ki a Iehova. Ko e agelu fakamua ne totoko “kua higoa ko e tiapolo, ko Satani foki ia, ko ia kua fakahehe e lalolagi oti.” (Fakakiteaga 12:9) Manako a Satani ke pule ke he falu, ti fakaohooho e ia e tau tagata uluaki mo e falu agelu he magaaho fakamui ke totoko fakalataha mo ia. Ko e tau agelu totoko ia ne fakahigoa ko e tau temoni. Ne vega hifo e Iehova a lautolu he lagi ke he lalolagi, mo e to fakaotioti a lautolu.​—Totou Fakakiteaga 12:9, 12.

3. Lali fēfē a Satani mo e tau temoni ke fakahehē a tautolu?

Ko Satani mo e tau temoni kua fakahehē e tau tagata tokologa puhala he taulatua, ko e tau lagatau kelea ke matutaki mo e tau agaaga. Ma e fakatai, falu tagata ne kumi atu ke he tau tagata ne kitekite ke he tau aolagi, tau tagata talahau tuai, mo e tau taulatua. Falu ne kumi e tau tuluiaga fakaekekafo ne putoia e tau mena fakataulatua. Fakavaia foki e tau tagata ke talitonu na maeke a lautolu ke tutala ke he tau tagata mamate. Ka e hataki e Iehova a tautolu: “Aua neke hagao atu a mutolu kia lautolu ha i ai e tau agaga talahau tuai, aua neke kumi foki e mutolu ke he tau taulātua.” (Levitika 19:31) Tuku mai e ia e hatakiaga nei ke puipui a tautolu mai ia Satani mo e tau temoni. Ko e tau fī he Atua a lautolu, ti manako a lautolu ke fakamamahi a tautolu.

 KUMIKUMI FAKAHOKULO

6. Kautū he tau atu ki a Satani mo e haana tau temoni

Pule a Satani ke he tau temoni. Ka ko e tau agelu fakamooli kua takitaki he agelu ne mua ko Mekaeli, ko e taha higoa ha Iesu. Lahi fēfē e malolō ha Mekaeli? Totou Fakakiteaga 12:7-9, ti tutala ke he tau hūhū nei:

• Ko hai ne mua atu e malolō? Ko Mekaeli mo e tau agelu haana po ko Satani mo e tau temoni haana?

• Manatu kia a koe kua lata e tau tutaki ha Iesu ke matakutaku ki a Satani mo e tau temoni haana?

Maeke a koe ke kautū he tau atu ki a Satani mo e haana tau temoni. Totou Iakopo 4:7, ti tutala ke he hūhū nei:

• Puipui fēfē e koe a koe mai ia Satani mo e tau temoni?

 MANATU KATOA

Lagomatai he tau agelu fakamooli a tautolu. Ko Satani mo e haana tau temoni ko e tau fī ha Iehova, ti fakaaoga e lautolu e taulatua ke fakahehē e tau tagata.

Liu Fakamanatu

• Lagomatai fēfē he tau agelu ha Iehova e tau tagata ke fakaako hagaao ki a Ia?

• Ko hai a Satani mo e haana tau temoni?

• Ko e ha kua manako a koe ke fakamamao mai he taulatua?