CHILAYIJO 24
Ini Chinowi Ingilozi Akale Jinota Nshingoni?
Jehova unoda kuti tifunde nozwemhuli iye ikokudenga. Imhuli yeyo inoshanganisila ingilozi jinoshobwa jiwi “banabanhulumyana baMwali.” (Jobe 38:7) IBhayibhili linotini nozwengilozi? Ingilozi panazwajinobhancha na mubupenyu bwabanhu? Akale ingilozi jose imhuli yaMwali na?
1. Ini chinowi ingilozi?
Jehova wakabumba ingilozi asanu abumba inyika. Sa iye, jinambili wompepo akale jinogala kudenga. (BaHebhelu 1:14) Kuna mamiliyoni namamiliyoni engilozi akale jilosiyana-siyana. (Zwakatondejelwa 5:11) Ingilozi “jinota yozo [Jehova] zwaanoleba, jinowhilila iwhi lilye.” (Lwimbo 103:20) Kuva ntolo Jehova wakabetuma ingilozi kuti jisenge mawhi kubanhu, jibabhanche akale jibanunule. Mazhubano ingilozi jimutungamilila maKristo kubanhu banoda kufunda nozwaMwali.
2. Satani namadimoni awe ndibaani?
Jimwe ngilozi ajijakandilila mbeli jiwhilila Jehova. Ingilozi yokutanga kupanduka ndiyo “inowi Guluzhanje kana kuti Satani, unchengeji wopasi pose.” (Zwakatondejelwa 12:9) Satani wakabeda kutonga bamwe ndizwo akachengela Adamu naEva kuti bepanduke akale akochengela jimwe ingilozi. Ingilozi jakapanduka jinowi madimoni. Jehova wakajitatamila kudenga jikaposwa penyika akale jichezha kopalajwa.—Balani Zwakatondejelwa 12:9, 12.
3. Satani namadimoni awe bamukweja chini kutichengela?
Satani namadimoni awe bamuchengela banhu banji kuti bebawhilile bamuzuta beshingisa zwechidimoni nozwemijimu. Sonkwejaniso, banobhuza zuchatikana mubupenyu kubanhu banobhawunula maloto, jinganga nabanoloba ihakata. Bamwe banonda kubanhu bakadalo kana beda kulapwa bengolwala. Banhu bamuchengwa kuti bedimbwe kuti bangalebeleka nabakafa. Koga Jehova umutichenjeja: “Musinde kunaabo banota zwemijimu kana banoshingisa miti yemazha.” (Umpilo 19:31) Unotichenjeja kuti etitabilije kuna Satani namadimoni awe. Babengi baMwali banoda kutikubaja.
FUNDA ZUNJI
Funda nozunu zubhodo zunotiwa nengilozi, usikofunda nozobubi bokuta zwemijimu, akale kuti tingazutabilija chini kuna Satani namadimoni awe.
4. Ingilozi jinobhancha banhu kuti befunde nozwaJehova
Ingilozi atobayijo jinopupulila banhu. Koga jinokwanisa kutungamilila banhu baMwali kubanhu banoda kufunda nozuzwe. Balani Zwakatondejelwa 14:6, 7, akale kwejisani nemibhuzo yeyi:
-
Neni tida kubhanchwa nengilozi ponshingo wokupupula?
-
Zunokukutayija na kuziba kuti ingilozi jinokwanisa kukutungamilila kubanhu banoda kuwha zunji nozweBhayibhili? Neni tidalo?
5. Siya kuta zwemijimu
Satani namadimoni awe babengi baJehova. Babengi bedu nasu. Balani Luka 9:38-42, akale kwejisani nombuzo yoyu:
-
Madimoni anobabhata chini banhu?
Atitoda kuta zunu zunotishobela madimoni mubupenyu bwedu. Balani Kuzhajikijwa 18:10-12, akale kwejisani nemibhuzo yeyi:
-
Madimoni anoshingisa inzila jipi kuti etichengele akale kuti elebeleke nasu? Ndijipi inzila jechidimoni jinowaja kutiwa kundawu yawunogala?
-
Ubweni sokuti zulokwelela na kuti Jehova etilambije kushingisa inzila jechidimoni? Neni udalo?
Yebani iVIDIYO, akale kwejisani nemibhuzo inotobela.
-
Ubweni sokuti chibhada chakabakambalwa nomwana waPalesa chakabeta kuti engwine mubukukutu na? Neni udalo?
-
Palesa wakabekwelela kutani kuti ezutabilijile kumadimoni?
MaKristo echokomende anolamba kuta zwechidimoni unshaji wose. Balani Mishingo 19:19 na 1 BaKolinte 10:21, akale kwejisani nombuzo yoyu:
-
Neni zukakosha kupisa zwose zunu zunobhatanisa zwechidimoni?
6. Unokwanisa kukoma Satani namadimoni awe
Madimoni anotungamililwa naSatani. Koga ingilozi jilobimbika jinotungamililwa naJesu ingilozi hulwana yoyo unoshobwa ewi Mikayeli. Mikayeli unesimba lilichini? Balani Zwakatondejelwa 12:7-9, akale kwejisani nemibhuzo yeyi:
-
Ndiyani unesimba kupinda umwe, Mikayeli nengilozi jije kana kuti Satani namdimoni awe?
-
Ubweni sokuti batobeli baJesu banokwelela kutya Satani namadimoni awe?
Tokwanisa kukoma ihondo yokulwana naSatani namadimoni awe. Balani Jemusi 4:7, akale kwejisani nombuzo yoyu:
-
Ungazutabilija chini kuna Satani namadimoni awe?
BAMWE BANOTI: “Apana chibi kuzana magemu anota zwechidimoni kana kuyeba mafilimu. Kunakilwa chete.”
-
Neni kuyeya kwakadalo kulikubi?
INI ZWAWAFUNDA
Ingilozi jilobimbika jinotibhancha. Satani namadimoni awe babengi baJehova akale banoshingisa zwechidimoni kuti bechengele banhu.
Kubwilulula
-
Ingilozi jaJehova jimukubabhancha chini banhu kuti befunde nozuzwe?
-
Satani namadimoni awe ndibaani?
-
Neni ukwelela kuzanila kule nozwechidimoni?
PAMIJA PANA ZWAWAWANA
Bala uwhe kuti neni Jesu eshobwa ewi ingilozi hulwana Mikayeli.
“Ngubani UMikhayeli Ingilosi Enkulu?” (Inyaya ipo peintaneti)
Bona busumikiji bunotondeja kuti Satani wipo akale atoba kuyeya kubi kumomumoyo monhu.
Bona kuti umwe nhukaji wakasupulwa chini kumadimoni.
“Usekwazi Ukuthi Uphilelani” (INqabayokulinda, July 1, 1993)
Funda uwe kuti Satani umuchengela chini banhu kuti bete zwechidimoni.
“Iqiniso Mayelana Lamasalamusi, Lobuthakathi” (Indlela Eya Ekuphileni Okungapheliyo, Ingxenye 5)
