ƐZUKOALƐDEƐ 24
Duzu A Le Nɔhalɛ Wɔ Anwumabɔvolɛma Anwo A?
Gyihova kpondɛ kɛ yɛsukoa ye abusua ne mɔɔ wɔ anwuma la anwo debie. Anwumabɔvolɛma mɔɔ bɛfɛlɛ bɛ “Nyamenle amra” la boka abusua ɛhye anwo. (Dwobu 38:7) Duzu a Baebolo ne ka ye wɔ bɛ nwo a? Kɛzi bɛ nyɛleɛ ka yɛ ɛ? Asoo anwumabɔvolɛma kɔsɔɔti boka Nyamenle abusua ne anwo?
1. Anwumabɔvolɛma a le nwane mɔ?
Gyihova bɔle bɛ kolaa na yeabɔ azɛlɛ ye. Bɛle sunsum nu abɔdeɛ mɔɔ ɛnyelɛ ɛnnwu bɛ yɛɛ bɛwɔ anwuma lɔ kɛ Nyamenle la. (Hibuluma 1:14) Anwumabɔvolɛma mgbe dɔɔnwo a wɔ ɛkɛ a, yɛɛ ko biala le ngakyile. (Yekile 5:11) “Bɛdi [Gyihova] edwɛkɛ zo, na bɛtie ɔ ne.” (Edwɛne 103:20) Tete ne, ɛnee ɔyɛ a Gyihova soa ye anwumabɔvolɛma ɔmaa bɛka ye nrɛlaleɛ, bɛboa ye menli na bɛdie bɛ. Ɛnɛ, anwumabɔvolɛma kile Kilisienema adenle maa bɛkɔ menli mɔɔ kulo kɛ bɛsukoa Nyamenle anwo debie la ɛkɛ.
2. Nwane a le Seetan nee ye sunsum ɛtane ne mɔ?
Anwumabɔvolɛma bie mɔ anli nɔhalɛ ammaa Gyihova. Bɛfɛlɛ anwumabɔvolɛ mɔɔ limoale dele atua la “Abɔnsam nee Seetan, mɔɔ ɛlɛbɛlɛbɛla azɛlɛ ye azo amra amuala la.” (Yekile 12:9) Ɛnee Seetan kulo kɛ ɔdi awie mɔ anwo zo tumi, ɔti ɔbɛlɛbɛlale menli nwiɔ ne mɔɔ limoa la, nzinlii ɔbɛlɛbɛlale anwumabɔvolɛma gyɛne ɔmaanle bɛbokale ye atuadelɛ ne anwo. Bɛfɛlɛ anwumabɔvolɛma ɛhye mɔ mɔɔ dele atua la sunsum ɛtane. Gyihova ɛmaa bɛdu bɛ bɛvi anwuma bɛragua azɛlɛ ye azo, na ɔbazɛkye bɛ.—Kenga Yekile 12:9, 12.
3. Kɛzi Seetan nee sunsum ɛtane ne mɔ bɔ mɔdenle bɛbɛlɛbɛla yɛ ɛ?
Seetan nee sunsum ɛtane ne mɔ dua sunsum ɛtane nyɛleɛ, mɔɔ le mɔdenle mɔɔ awie bɔ kɛ ɔ nee sunsum ɛtane badendɛ la azo bɛlɛbɛla menli dɔɔnwo. Kɛ neazo la, bie mɔ kɔ nwɔlɔra neɛnleanuma, menli mɔɔ ka kenle bie edwɛkɛ yɛɛ ninsivolɛma ɛkɛ. Bie mɔ noko kpondɛ ayileyɛlɛ mɔɔ sunsum ɛtane nyɛleɛ boka nwo la. Bɛbɛlɛbɛla menli noko kɛ bɛbahola bɛ nee mowuamra adendɛ. Noko Gyihova ɛbɔ yɛ kɔkɔ kɛ: “Bɛmmatoa menli mɔɔ tendɛ sunsum ɛtane nloa zo la, yɛɛ bɛmmakɔ menli mɔɔ ka kenle bie edwɛkɛ la ɛkɛ.” (Lɛvitikɔso 19:31) Yebɔ yɛ kɔkɔ ɛhye amaa yeabɔ yɛ nwo bane yɛavi Seetan nee sunsum ɛtane ne mɔ anwo. Bɛle Nyamenle agbɔvolɛ, na bɛkulo kɛ bɛgyegye yɛ.
SUKOA DƆƆNWO
Sukoa ninyɛne mgbalɛ mɔɔ anwumabɔvolɛma yɛ, esiane mɔɔ wɔ sunsum ɛtane nyɛleɛ nu yɛɛ kɛzi yɛbahola yɛabɔ yɛ nwo bane yɛavi Seetan nee sunsum ɛtane ne mɔ anwo la anwo debie.
4. Anwumabɔvolɛma boa menli maa bɛsukoa Gyihova anwo debie
Nyamenle anwumabɔvolɛma mumua ne ɛnli menli daselɛ. Emomu, bɛkola bɛkile Nyamenle azonvolɛ adenle bɛmaa bɛkɔ menli mɔɔ bɛkulo kɛ bɛsukoa ɔ nwo debie la ɛkɛ. Kenga Yekile 14:6, 7, na akee bɛzuzu kpuya ɛhye mɔ anwo:
-
Duzu ati a yɛhyia anwumabɔvolɛma moalɛ wɔ daselɛlilɛ nu a?
-
Anwumabɔvolɛma mɔɔ wɔnwu kɛ bɛkola bɛkile wɔ adenle bɛmaa ɛkɔ menli mɔɔ ɔwɔ kɛ bɛte Baebolo ne anu edwɛkɛ ne ɛkɛ la maa wɔ anwosesebɛ ɔ? Kɛmɔti ɛ?
5. Kpo sunsum ɛtane nyɛleɛ
Seetan nee sunsum ɛtane ne mɔ le Gyihova agbɔvolɛ. Bɛkpɔ yɛdayɛ noko. Kenga Luku 9:38-42, na akee bɛzuzu kpuya ɛhye anwo:
-
Kɛzi sunsum ɛtane ne mɔ yɛ menli ɛ?
Yɛngulo kɛ yɛmaa sunsum ɛtane ne mɔ ba yɛ ɛbɛlabɔlɛ nu. Kenga Ditilɔnomi 18:10-12, na akee bɛzuzu kpuya ɛhye mɔ anwo:
-
Ndenle boni mɔ a sunsum ɛtane ne mɔ dua zo bɛlɛbɛla yɛ na bɛ nee yɛ tendɛ a? Nyɛleɛ ɛhye mɔ boni a bɛyɛ ye wɔ ɛleka mɔɔ ɛwɔ la a?
-
Ɛnea a ɔle kpalɛ kɛ Gyihova ɛdua sunsum ɛtane nyɛleɛ la ɔ? Duzu ati ɔ?
Ye VIDIO ne, na akee bɛzuzu kpuya ɛhye mɔ anwo.
-
Ɛnea a banzɛlɛ ne mɔɔ la Palesa ara raalɛ ne asa la le ngyegyelɛ ɔ? Duzu ati ɔ?
-
Duzu a anrɛɛ ɔwɔ kɛ Palesa yɛ amaa yeabɔ ɔ nwo bane yeavi sunsum ɛtane ne mɔ anwo a?
Nɔhalɛ Kilisienema ko tia sunsum ɛtane ne mɔ dahuu. Kenga Gyima ne 19:19 yɛɛ 1 Kɔlentema 10:21, na akee bɛzuzu kpuya ɛhye anwo:
-
Kɛmɔti a ɔhyia kɛ ɛsɛkye sunsum ɛtane nyɛleɛ debie biala mɔɔ ɛlɛ la ɛ?
6. Di Seetan nee ye sunsum ɛtane ne mɔ anwo zo konim
Seetan a le sunsum ɛtane ne mɔ kpanyinli a. Noko awie mɔɔ li anwumabɔvolɛ nɔhavoma ne ati la a le anwumabɔvolɛ kpanyinli Maekeɛle. Maekeɛle le duma bieko mɔɔ bɛfa bɛfɛlɛ Gyisɛse. Tumi boni a Maekeɛle lɛ a? Kenga Yekile 12:7-9, na akee bɛzuzu kpuya ɛhye mɔ anwo:
-
Nwane a lɛ tumi kpole a? Maekeɛle nee ye anwumabɔvolɛma anzɛɛ Seetan nee ye sunsum ɛtane ne mɔ?
-
Ɛnea a ɔwɔ kɛ Gyisɛse ɛdoavolɛma sulo Seetan nee ye sunsum ɛtane ne mɔ ɔ?
Ɛbahola wɔali Seetan nee ye sunsum ɛtane ne mɔ anwo zo konim. Kenga Gyemise 4:7, na akee bɛzuzu kpuya ɛhye anwo:
-
Kɛ ɔkɛyɛ na wɔabɔ ɛ nwo bane wɔavi Seetan nee ye sunsum ɛtane ne mɔ anwo ɛ?
BIE MƆ KA KƐ: “Ɛtane biala ɛnle nwo kɛ ɛbabɔ game anzɛɛ ɛbanlea vidio mɔɔ sunsum ɛtane nyɛleɛ wɔ nu la. Yɛfa yɛdielie yɛ nye ala.”
-
Duzu ati a adwenle zɛhae nee esiane lua a?
EDWƐKƐ TITILI
Anwumabɔvolɛ nɔhavoma boa yɛ. Seetan nee sunsum ɛtane ne mɔ le Gyihova agbɔvolɛ yɛɛ bɛdua sunsum ɛtane nyɛleɛ zo bɛbɛlɛbɛla menli.
Ndinu
-
Kɛzi Gyihova anwumabɔvolɛma ɛlɛboa menli bɛamaa bɛazukoa ɔ nwo debie ɛ?
-
Nwane a le Seetan nee ye sunsum ɛtane ne mɔ?
-
Duzu ati a ɛkulo kɛ ɛkpo sunsum ɛtane nyɛleɛ a?
KPONDƐ DƆƆNWO
Nea daselɛ mɔɔ kile kɛ Gyisɛse a le anwumabɔvolɛ kpanyinli Maekeɛle la.
“Nwane A Le Anwumabɔvolɛ Kpanyinli Maekeɛle?” (Edwɛkɛ mɔɔ wɔ jw.org azo)
Nea daselɛ mɔɔ kile kɛ Abɔnsam wɔ ɛkɛ ne amgba la.
Nea kɛzi raalɛ bie hwenle ɔ nwo vile sunsum ɛtane nyɛleɛ nwo la.
“Ɔnwunle Mɔɔ Ɔwɔ Kɛ Ɔyɛ Wɔ Ye ɛbɛlabɔlɛ Nu La” (Ɛzinzalɛ Arane, July 1, 1993)
Sukoa kɛzi Seetan dua sunsum ɛtane nyɛleɛ zo bɛlɛbɛla menli la.
“Ngonyia, Sili Nee Ayɛne Nwo Nɔhalɛ Ne” (Adenle Ne Mɔɔ Kɔ Dahuu Ngoane Nu La, foa 5)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
