LÈS 24
Ken e Angelnan Ta i Kiko Nan Ta Hasi?
Yehova ke pa nos siña tokante su famia den shelu. E famia ei ta inkluí angel ku ta ser yamá “e yu hòmbernan di Dios.” (Yòb 38:7) Kiko Beibel ta bisa tokante angel? Ki influensia nan tin riba hende? Tur angel ta forma parti di Dios su famia?
1. Ken e angelnan ta?
Yehova a krea angel promé ku el a traha tera. Meskos kuné, nan ta invisibel i nan ta biba den shelu. (Hebreonan 1:14) Tin miónes di angel, i kada un tin su mes personalidat. (Revelashon 5:11) Nan “ta kumpli ku [Yehova] su palabra i . . . ta obedes’é.” (Salmo 103:20) Den tempu bíbliko, Yehova a yega di usa angel pa hiba su mensahenan. El a usa angel tambe pa yuda i salba su pueblo. Awe, angel ta guia e sirbidónan di Dios na hende ku ke siña tokante Dios.
2. Ken Satanas i su demoñonan ta?
Algun angel no a keda fiel na Yehova. E promé angel ku a rebeldiá “yama Diabel i Satanas,” i e “ta gaña henter e tera habitá.” (Revelashon 12:9) Satanas tabata ke goberná, i p’esei el a influensiá Ádam ku Eva i despues asta otro angel pa desobedesé Yehova. E angelnan rebelde ei ta ser yamá demoño. Yehova a saka nan for di shelu i benta nan riba tera. Pronto nan lo ser destruí.—Lesa Revelashon 12:9, 12.
3. Kon Satanas i e demoñonan ta purba di gaña nos?
Awe, Satanas i e demoñonan ta gaña hopi hende pa medio di spiritismo. Hende ku ta praktiká spiritismo ta purba di komuniká ku spiritu. Por ehèmpel, algun hende ta konsultá ku astrólogo, miradó di destino, medio spiritista, sanadó òf kurandero. Otro hende ta konsultá horoskop òf ta buska tratamentu médiko ku tin di haber ku spiritismo. Ademas, algun hende ku a ser engañá ta asta kere ku nan por papia ku hende morto. a Pero Yehova ta spièrta nos: “No sigui tras di montadó [miradó di destino] ni spiritista; no konsultá ku nan.” (Levítiko 19:31) Yehova a duna nos e spièrtamentu akí pa protehá nos kontra Satanas i e demoñonan. Nan ta enemigu di Dios, i nan ke hasi nos daño.
KIKO MAS NOS POR SIÑA?
Ban wak e kosnan bon ku angel ta hasi. Ademas, wak dikon spiritismo ta peligroso i kon nos por protehá nos mes kontra Satanas i e demoñonan.
4. E angelnan ta yuda hende konosé Yehova
Dios su angelnan no ta papia direktamente ku hende. Mas bien, nan ta guia e sirbidónan di Dios na hende ku ke siña konosé Dios. Lesa Revelashon 14:6, 7. Despues, analisá e siguiente preguntanan:
-
Dikon nos mester di yudansa di e angelnan pa prediká?
-
E echo ku e angelnan por guia bo serka hende ku ke skucha mas tokante Beibel ta animá bo? Dikon bo ta bisa esei?
5. Rechasá spiritismo
Satanas i e demoñonan ta enemigu di Yehova. Nan ta nos enemigunan tambe. Lesa Lukas 9:38-42. Despues, analisá e siguiente pregunta:
-
Kon e demoñonan ta trata hende?
Nos no ke laga e demoñonan influensiá nos. Lesa Deuteronomio 18:10-12. Despues, analisá e siguiente preguntanan:
-
Kon e demoñonan ta purba di influensiá nos i komuniká ku nos? Ki práktika di spiritismo ta komun kaminda bo ta biba?
-
Bo ta haña ta bon ku Yehova ta prohibí tur loke tin di haber ku spiritismo? Dikon bo ta bisa esei?
Pasa e VIDIO. Despues, analisá e siguiente preguntanan:
-
Bo ta kere ku e amuleto di Palesa su yu muhé tabata peligroso? Dikon bo ta kere esei?
-
Kiko Palesa mester a hasi pa protehá su mes kontra e demoñonan?
Kristian berdadero semper a oponé e demoñonan. Lesa Echonan 19:19 i 1 Korintionan 10:21. Despues, analisá e siguiente pregunta:
-
Dikon ta importante pa destruí kualke kos ku bo por tin ku tin di haber ku spiritismo?
6. Gana e bataya kontra Satanas i su demoñonan
Satanas ta dirigí e demoñonan. Pero e angelnan fiel ta ser guiá pa Arkangel Miguel, un otro nòmber pa Hesus. Kon poderoso Miguel ta? Lesa Revelashon 12:7-9. Despues, analisá e siguiente preguntanan:
-
Ken ta mas poderoso, Miguel i su angelnan òf Satanas i su demoñonan?
-
Bo ta kere ku Hesus su siguidónan mester tin miedu di Satanas i su demoñonan?
Bo por gana e bataya kontra Satanas i su demoñonan. Lesa Santiago 4:7. Despues, analisá e siguiente pregunta:
-
Kon bo por protehá bo mes kontra Satanas i su demoñonan?
LOKE HENDE SA BISA: “No tin nada malu pa hunga wega òf wak pelíkula ku tin di haber ku spiritismo. Ta djis pa dibertí.”
-
Dikon e manera di pensa ei ta peligroso?
RESÚMEN
E angelnan fiel ta yuda nos. Satanas i su demoñonan ta enemigu di Yehova, i nan ta usa spiritismo pa gaña hende.
Repaso
-
Kon e angelnan ta yuda hende konosé Yehova?
-
Ken Satanas i su demoñonan ta?
-
Dikon bo tin ku keda leu for di spiritismo?
MAS INFORMASHON INTERESANTE
Wak mas evidensia ku ta mustra ku Hesus ta Arkangel Miguel.
Wak algun prueba ku ta mustra ku Diabel ta un persona real.
Wak kon un señora a libra su mes di influensia di demoño.
“El A Haña un Propósito pa Su Bida” (E Toren di Vigilansia di 1 di yüli 1993)
Wak kon Satanas ta usa spiritismo pa gaña hende.
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
