24. KAPITEL
Waut sent Enjel un waut doonen dee?
Jehova well haben, daut wie mea sellen von siene Famielje em Himmel weeten. En dee Famielje jeft daut Enjel, waut “Säns Gottes” jenant woaren (Hiob 38:7, JHF). Waut sajcht de Schreft von Enjel? Un waut haben dee met de Menschen to doonen? Sent aule Enjel Poat von Gott siene Famielje?
1. Wäa sent de Enjel?
De Enjel läwen em Himmel. Jehova muak dee, ea hee de Ieed muak. Daut sent Jeista, soo aus Jehova, un wie kjennen dee nich seenen (Hebräa 1:14). Daut jeft millionende Enjel un jieda eena es besonda (Openboarunk 5:11). Daut sent dee, “dee doa doonen waut hee [Jehova] sajcht, un sien Wuat jehuarsom sent” (Psalm 103:20). En de Bibeltiet brukt Jehova de Enjel toom siene Deena Norechten brinjen un dee halpen. Nu halpen de Enjel de Christen, Menschen to finjen, waut mea von Gott lieren wellen.
2. Wäa es de Fient un siene beese Jeista?
Eenje Enjel worden Jehova ontru. De ieeschta Enjel, waut sikj jäajen Jehova stald, es dee, “dee de beesa Fient un Soton jenant woat, un de gaunze Welt veleit” (Openboarunk 12:9). De Fient wull äwa aundre rejieren un doawäajen brocht hee de ieeschte Menschen, un lota uk noch eenje Enjel, bat doa, Jehova ojjehuarsom to sennen. Dise Enjel woaren beese Jeista jenant. Jehova haft dee utem Himmel rutjeschmäten un dee woaren noch venicht woaren (läs Openboarunk 12:9, 12).
3. Woo proowen de Fient un de beese Jeista ons to veleiden?
De Soton un de beese Jeista wellen de Menschen derch Zaubarie veleiden. Un doa es aul soont met en, wua de Menschen proowen met Jeista to räden. Eenje Menschen sieekjen bie Stiernforscha no Rot ooda bie soone, waut Woasajarie un Hakjsarie driewen. Aundre doonen met soont doktren, waut met Zaubarie to doonen haft. De Menschen woat uk enjebilt, daut dee kjennen met de Doodes räden. Oba Jehova sajcht: “Got nich no de Woasajasch un no dee, dee de . . . Jeista befroagen” (3. Mose 19:31). Jehova sajcht ons dit toom ons fa dän Soton un de beese Jeista beschitzen. Daut sent Gott siene Fiend un dee wellen ons schoden.
DOLLA UNJASTONEN
Lia von daut goode, waut de Enjel doonen, woo jefäadlich Zaubarie es un woo wie ons beschitzen kjennen fa dän Soton un de beese Jeista.
4. De Enjel halpen Menschen, von Jehova to lieren
Gott siene Enjel doonen nich selfst de Menschen prädjen. Enne Städ daut kjennen dee Gott siene Deena no soone Menschen leiden, waut von am lieren wellen. Läst Openboarunk 14:6-7 un dan got toop dise Froagen derch:
-
Wuarom fält ons daut aun de Enjel äare Help biem prädjen?
-
Jeft die daut nich Moot, daut de Enjel die halpen kjennen, soone Menschen to finjen, waut de Norecht von de Schreft fält to hieren? Wuarom?
5. Stal die jäajen Zaubarie
De Soton un de beese Jeista sent Jehova siene Fiend. Daut sent uk onse Fiend. Läst Lukas 9:38-42 un dan got toop dise Froag derch:
-
Woo behaundlen de beese Jeista de Menschen?
Wie wellen daut väabieejen, daut de beese Jeista sikj nich kjennen met ons aufjäwen. Läst 5. Mose 18:10-12 un dan got toop dise Froagen derch:
-
Woo proowen de beese Jeista sikj met ons auftojäwen un met ons to räden? Waut vonne Sitten sent en diene Jäajent Mood?
-
Jleefst du, daut et goot es, daut Jehova ons daut aufjesajcht haft, soont to doonen, waut met Zaubarie to doonen haft? Wuarom?
Kjikjt daut VIDEO un dan got toop de Froagen derch, waut hia aunjejäft sent.
-
Jleefst du, daut de Oarmbaunt, waut Palesa äare Dochta omhaud, Schoden brocht? Wuarom?
-
Waut must Palesa doonen toom sikj fa de beese Jeista beschitzen?
De woare Christen haben sikj noch emma jäajen de beese Jeista jestalt. Läst Aposteljeschicht 19:19 un 1. Korinta 10:21 un dan got toop dise Froag derch:
-
Wuarom es daut needich, aul onse Sachen to venichten, waut met Zaubarie to doonen haben?
6. Du kaust dän Soton un de beese Jeista jewennen
De Soton rejieet de beese Jeista. Oba de Leida von de true Enjel es de hechsta Enjel Michael, waut een aundra Nomen fa Jesus es. Woo väl Macht haft Michael? Läst Openboarunk 12:7-9 un dan got toop dise Froagen derch:
-
Wäa es stoakja, Michael un siene Enjel ooda de Soton un siene beese Jeista?
-
Jleefst du, daut Jesus siene Nofolja motten Angst haben fa dän Soton un siene beese Jeista?
Du kaust die jäajen dän Soton un siene beese Jeista stalen un jewennen. Läst Jakobus 4:7 un dan got toop dise Froag derch:
-
Woo kaust du die fa dän Soton un siene beese Jeista beschitzen?
WAUT EENJE SAJEN: “Daut baudat nuscht, wan eena Films kjikjt ooda Gäms spält, waut met Zaubarie to doonen haben. Daut es bloos fa Scheengonen.”
-
Wuarom es daut jefäadlich, soo to denkjen?
KAPITEL TOOPJEFOT
De true Enjel halpen ons. De Soton un siene beese Jeista sent Jehova siene Fiend un dee proowen, de Menschen met Zaubarie to veleiden.
Waut hast du jelieet?
-
Woo halpen Jehova siene Enjel de Menschen, von am to lieren?
-
Wäa sent de Soton un siene beese Jeista?
-
Wuarom west du nuscht met Zaubarie to doonen haben?
MEA NOSIEEKJEN
Unjasto die daut, waut fa Bewies daut jeft, daut Jesus Michael es, de hechsta Enjel.
Kjikj mol, waut fa Bewies daut jeft, daut de beesa Fient eene Persoon es un nich bloos waut schlajchtet en eenen Mensch.
“Jeft daut dän beesen Fient opp iernst?” (Artikjel opp jw.org)
See mol, woo eene Fru friekjeem von de beese Jeista.
Läs, woo de Soton Zaubarie brukt toom de Menschen hinjaret Licht fieren.
“De Woarheit äwa Zaubarie, Woasajarie un Hakjsarie” (De Wajch no daut eewje Läwen, 5. Poat)
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
