24 CAJ YACHACUY
¿Imatataj Biblia wilacun angelcunapita?
Cieluchoga familiayojmi Tayta Jehová y paycunapita musyananchitami munan. Chay familianchoga angelcunapis caycanmi y “Diospa churincuna” cashganta Biblia wilacun (Génesis 6:2). ¿Imatataj Biblia wilacun paycunapita? ¿Imatataj rurapäcun? ¿Lapanchuraj Diosta sirvircaycan?
1. ¿Pïcunataj caycan angelcuna?
Cay Pachata manaraj camarga, angelcunatarämi Jehová camargan. Diosnopis espiritulami paycunaga y tiyanan sitiuga cielumi (Hebreos 1:14). Maychicajmi, yupaytapis atipashwanrächu; jucnin jucnincunapis manami igualchu (Apocalipsis 5:11). Jehová “nishganta cäsucoj car” payta alabapäcun (Salmo 103:20). Unaychoga angelcunawanmi Jehová imata rurananpäpis wilachicoj y sirvejnincunata yanapänanpäpis mandamojmi. Canan wichanpis angelcunaga cristianucunatami pushan Diospita yachacuyta munajcunata taripäcunanpaj.
2. ¿Pïcunataj caycan Satanaswan demoniucuna?
Waquin angelcunaga Jehovapa contranchomi ticrapäcurgan. Jucnin caj cargan “Satanasmi. Paymi may chaychopis runacunata engaña[n]” (Apocalipsis 12:9). Y engañaytaga galaycush pasaypa lulacurmi: Adantapis Evatapis Diospa contrancho churacächergan. Chaynola rurargan waquin angelcunawanpis, paycunapitami ninchi supaycuna o demoniucuna cashganta. Jehovaga mayna cielupita garguriycamush y ichiclachona ilgachenga (leiriy Apocalipsis 12:9, 12).
3. ¿Imanoraj engañamashwan supaycuna?
Supaycunaga tucuynopami runacunata engañan; maquinman ishquerga pitapis wanuymanpis apanmanchi. Caycunami trampancunaga: horóscopo nishgan; brujucuna y curanderucuna rurashgan, y cucata ricaycur wilacojcuna. ‘Jacawanpis o imawanpis jampishayqui’ nejcunamanmi waquincuna aywapäcun, o ‘wanushga cajcunawanpis parlachishayqui’ nejcunamanpis. Pero Taytanchi Jehovaga caytami nimanchi: “Brujucunaman ni ricacojcunaman ama aywapäcunquichu” (Levítico 19:31). Chayno wilamanchi Satanaspita y demoniucunapita chapaycalämänanchipämi.
SHUMAJ YACHACURCUNAPAJ
Parlarcushun ali angelcunapita, y mana ali angelcunapa trampancunapita. Jina yachacushun imanotaj cuidacushwan Satanaspita y demoniuncunapita.
4. Angelcunaga yanapacunmi runacuna Jehovaman guelicunanpaj
Angelcuna puncun puncun yachachicoj mana aywarpis, Diospa sirvejnincunataga pushanmi ali shongu runacunata taripäcunanpaj. Leipäcuy Apocalipsis 14:6, 7 y caycunapita parlapacäriy:
-
¿Imanirtaj ali caycan predicaciuncho angelcunaraj yanapämänanchipaj?
-
Bibliapita yachacuyta munajcunaman angelcuna chayachishunayquipaj cajta musyar, ¿imanotaj ricacunqui? ¿Imanirtaj chayta ninqui?
5. Supaycunapa ruraynincunaman yaycapaychu
Satanaswan demoniucunaga Jehová Diosta chiquin, ¡paycunapitaga witicushun! Leipäcuy Lucas 9:38-42 y caypita parlapacäriy:
-
¿Supaycunaga runacunata laquipanchuraj?
Supaycunapa ruraynincunaman yaycapänayquipäga yarpaylapis yarpaychu. Leipäcuy Deuteronomio 18:10-12 y caycunapita parlapacäriy:
-
¿Imacunata rurartaj demoniucunaga ima munashgantapis runacunata rurachin? Marcayquicho mana alicunapa guepanchopis Diablo imachi caycan, ¿ima ruraycunataj caycan?
-
Diablo ima rurashgantapis chiquinapaj Dios mandacushganga, ¿alichu caycan gampaj? ¿Imanirtaj chayta ninqui?
VIDEUTA ricapäcuy y caycunapita parlapacäriy:
-
Itinpa maquincho Palesa warmi watapashganga ¿alichuraj cargan? ¿Imanir?
-
¿Imatataj Palesa rurargan supaycuna manana manchachinanpaj?
Unaypitana Diospa sirvejnincunaga supaycunapita witicärish. Leipäcuy Hechos 19:19 y 1 Corintios 10:21 y caypita parlapacäriy:
-
Ima charashgayquicuna Diablupa cajwan tincuptenga, ¿imanirtaj chaycunataga lapanta rupachiyparaj ushachinquiman?
6. Satanaswan demoniucunataga vencircunquimanmi
Demoniucunataga Satanasmi pushan. Pero yäracoj angelcunataga arcángel Miguelmi pushan, chay jutiwanpis reguinchimi Jesusta. ¿Ayca poderniyojtaj Miguelga? Leipäcuy Apocalipsis 12:7-9 y caycunapita parlapacäriy:
-
¿Pitaj más poderniyoj caycan: Miguelwan angelnincuna, o Satanaswan demoniuncuna?
-
¿Cristupa gatejnincunaga supaycunata manchapaycarlachuraj cawashwan?
Satanaswan demoniucunataga gampis vencircunquimanmi. Leipäcuy Santiago 4:7 y caypita parlapacäriy:
-
¿Imacunata rurartaj cuidacunquiman supaycunapita?
WAQUINCUNA NIPÄCUN: “Cucata chajchachicuptëpis o curanderucunaman aywaptëpis jampicunaläpämi; pitapis imanächu chaywanga”.
-
Pipis chayno yarpaptenga, ¿alichuraj caycan?
ICHIC YACHACUY
Ali angelcunaga yanapaycalämanchimi. Satanaswan demoniucuna ichanga Jehovata chiquir runacunata imayca trampacunata churapan.
Yarpänapaj
-
¿Ali angelcunaga imanotaj yanapacun runacuna Diosta reguinanpaj?
-
¿Pïcunataj caycan Satanaswan demoniucunaga?
-
¿Imanirtaj calpachacunquiman Diablo munashganta mana ruranayquipaj?
MASLATA YACHACUNAYQUIPAJ
Imanirtaj nishwan Jesús arcángel Miguel cashganta.
Yachacuy imataj Biblia nin Diablupita.
Imano juc warmi supaycunapita libracushganta yachacuy.
“Cushishganami ricacurgan” (Wilacamoj, 1 julio quilla, 1993)
Yachacuy imano brujo ruraycunawan supaycuna runacunata engañan.
