24 YACHACHIKUY
¿Imatan angelkunamanta Biblia willan?
Jehová Diosqa cielopi kaq familianta reqsinanchistan munan, chay familia ukhupin kashanku angelkuna, paykunatan nikullantaq “Diospa wawankuna” nispa (Job 38:7). ¿Imaninmi Biblia angelkunamanta? ¿Yanapankuchu paykuna runakunata? ¿Llapa angelkunachu Diospa familian kanku? Chaykunamantan yachasunchis.
1. ¿Imaynan kanku angelkuna?
Manaraq kay pachata kamashaspan Jehová Diosqa angelkunata kamarqan. Paykunaqa Dios jinan mana rikuna kanku, janaq pachapitaqmi tiyankupas (Hebreos 1:14). Chaymantapas paykunaqa askhallañan kanku, sapankankutaqmi jujniray kanku (Apocalipsis 5:11). Angelkunaqa Jehová Diospa munaynintan ruwanku, paytan kasukunku (Salmos 103:20). Ñaupa tiempopiqa kachamuqmi Diosqa angelkunata llaqtanman imaymanata willanankupaq, yanapanankupaq, enemigonkumanta libranankupaq ima. Kunanpas angelkunawanmi Diosqa Jesuspa qatikuqninkunata yanapashan allin sonqoyoq runakunata tarinankupaq.
2. ¿Imaninmi Biblia Satanasmanta supaykunamantapas?
Wakin angelkunan Diosmanta t’aqakapurqanku. Ñaupaq kaq t’aqakuqmi karqan Saqra Satanás. Paymi kay pachapi runakunata pantachishan (Apocalipsis 12:9). Kamachikuq kayta munaspan payqa Adanta Evatawan tanqarqan Diospa contranpi jatarinankupaq. Wakin angelkunatapas Diospa contranpin churarqan, chay angelkunatan “supaykuna, demoniokuna” nispa nikun. Chay mana kasukuq angelkunataqa qarqomurqanmi Diosqa janaq pachamanta, jinaspan kay pachaman wijch’uykamurqan. Paykunaqa wiñaypaqmi chinkachisqa kapunqaku (leey Apocalipsis 12:9, 12).
3. ¿Imaynatan Satanaswan supaykunawan runakunata engañashanku?
Satanaswan supaykunawanqa askha runakunatan layqa ruwaykunawan engañashanku. ¿Imataq layqa ruwaykunari? Chay layqa ruwaykunapin kashan: suerteta qhawachikuy, horóscopo nisqata leey, mosqoykunapi creey, watuqkunata tapuy, layqakunaman riy, curandero nisqakunawan jampichikuy, chaykuna jina juj ruwaykuna ima. Chay ruwaykunaqa Diospa cheqnikusqan millay angelkunamanmi qayllaykachiwasunman, chaymi manapuni allinchu chaykunaqa. Chayraykun Jehová Diosqa chay millay angelkunamanta pakaykuwananchispaq Bibliapi nirqan: “Aman rinkichischu wañusqakunata tapuqkunamanqa, amallataqmi rinkichischu watuq runakunamanpas”, nispa (Levítico 19:31).
ASTAWAN YACHASUNCHIS
Kunanqa yachasun imakunatas allin angelkuna ruwashanku chayta, imaraykus layqa ruwaykunamanta, Satanasmanta supayninkunamantapas cuidakunanchis chaykunamantawan.
4. Allin angelkunaqa runakunatan yanapashanku Jehová Diosta reqsinankupaq
Diospa angelninkunaqa manan paykuna kikinkuchu runakunaman Diosmanta willanku, aswanpas Jehová Diosta serviqkunatan yanapanku Diosmanta yachay munaqkunata tarinankupaq. Leeychis Apocalipsis 14:6, 7 textokunata, jinaspa jamuq tapuykunaman jina parlariychis:
-
¿Imaraykun Diosmanta willananchispaq allinpuni angelkunaq yanapaynin?
-
Angelkunaqa yanapasunkikumanmi allin sonqoyoq runakunata tarinaykipaq, ¿kusikunapaqchu chay manachu?
5. Amapuni layqa ruwaykunaman chaqrukusunchu
Satanaswan supaykunawanqa Jehová Diostapas noqanchistapas cheqnikuwanchismi. Leeychis Lucas 9:38-42 textota, jinaspa jamuq tapuyman jina parlariychis:
-
¿Imakunatan supaykuna runakunata ruwankuman?
Amapuni supaykunaman campota qosunchu. Leeychis Deuteronomio 18:10-12 textota, jinaspa jamuq tapuykunaman jina parlariychis:
-
¿Imatan supaykuna ruwanku paykunaq makinpi kananchispaq? ¿Ima chhayna ruwaykunan kan tiyasqayki llaqtapi?
-
¿Allinchu Jehová Diospa layqa ruwaykunamanta jark’awasqanchis icha manachu?
VIDEOTA qhawaychis, jinaspa jamuq tapuykunaman jina parlariychis:
-
¿Imaraykun mana allinchu karqan Palesaq wawanpa makinpi kaq amuleto nisqa?
-
¿Imatan Palesa ruwarqan supaykunamanta cuidakunanpaq?
Jesusta qatikuqkunaqa manapunin supaykunaq ruwayninkunamanqa chaqrukunanchischu. Leeychis Hechos 19:19; 1 Corintios 10:21 textokunata, jinaspa jamuq tapuyman jina parlariychis:
-
¿Imanaqtinmi ñut’unayki otaq ruphachinayki layqa ruwaykunawan tupaq cosasniykikunata?
6. Atipasunmanmi Satanastapas supaykunatapas
Supaykunataqa Satanasmi umallin, Dios sonqo angelkunatan ichaqa arcángel Miguel umallin. Miguelqa Señor Jesuspa jujnin sutinmi. ¿Imayna atiyniyoqmi Miguel? Chaypaq leeychis Apocalipsis 12:7-9 textota, jinaspa jamuq tapuykunaman jina parlariychis:
-
¿Pikunan aswan atiyniyoq kanku: Miguelwan angelninkunawanchu icha Satanaswan supayninkunawanchu?
-
¿Manchakunankuchu Jesuspa qatikuqninkuna Satanastapas supaykunatapas?
Atipasunmanmi Satanastapas supayninkunatapas. Leeychis Santiago 4:7 textota, jinaspa jamuq tapuyman jina parlariychis:
-
¿Imatan ruwanayki Satanasmanta supaykunamantawan karunchakunaykipaq?
WAKIN RUNAKUNAN NINKU: “Layqa ruwaykunawan tupaq peliculakunapas pujllaykunapas manan juchachu. Kusirikunallapaqmi chaykunaqa”, nispa.
-
¿Imanaqtinmi manapuni allinchu kanman chay runakuna jina piensay?
IMATAN YACHAMURQANCHIS
Dios sonqo angelkunaqa yanapawananchispaqmi kashanku, Satanaswan supayninkunawanmi ichaqa Jehová Dios contra kashanku, chaymi layqa ruwaykunawan runakunata engañashanku.
Yuyarisun
-
¿Imaynatan angelkuna runakunata yanapashanku Diosta reqsinankupaq?
-
¿Imatan yacharunchis Satanasmanta supayninkunamantapas?
-
¿Imaraykun karunchakunayki layqa ruwaykunamanta?
ASTAWAN YACHANAYKIPAQ
Jesusmi arcángel Miguelqa. Kaypin chaymanta yachanki.
Wakinqa piensanku Saqraqa cuentolla kananpaqmi, ichaqa ¿chhaynachu kanman? Chaymantan kaypi yachanki.
¿Imatan juj warmi ruwarqan supaykunaq makinmanta librakunanpaq? Chaymantan kaypi yachanki.
Imaynatachus Satanás layqa ruwaykunawan runakunata engañashan chaytan kaypi astawan yachanki.
“¿Imatan yachanayki layqa ruwaykunamanta?” (¿Tarirqankichu wiñay kausayman apaq ñanta?, pisqa parte)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
