LECCIÓN 24
Bibliapica ¿imatata angelcunamandaca yachachin?
Jehová Diosca jahua cielopi causajuj paipa familiata rijsichunmi munan. Y angelcunapashmi Jehovapa familia can. Bibliapica, angelcunataca “Diospaj churicuna” nishpami rijsin (Job 38:7). Pero Bibliapica ¿imatata angelcunamandaca yachachin? Angelcunaca ¿imashinata gentecunataca ayudaita ushan? ¿Tucuilla angelcunachu Jehovapa familia can?
1. Angelcunaca ¿picunata can?
Cai mundota nara rurashpallatami Jehová Diosca angelcunataca paiman parecidota rurarca. Angelcunaca shuj espiritumi can. Chaimandami paicunataca na ricui ushapanchi. Paicunaca jahua cielopimi causan (Hebreos 1:14). Ashtaca millón angelcunami tian. Shinapash cada unomi diferente can (Apocalipsis 5:11). Angelcunaca Jehová Dios ‘nishcata rurajcuna, cazujcunami’ can (Salmo 103:20). Punda tiempocunapica Jehová Diosca paipa sirvijcunata ayudangapaj, cuidangapaj, huaquin yuyaicunata villangapapashmi angelcunataca utilizan carca. Y cunan tiempopica Taita Diosta rijsingapaj munaj gentecunata tarichunmi angelcunaca ayudanajun.
2. Satanaspash, demoniocunapash ¿picunata can?
Huaquin angelcunami Taita Diospa contra tucurca. Punda contra tucushca angelca, ‘Diablo y Satanasmi can. Paimi cai alpapi tucui gentecunata umachijun’ (Apocalipsis 12:9). Satanás Diabloca shujcunapash paishna Jehovapa contra tucuchunmi munarca. Chaimi Adán y Evatapash pandachirca. Shinallata huaquin angelcunatapashmi pandachirca. Taita Diospa contra tucushca angelcunaca ayacuna o demoniocunami can. Paicunatami Jehová Diosca jahua cielomanda cai alpaman shitamurca. Pero ñallami cai demoniocunataca tucuchitapacha tucuchishpa saquinga (Apocalipsis 12:9, 12, liipangui).
3. Satanás, paipa demoniocunapash ¿imashinata gentecunataca umachinajun?
Diablopash, demoniocunapash nali ruraicunahuan o espiritismo nishcacunahuanmi gentecunataca pandachijun. Por ejemplo, huaquin gentecunaca jipa punllacunapi ima pasanata yachangapaj, shinallata jambiringapaj munashpami brujocunapaman rin. Shinami nali ruraicunapi chapurin. Shinallata ashtaca gentecunaca, huañushcacunahuan parlaita ushanchi nishpami shuj gentecunata umachishpa purin. Shinapash “yumbucunatapash, yachajcunatapash na cutin mascanachu canguichi” nishpami Jehová Diosca advirtin (Levítico 19:31). Satanaspash, demoniocunapash Jehová Diospa contracunami can. Paicunamanda cuidangapaj munashpami ñucanchitaca shina advirtin.
ASHTAHUAN YACHAJUPASHUNCHI
Cunanga ali angelcunapa ruraicunamandami ashtahuan yachajugripanchi. Shinallata espiritismo peligroso cashcatapashmi ricugripanchi. Ashtahuanbash Satanasmanda, demoniocunamandapash imashina cuidarina cashcatapashmi yachajugripanchi.
4. Angelcunaca gentecuna Jehová Diosta rijsichunmi ayudan
Angelcunaca gentecunahuan directamente parlashpaca na predicanllu. Shinapash Taita Diosmanda yachajungapaj munaj gentecunata tarichunmi ñucanchitaca ayudan. Apocalipsis 14:6 y 7ta liishpa, cai tapuita contestapangui:
-
Angelcuna predicacionbi ayudachunga ¿imamandata minishtipanchi?
-
Jehovata rijsingapaj munaj gentecunata tarichun angelcuna ayudan cashcata yachashpaca ¿imashinata sintiripangui?
5. Demoniocunapa ruraicunamanda, espiritismomandapash anchurinapachami cangui
Satanaspash, demoniocunapash Jehová Diospa contrami can. Ñucanchipa contracunapashmi can. Lucas 9:38manda 42caman liishpa, cai tapuita contestapangui:
-
Demoniocunaca ¿imashinata gentecunataca tratan?
Demoniocunahuanga ima ricunatapash na charinachu capanchi. Deuteronomio 18:10manda 12caman liishpa, cai tapuicunata contestapangui:
-
Demoniocunaca ¿imashinata ñucanchicunataca umachingapaj munan? ¿Quiquin causajushca llactapipashchu shina cosascunata uyapashcangui?
-
Demoniocunapa ruraicunapi ama chapurichun mandashpaca ¿alitachu Taita Diosca rurashca?
VIDEOTA ricushpa, cai tapuicunata contestapangui:
-
Huahuagupa maquipi churashca pulseraca ¿alichu carca? ¿Imatata nipanguiman?
-
Demoniocunapa ruraicunamanda cuidaringapaca ¿imatata Anita huarmiguca rurana carca?
Ciertopacha cristianocunaca siempremi demoniocunapa ruraicunataca millanayachishpa ricushcanchi. Hechos 19:19 y 1 Corintios 10:21ta liishpa, cai tapuita contestapangui:
-
¿Imashpata demoniocunapa o espiritismo nishca cosascunata charishpaca rupachishpa saquina capanchi?
6. Satanastapash, demoniocunatapash mishai ushashunmi
Demoniocunataca Satanasmi mandajun. Pero ali angelcunataca arcángel Miguelmi mandajun. Chai arcangelca Jesusmi can. Paica ¿poderta charinllu? Apocalipsis 12:7manda 9caman liishpa, cai tapuicunata contestapangui:
-
Miguelpash, paipa angelcunapash ¿Satanasta, demoniocunatapash yali podertachu charin?
-
Jesusta catijcunaca ¿Satanastapash, demoniocunatapash manllanachu capanchi?
Satanastapash, demoniocunatapash mishai ushanguimi. Santiago 4:7ta liishpa, cai tapuita contestapangui:
-
¿Imashinata Satanasmanda, demoniocunamandapash cuidarita ushapangui?
HUAQUINGUNACA, “Peliculacunapi o videojuegocunapi magia tiajpica ricunallami can. Na imapash pasanllu. Solo pugllangapallami can” ninmi.
-
Shina pensanaca ¿imashpata peligroso can?
YARINGAPAJ
Ali angelcunaca ñucanchita ayudanmi. Cutin Satanaspash, demoniocunapash Jehovapa contracunami can. Chaimi paicunaca espiritismo cosascunata utilizashpa gentecunataca umachinajun.
¿Imatata yachajupashcanchi?
-
Jehová Diosta gentecuna rijsichunga ¿imashinata angelcunaca ayudan?
-
Satanaspash, demoniocunapash ¿picunata can?
-
Demoniocunahuan ricunata charij ruraicunapica ¿chapurinachu capangui?
CAITAPASH RICUPAI
Jesusta imamanda arcángel Miguel nishpapash rijsishcata ricupai.
“Angelcunata mandaj ángel Miguelca ¿pita can?” (jw.org paginapi ricupangui)
Diablo ciertopacha tiashcata o pipacha cashcata ricupai.
“¿Diabloca ciertopachachu tian?” (jw.org paginapi ricupangui)
Imashina shuj señoragu ayacunapa ruraicunamanda caruyai ushashcata ricupai.
“Ali causaitami tarirca” (Villajun revista, 1 de julio de 1993)
Espiritismota utilizashpa gentecunata imashina Satanás umachijujta ricupai.
Cai temacunata ashtahuan liipai
GENTECUNAPA TAPUICUNA
Testigo de Jehovacunaca ¿imashinata Bibliamandaca yachachinchi?
Testigo de Jehovacunahuan Bibliamanda yachajujushpaca quiquin charishca Bibliatallatami utilizaita ushapangui. Bibliamanda yachajujushpaca quiquinba familiata o pitapash invitaita ushapanguillami.
