24 YACHANA PARTI
Bibliaga angelgunamanda imatata nin
Jehovaga cieloibi auc paiba ailluta ricsichun munan. Angelgunaga cai aillu parti manaun. Paigunataga “Diospa churiguna” nisha ricsishca manaun (Job 38:7). Bibliaga angelgunamanda imatata yachachin. Angelgunaga ñucanchita yanapanaunzhu. Huin angelgunachu Diospa aillu parti anaun.
1. Angelgunaga piguna tanaun
Cai Allpata mana rashallata, punda Jehovaga angelgunata rara. Pai shinallata, mana ricuibac chanaun, cieloibimi causanaun (Hebreos 1:14). Ashca mana yupaibac angelguna tianaun, carangunami chican anaun (Apocalipsis 5:11). Paigunaga, “Jehova nishcata ranaun, pai mandashcata casunaun” (Salmo 103:20). Callari timpuibi, Jehovaga pai rimashcata pasachingahua, paiba llactata yanapasha quishpichingahua, angelgunata cachara. Cunan punzhagunaibihuas, angelgunaga Diosmanda yachana munac runagunata tupangahua, Jesusta caticcunata pushanaun.
2. Supai, paiba demoniogunaga piguna tanaun
Maican angelgunaga, Jehovata mana casusha saquinaura. Supaiga callari urasmanda Jehovata mana casura. Paiga “Satanas nishca man, intiru munduta umachic man” (Apocalipsis 12:9). Satanasca shuc runagunata mandanata munara. Chiraicu, paiga Adan Evata mana Diosta casunauchun nisha pandachira. Huasha, paiba parti tucunauchun nisha, shuc angelgunata umara. Chi Diosta mana casuc angelgunaga, demonioguna nishca manaun. Jehovaga, cielomanda llucshichisha, cai Allpama paigunata shitara. Diosca paigunata ñallami tucuchinga (Apocalipsis 12:9, 12ta leipai).
3. Supai, paiba demoniogunaga imasata runagunata umanaun
Supai, demoniogunaga ashca runagunata brujugunahuan, adivinaccunahuan umanaun. Shuc runa brujugunama rishaga, demoniogunamami caillayan. Maicangunaga, pucusha ambic runagunama, huairata pichac runagunama rinaun. Shuccunaga, misha o supai rumigunata charinaun. Shuccuna randiga, ima tucungaraushcata ricungahua, ima ungüimandas ambiringahua, ayahuascata o huanducta upinaun. Demoniogunaga, huañushca runagunahuan cuintanchi nishami quirichinaun. Chasna acpihuas, Jehovaga caitami nin: “Ama brujugunama ringuichichu, adivinaccunata ama tapunguichichu” (Levitico 19:31). Supai, demoniogunaga, Diospa enemigo ashcamandami, ñucanchita huaglichinata munanaun. Chiraicu, Jehovaga paigunamanda quishpichinata munan.
CAIMANDA MASTA YACHAI
Angelguna ali rashcagunamanda rimashunchi. Imahua brujugunama rina mana ali ashcata yachashun. Chasnallata, imashina Supaimanda, demoniogunamanda cuirarina ushashcata ricushun.
4. Angelgunaga, runaguna Jehovata ricsinauchun nisha yanapanaun
Dios cachashca angelgunaga, runagunata mana predicanaunzhu. Randi, paigunaga, Diosmanda yachana munac runagunata tupangahua, Jehovata adoraccunata pushanaun. Apocalipsis 14:6, 7ta leichi, huasha cai tapuigunamanda cuintanacuichi:
-
Imahuata predicangahua angelguna yanapaita minishtinchi.
-
Angelguna Bibliamanda yachana munac runagunata tupangahua, canda yanapashcata yachashaga, imashinata sintiringui. Imahua.
5. Supai, paiba demonioguna rashcagunamanda caruyai
Supai, paiba demoniogunas, Jehovahua enemigo manaun. Chasnallata, ñucanchi enemigogunahuas manaun. Lucas 9:38-42ta leichi, huasha cai tapuimanda cuintanacuichi:
-
Demoniogunaga imashinata runagunata turmintachinaun.
Demonioguna ñucanchi causaibi yaicunauchun nisha, mana saquina chanchi. Deuteronomio 18:10-12ta leichi, huasha cai tapuigunamanda cuintanacuichi:
-
Demoniogunaga imashinata ñucanchita pandachisha, ñucanchihuan cuintanacunata munanaun. Can causashca llactaibiga, ima brujuguna rashcagunatata ricungui.
-
Jehovaga, brujuguna rashcagunata ama raichu nishca, ali chan. Imahua.
VIDEOTA ricuichi, huasha cai tapuigunamanda cuintanacuichi:
-
Elenahua huahua maquibi anguta huatashcaga ali chara. Imahua.
-
Elenaga, demoniogunamanda quishpiringahua imatata rana ara.
Sirtu cristianogunaga demoniogunamanda caruyasha, contra tucunaun. Hechos 19:19 y 1 Corintios 10:21ta (TNM) leichi, a huasha cai tapuimanda cuintanacuichi:
-
Imahuata brujugunamanda shamuc cosascunata huinda rupachisha ichuna anchi.
6. Canga supaita paiba demoniogunata binsinata ushangui
Demoniogunata supaimi mandaun. Randi, Diosta casuc angelgunataga Miguel nishca Arcangelmi mandaun. Miguel nishcaga, Jesuspa shuc shuti man. Miguelga masna ushaitata charin. Apocalipsis 12:7-9ta leichi, huasha cai tapuigunamanda cuintanacuichi:
-
Pigunata mas ushaita charinaun: Miguel paiba angelgunahuan o Supai paiba demoniogunahuan.
-
Sirtu Jesusta caticcuna, supaita, paiba demoniogunata manzhana chanaun.
Canga, supaita, paiba demoniogunata binsinata ushangui. Santiago 4:7ta leichi, huasha cai tapuimanda cuintanacuichi:
-
Canga, imashinata supaimanda paiba demoniogunamanda cuirarinata ushangui.
MAICANGUNAGA CASNAMI NINAUN: “Ayahuascata o huanducta upinaga mana imas chan”.
-
Imahuata caita yuyanaga mana ali an.
IMATA YACHASHCANGUI
Diosta casuc angelguna yanapaitucunchi. Supai, paiba demoniogunaga Jehovahua enemigo manaun. Chasna ashami, brujugunahuan, adivinaccunahuan runagunata umanaun.
Yachashcata cuintai
-
Runaguna Jehovata ricsichun nisha, casuc angelgunaga imatata ranaun.
-
Satanas paiba demoniogunaga piguna tanaun.
-
Imahuata canga brujugunama adivinaccunama mana rina angui.
CANLLATA MASTA YACHAI
Jesusca imahua Arcangel Miguel ashcata yachai.
Supai sirtu tiashcata leisha yachai.
Shuc huarmi imashina demonioguna rashcamanda lugaryashcata ricui.
“Paiba causaihuan imata rana ashcata yachara” (La Atalaya, 1 de julio de 1993)
Supai imashina brujugunahuan runagunata umachishcata yachai.
“Brujuguna rashcaga sirtu chan” (¿Ha encontrado usted el camino a la vida eterna?, parte 5)
a 1 Corintios 10:21 (TNM): “Jehova cushca pillchita, demonioguna cushca pillchitahuas, mana ishcandita upina ushanguichichu. Chasnallata, Jehova carashca micunata, demonioguna carashca micunatahuas, mana ishcandita micuna ushanguichichu”.
