O Jehowah kamell, te djinas, koon leskri familja an o bolepen hi. An leskri familja hin ninna i bolepangre, kai wenn “i Debleskre tchawe” kharedo (1. Mose 6:2). Hoi penell i bibla pral i bolepangre? Hoi krenn le i menshentsa? Denn an i Debleskri familja latche un tchilatche bolepangre?

1. Koon hin i bolepangre?

I bolepangre wan i Jehowestar kerdo. Har job, hin jon duchengre an o bolepen. Doleske nai dikah len gar (Hebrearja 1:14). Kote denn bud millione bolepangre, un hakenes hi peskri shinia (Debleskro Tsiro 5:11). Jon “krenn, hoi job [o Jehowah] penell, un shunenn ap leskre laba” (Gilja 103:20). An o phuro tsiro bitchras o Jehowah len bud kope, te penenn le i menshenge kol laba, hoi job lenge kamas te penell, jon hins lenge koi un lan len dran phare situatione win. An maro tsiro anenn le i Debleskre budepangren pash kolende, kai kamenn budeder pral leste te djinell.

2. Koon hi o beng un leskre demone?

Kote denn bolepangre, kai atchan gar ap i Jehoweskri rig. O glanstunsto bolepaskro, kai kamas pes pral i Jehoweste te hadell, wella “Beng un Satan, ko chocheno, kai tserdell i menshen ap i tseli phub ap peskro drom” kharedo (Debleskro Tsiro 12:9). Job kamas pral wawarende te rajell, un anas i Adames, i Evat un bud bolepangren jaake dur, te rebellierenn le ninna. Kola tchilatche bolepangre wenna demone kharedo. Jon wan dran o bolepen ferdemen, wan ap i phub witsedo, un o tsiro wella, kai wenn le maredo (Dik pal an Debleskro Tsiro 12:9, 12).

3. Har kamenn o beng un leskre demone men ap pengro drom te tserdell?

O beng un leskre demone lenn koowa har kanna spiritismus un okkultismus, te anenn le men ap pengro drom. Halauter, hoi direkt oder indirekt bengeskro koowa hi, hi menge gar mishto. Koowa har i astrologia, o durkepen, i horoskope un o rakepen i mulentsa hi an o Debleskre jaka bengeskro koowa. O Dewel kamell witar gar, mer te djas pash sawe dramangre, kai mangenn i nasslepen krik. O Jehowah dell men trad: “Ma djan pash i durkepangre un pash kolende, kai mulen putchenn!” (3. Mose 19:31.) O beng un i demone hin tchilatche un kamenn men te dukrell. Mer te rikrah men ap o Jehoweskro lab, rikrell job peskro wast pral mende.

 RODAS DUREDER

6. Tu nai weh sorleder har o beng un i demone

O pralstuno i tchilatche bolepangrendar hi o beng. O pralstuno i latche bolepangrendar hi o Glanstunsto Bolepaskro Michael, ko hi i wawar lab i Jesestar. Har sorles hi o Michael? Dikenn pal an Debleskro tsiro 12:7-9, un rakrenn khetne pral:

• Koon hi sorleder: O Michael un leskre bolepangre oder o beng un leskre demone?

• Hoi penals tu: Hunte well i Jeseskre nashepangren traash glan i bengeste un leskre demonende?

An ko kurepen i bengeha un leskre demonentsa nai weh tu sorleder. Dikenn pal an Jakobo 4:7, un rakrenn khetne pral:

• Hoi hunte kress tu, te nashell pes o beng tutar?

 HOI KATE PENLO WAS

Latche bolepangre hin menge koi. O beng un i demone hin i Jehoweskre feinde, un o tselo bengeskro koowa — spiritismus un okkultismus — lenn le, te nai anenn le men ap pengro drom.

Hoi penals tu?

• Hoi krenn i Jehoweskre bolepangre kolenge, kai kamenn budeder pral leste te djinell?

• Koon hi o beng un leskre demone?

• Hoske kameh tu kek bengeskro koowa an tiro djipen te mukell?