24 ӶЛАВА

Чачимос пала анӷелоря

ВОСПРОИЗВЕСТИ

Со андэ Библия ԥэнэнпэ пала анӷелоря? Со вонэ моӷут тэ терэн? Кала андэ Библия и дума жал пала анӷелоря, пэр лэндэ ԥэнэн «лэ Дэвлэстирэ шавэ» (Иов 38:7). Вижал, кай лэ Иеговастэ по нэбо исин ери, и во камэл, кай амэ тэ ӷанас кодэлэн, ко жувэл лэса по нэбо. Ай всаворэ анӷелоря андэ лэ Иеговаско ери?

1. Ко када анӷелоря?

О Иегова создал лэ анӷелонэн инке тоди, кала на сас и ԥув. Вонэ, сар и о Иегова, жувэн по нэбо и на дицон (Евреям 1:14). Лэн милионоря и кажно андар лэндэ особенно (Откровение 5:11). И анӷелоря кандэн лэ Иеговас (Псалом 103:20). Дэлмут о Иегова бишалэлас лэ анӷелонэн, кай вонэ тэ ԥэнэн лэ манушэнди важно новость, тэ поможын или тэ фэрин лэн. Адес вонэ поможын лэ христианонэнди тэ виарақэн лэ манушэн, савэ камэн тэ уӷанэн лэ Дэвлэс.

2. Ко када о Сатана и найвужэ?

Дэсавэ анӷелоря отжылэ лэ Дэвлэстар. По анӷело, саво пэрво жыля против Дэл ԥэнэн, Сатана, Бэнг и Найвужо, саво обхохавэл всаворэ́н, ко жувэл пэ ԥув (Откровение 12:9). О Сатана камэлас, кай авэр тэ кандэн лэс. Во стердя кадя, кай и пэрви мануша жылэ против Дэл. Потом против Дэл жылэ дажэ дэсавэ анӷелоря. Пэ кадэла анӷелоря ԥэнэн найвужэ или бэнга. О Иегова сшутя лэн па нэбо пэ ԥув, и авэла время, кала о Дэл умарэла лэн (Адиносар Откровение 12:9, 12).

3. Сар о Сатана и найвужэ обхохавэн лэ манушэн?

О Сатана и найвужэ обхохавэн бутэ манушэн через о бэнгалимос, када, кала сԥандёнпэ лэ бэнгэнца. Дэсавэ жан каринг кодэла, ко драбатярэл, кай и ԥуря, савэ личин молитвэнца, кай и экстрасэнсоря и кай кодэла, ко драбатярэл па черӷая. Кадяжэ дэсавэ врачоря личин лэ найвужэнца. Инке и мануша патян, кай моӷут тэ дэн дума кодэлэнца, ко мулинэ. О Иегова ԥэнэн: «На жан каринг кодэла, ко виақарэл лэ мулэн. На пушэн кодэлэндар, ко диқэл, со авэла англэ» (Левит 19:31). О Иегова камэл тэ фэрий амэн лэндар. Вонэ сынэ вороӷоря лэ Дэвлэстирэ и терэн амэнди вэрыто.

УӶАНАМ МАЙ БУТ

Андэ кадэя ӷлава амэ уӷанаса, сар и анӷелоря поможын лэ манушэнди. Кадяжэ уӷанаса, сави бида можэт тэ авэл через о бэнгалимос и сар тэ фэрисавас лэ Сатанастар и лэ бэнгэндар.

4. И анӷелоря поможын лэ манушэнди тэ уӷанэн пала Иегова

Лэ Дэвлэстирэ анӷелоря поможын, кай и мануша тэ уӷанэн и радосно новость. Вонэ када терэн через лэ Иеговастирэ свидетеля. Адиносарам Откровение 14:6, 7 и подам дума пала вопросоря, савэ май тэлэ.

Васо амэнди трэбуй тэ поможын и анӷелоря, кала росԥэнас пала Дэл?
Со тутэ по ди кодэлэстар, кала ӷанэс, кай и анӷелоря поможын тути тэ авэс кай о мануш, саво камэл тэ уӷанэн пала Библия? Росԥэн.

5. Ритярдён май дур лэ бэнгалимастар

О Сатана и найвужэ, вонэ вороӷоря лэ Иеговастирэ, ай кадяжэ амарэ. Адиносарам Луки 9:38—42 и подам дума пала вопросо, саво май тэлэ.

Сар и найвужэ андярэн пэс лэ манушэнца?

Амэ на камас тэ мэкас андэ амари жызня лэ найвужэн. Адиносарам Второзаконие 18:10—12 и подам дума пала вопросоря, савэ май тэлэ.

Через со и найвужэ камэн тэ авэн андэ лэ манушэсти жызня и тэ дэн дума лэса? Савэ бэнгалимаса залэнпэ и мануша котэ, кай ту жувэс?
Сар ту гиндос, правильно, кай о Иегова ԥэнэн амэнди тэ ритярдювас май дур лэ бэнгалимастар? Росԥэн.

Диқам о ВИДЕО и подам дума пала вопросоря, савэ май тэлэ.

ВИДЕО: «Тердён против Сатана» (5:02)

Моӷло тэ анэн варисаво найлашимос кода, кай и Палеса стодя по вас ла бэятати о амулето лэ яқалимастар? Васо?
Со трэбуй сас тэ стерэл и Палеса, кай тэ фэринпэ лэ найвужэндар?

И чачунэ христианоря нисар на сԥандён лэ бэнгалимаса. Адиносарам Деяния 19:19 и 1 Коринфянам 10:21 и подам дума пала вопросо, саво май тэлэ.

Васо трэбуй, кай лэ манушэстэ нисо тэ на авэл, со ужал андо бэнгалимос?

6. Тердюв против Сатана и найвужэ

И найвужэ терэн кода, со ԥэнэн лэнди о Сатана, ай и анӷелоря, савэ кандэн лэ Дэвлэс, терэн вся, со ԥэнэн о арханӷело Михаило (када инке ек алав кай о Иисус Христос). Пэ скати дэ зорало о Михаило? Адиносарам Откровение 12:7—9 и подам дума пала вопросоря, савэ май тэлэ.

Ко май зорало, о Михаило и лэстирэ анӷелоря или о Сатана и найвужэ?
Трэбуй лэ Христостирэ учениконэнди тэ даран лэ Сатанастар и лэ найвужэндар?

Кай о мануш вижала тэ одмардёл лэ Сатанастар и лэ найвужэндар. Адиносарам Иакова 4:7 и подам дума пала вопросо, саво май тэлэ.

Сар о мануш тэ фэрий пэс лэ Сатанастар и лэ найвужэндар?

ТУТИ ВАРИКО МОЖЭТ ТЭ ԤЭНЭН: «Со катэ кацаво? Со терэлапэ кодэлэстар, со диқас или андэ савэ иӷры цэлас?»

Васо нэправильно кадя тэ гиндон?

ПАЛА СО АМЭ ДЯМ ДУМА?

Анда кадэя ӷлава амэ уӷанглям, кай и анӷелоря, савэ кандэн лэ Дэвлэс, поможын амэнди. О Сатана и найвужэ, лэ Иеговастирэ вороӷоря, вонэ хохавэн лэ манушэн через о бэнгалимос.